ನಿಖರ ದಾಳಿ ನಡೆಸಿ ಶತ್ರುನಾಶ ಮಾಡುವ ಆತ್ಮಾಹುತಿ ಡ್ರೋನ್‌!

Team Udayavani, Dec 31, 2021, 4:25 PM IST

ಹೊಸದಿಲ್ಲಿ: ಭವಿಷ್ಯದ ಯುದ್ಧಗಳಿಗೆ ಅಗತ್ಯವಾದ 10 ಸೆಟ್‌ ಮಧ್ಯಮ ವ್ಯಾಪ್ತಿಯ ಪ್ರಿಸಿಷನ್‌ ಕಿಲ್‌ ಸಿಸ್ಟಂ(ಎಂಆರ್‌ಪಿಕೆಎಸ್‌)ಗಳನ್ನು ಖರೀದಿಸಲು ಭಾರತೀಯ ಸೇನೆ ಚಿಂತನೆ ನಡೆಸಿದೆ.

ಈ ಸಿಸ್ಟಂನಲ್ಲಿ 120 ಲಾಯಿಟರಿಂಗ್‌ ಮ್ಯುನಿಷನ್‌ಗಳು (ನಿಖರವಾಗಿ ಗುರಿಯಿಡುವ ಸಲುವಾಗಿ ಅಡ್ಡಾಡುವ ಡ್ರೋನ್‌) ಇರಲಿವೆ.

ಈ ವ್ಯವಸ್ಥೆಯು ಸ್ಥಿರವಾದ ಮತ್ತು ಚಲಿಸುವಂಥ ಗುರಿಗಳನ್ನು ಪತ್ತೆಹಚ್ಚಿ ನಾಶ ಮಾಡಬಲ್ಲಂಥ ಛಾತಿಯನ್ನು ಹೊಂದಿದೆ. ಲಾಯಿಟರಿಂಗ್‌ ಮ್ಯುನೀಷನ್‌ಗಳು ಪರಿಣಾಮಕಾರಿಯಾದ ಮಾನವರಹಿತ ಯುದ್ಧ ವಿಮಾನಗಳಾಗಿವೆ. ದೇಶೀಯವಾಗಿಯೇ ಇದನ್ನು ವಿನ್ಯಾಸಗೊಳಿಸುವ ಸಾಧ್ಯತೆಯಿದೆ.

ಹೇಗೆ ಕಾರ್ಯನಿರ್ವಹಿಸುತ್ತದೆ?
ಈ ಶಸ್ತ್ರಾಸ್ತ್ರ ವ್ಯವಸ್ಥೆಯಲ್ಲಿ 10 ಲಾಂಚರ್‌ಗಳು, 30 ಫಾರ್ವರ್ಡ್‌ ಆಬ್ಸರ್ವೇಷನ್‌ ಸ್ಟೇಷನ್‌ಗಳೂ ಇರಲಿವೆ. ಒಮ್ಮೆ ಉಡಾವಣೆ ಮಾಡಿದೊಡನೆ ಇದರಲ್ಲಿರುವ ಡ್ರೋನ್‌ಗಳು ಗಾಳಿಯಲ್ಲಿ ಸಂಚರಿಸಿ, ತನ್ನ ಗುರಿ ಪತ್ತೆಯಾದೊಡನೆ ಅದರ ಚಿತ್ರವನ್ನು ಭೂಮಿಯಲ್ಲಿರುವ ಆಪರೇಟರ್‌ಗೆ ರವಾನಿಸುತ್ತದೆ. ಈ ಡ್ರೋನ್‌ಗಳು ನಿರ್ದಿಷ್ಟ ಟಾರ್ಗೆಟ್‌ ಸಮೀಪದಲ್ಲೇ ಸುತ್ತುತ್ತಾ, ನಿರ್ದೇಶನ ಬಂದೊಡನೆ ನಿಖರ ದಾಳಿ ಮಾಡಿ ನಾಶಪಡಿಸುವ ಜತೆಗೆ ಸ್ವಯಂ ನಾಶವಾಗುತ್ತವೆ.

ಇದನ್ನೂ ಓದಿ:ವರದಕ್ಷಿಣೆ ಇರುವ ಮದುವೆಗೆ ಹೋಗಲ್ಲ: ನಿತೀಶ್‌ ಕುಮಾರ್‌

ವೈಶಿಷ್ಟ್ಯವೇನು?
– ಯಾವುದೇ ಪ್ರತಿಕೂಲ ವಾತಾವರಣದಲ್ಲೂ, ಹಗಲು-ರಾತ್ರಿ ಕಾರ್ಯನಿರ್ವಹಿಸುವ ಸಾಮರ್ಥ್ಯ.
– ಮರುಭೂಮಿ, ಅತ್ಯಂತ ಎತ್ತರದ ಪ್ರದೇಶ, ಬೆಟ್ಟ-ಗುಡ್ಡಗಳು ಸಹಿತ ಎಲ್ಲ ರೀತಿಯ ಭೂಪ್ರದೇಶಗಳಲ್ಲಿನ ಸ್ಥಿರ ಹಾಗೂ ಚಲಿಸುವ ಟಾರ್ಗೆಟ್‌ ಅನ್ನು ಪತ್ತೆಹಚ್ಚಿ ನಾಶಮಾಡುವುದು.
– ಕಮಾಂಡ್‌ ಕಂಟ್ರೋಲ್‌ ಕಂಪ್ಯೂಟರ್‌, ಸಿಗ್ನಲ್‌ ಸೆಂಟರ್‌, ಕಮಾಂಡ್‌ ಪೋಸ್ಟ್‌ಗಳು, ಶಸ್ತ್ರಾಸ್ತ್ರ ಪತ್ತೆ ರೇಡಾರ್‌, ವಾಯು ರಕ್ಷಣ ವ್ಯವಸ್ಥೆ, ಸಂವಹನ ಕೇಂದ್ರ, ಲಾಜಿಸ್ಟಿಕ್ಸ್‌ ಸ್ಟೋರೇಜ್‌ ಡಿಪೋ ಸಹಿತ ಯಾವುದೇ ಟಾರ್ಗೆಟ್‌ ಅನ್ನೂ ಧ್ವಂಸ ಮಾಡುವ ಸಾಮರ್ಥ್ಯ.
– 40 ಕಿ.ಮೀ. ದೂರದ ಗುರಿ ತಲುಪುವ ಸಾಮರ್ಥ್ಯ.
– ಕನಿಷ್ಠ 15 ವರ್ಷಗಳ ಬಾಳಿಕೆ.

ಏನಿದು ಲಾಯಿಟರಿಂಗ್‌ ಮ್ಯುನೀಷನ್‌?
ಇದನ್ನು ಸುಸೈಡ್‌ ಡ್ರೋನ್‌(ಆತ್ಮಾಹುತಿ ಡ್ರೋನ್‌) ಎಂದೂ ಕರೆಯಲಾಗುತ್ತದೆ. ಇಂಥ ಡ್ರೋನ್‌ನಲ್ಲಿ 8 ಕೆಜಿಯಷ್ಟು ಸಿಡಿತಲೆಗಳನ್ನು ಅಳವಡಿಸಿರಲಾಗುತ್ತದೆ. ಇದು ಸ್ವಲ್ಪ ಹೊತ್ತು ಟಾರ್ಗೆಟ್‌ ಇರುವ ಪ್ರದೇಶದ ಸುತ್ತಲೂ ಸುತ್ತಿ, ನಿಖರವಾಗಿ ಗುರಿಯಿಡಲು ಕಾಯುತ್ತಿರುತ್ತದೆ. ಟಾರ್ಗೆಟ್‌ ಖಚಿತವಾದೊಡನೆ ದಾಳಿಯಿಡುತ್ತದೆ. ಬಳಿಕ ಡ್ರೋನ್‌ ಕೂಡ ನಾಶವಾಗುವ ಕಾರಣಕ್ಕೇ ಅದನ್ನು ಆತ್ಮಾಹುತಿ ಡ್ರೋನ್‌ ಎನ್ನುವುದು.