ಶಾರ್ಟ್ ವಿಡಿಯೋದತ್ತ ಗೂಗಲ್ ಚಿತ್ತ

Team Udayavani, Jan 2, 2021, 1:50 PM IST

ನವದೆಹಲಿ: ವಿಶ್ವದ ಬೃಹತ್ ಸರ್ಚ್ ಇಂಜಿನ್ ಸೈಟ್ ಆಗಿರುವ ಗೂಗಲ್, ತನ್ನ ಬಳಕೆದಾರರಿಗಾಗಿ ಹಲವಾರು ಸೌಲಭ್ಯಗಳನ್ನು ನೀಡುತ್ತಾ ಬಂದಿದ್ದು, ಇದೀಗ ಶಾರ್ಟ್ ವಿಡಿಯೋ ಸೌಲಭ್ಯ ನೀಡುವತ್ತ  ಚಿಂತನೆ ನಡೆಸಿದೆ.

ಟಿಕ್ ಟಾಕ್ ಸಂಸ್ಥೆ ಮೊದಲು ಆರಂಭಿಸಿದ್ದ  ಈ ಶಾರ್ಟ್ ವಿಡಿಯೋ ಸೌಲಭ್ಯವನ್ನು  ತದನಂತರ  ಇನ್ಸ್ಟಾಗ್ರಾಮ್ ಸೇರಿದಂತೆ ಫೇಸ್ ಬುಕ್ ಜಾಲತಾಣಗಳೂ ಇದನ್ನು ಅಳವಡಿಸಿಕೊಂಡವು. ಇದೀಗ ಈ ಪ್ರಯೋಗಕ್ಕೆ ಗೂಗಲ್ ಕೂಡಾ ಕೈ ಹಾಕಿದ್ದು, ಈ ಸೌಲಭ್ಯದ ಮೂಲಕ ಬೇರೆ ಬೇರೆ ಜಾಲತಾಣಗಳಲ್ಲಿರುವ ವಿಡಿಯೋಗಳನ್ನು ಗೂಗಲ್ ಮೂಲಕ ವೀಕ್ಷಿಸಬಹುದಾಗಿದೆ.

ಮಾಹಿತಿ ಪ್ರಕಾರ ಗೂಗಲ್ ಸರ್ಚ್ ಬಾರ್ ನ ಬಲಭಾಗದಲ್ಲಿ ಶಾರ್ಟ್ ವಿಡಿಯೋ ಎಂಬ ಪ್ರತ್ಯೇಕ ಆಯ್ಕೆಯನ್ನು ನೀಡಲಿದ್ದು, ಈ ಆಯ್ಕೆಯನ್ನು ಕ್ಲಿಕ್ ಮಾಡಿದ ತಕ್ಷಣ ಅದು ಟಿಕ್ ಟಾಕ್ ಅಥವಾ ಇತರ ಸಾಮಾಜಿಕ ಜಾಲತಾಣದಲ್ಲಿರುವ ವಿಡಿಯೋ ಓಪನ್ ಆಗಲಿದೆ  ಎನ್ನಲಾಗಿದೆ.

ಈ ಶಾರ್ಟ್ ವಿಡಿಯೋ ಸೌಲಭ್ಯವನ್ನು ಆರಂಭಿಸುವ ಕುರಿತಾಗಿ ಚಿಂತನೆಯನ್ನು ನಡೆಸುತ್ತಿದ್ದು ಇದು ಇನ್ನೂ ಪ್ರಾಯೋಗಿಕ ಹಂತದಲ್ಲಿದೆ . ಸದ್ಯಕ್ಕೆ ಕೆಲವೇ ಕೆಲವು ಬಳಕೆದಾರರಿಗೆ ಮಾತ್ರ ಈ ಸೌಲಭ್ಯ ನೀಡಲಾಗಿದೆ ಎಂದು ಹೇಳಲಾಗುತ್ತಿದ್ದು, ಈ ಕುರಿತಾದ ಯಾವುದೇ  ಅಧಿಕೃತ ಮಾಹಿತಿಗಳನ್ನು ಈವರೆಗೂ ಗೂಗಲ್ ಸಂಸ್ಥೆ ಹಂಚಿಕೊಂಡಿಲ್ಲ.

ಇದನ್ನೂ ಓದಿ:ಏಪ್ರಿಲ್‌ 1ಕ್ಕೆ ಯುವರತ್ನ ರಿಲೀಸ್‌

ಒಂದು ವೇಳೆ ಈ ಹೊಸ ಪ್ರಯೋಗ ಯಶಸ್ವಿಯಾದರೆ  ಗೂಗಲ್ ಸಂಸ್ಥೆ ಸದ್ಯಕ್ಕೆ ಈ ಹೊಸ ಸೌಲಭ್ಯವನ್ನು ಕೇವಲ ಮೊಬೈಲ್ ಬಳಕೆದಾರರಿಗೆ ಮಾತ್ರ ನೀಡಲಿದೆ ಹಾಗೂ  ಮುಂಬರುವ ದಿನಗಳಲ್ಲಿ ಡೆಸ್ಕ್ ಟಾಪ್ ಸೇರಿದಂತೆ ಇತರ ಬಳಕೆದಾರರಿಗೂ ನೀಡುವ  ಸಾದ್ಯತೆಗಳಿವೆ ಎಂದು ವರದಿಯಾಗಿದೆ.