ಟೋಕಿಯೊ ಒಲಿಂಪಿಕ್ಸ್ : ವಿನೇಶ್‌ ಸ್ವರ್ಣ ವಿಜಯ; ಸಿಂಧು ಪರಾಜಯ

Team Udayavani, Mar 7, 2021, 10:30 PM IST

ರೋಮ್‌: ಟೋಕಿಯೊ ಒಲಿಂಪಿಕ್ಸ್‌ಗೆ ಅರ್ಹತೆ ಪಡೆದ ಭಾರತದ ಏಕೈಕ ವನಿತಾ ಕುಸ್ತಿಪಟು ಎಂಬ ಹೆಗ್ಗಳಿಕೆಯ ವಿನೇಶ್‌ ಫೋಗಾಟ್‌ ರೋಮ್‌ನಲ್ಲಿ ನಡೆದ “ಮ್ಯಾಟೆ ಪೆಲ್ಲಿಕೋನ್‌ ರ್‍ಯಾಂಕಿಂಗ್‌ ಸೀರಿಸ್‌’ ಪಂದ್ಯಾವಳಿಯಲ್ಲಿ ಚಿನ್ನದ ಪದಕ ಜಯಿಸಿದ್ದಾರೆ. ಜತೆಗೆ 53 ಕೆ.ಜಿ. ವಿಭಾಗದಲ್ಲಿ ನಂ.1 ರ್‍ಯಾಂಕಿಂಗ್‌ ಸಂಪಾದಿಸಿದ್ದಾರೆ.

26 ವರ್ಷದ ವಿನೇಶ್‌ ಫೈನಲ್‌ನಲ್ಲಿ ಕೆನಡಾದ ಡಯಾನಾ ಮೇರಿ ಹೆಲೆನ್‌ ವೀಕರ್‌ ಅವರನ್ನು 4-0 ಅಂತರದಿಂದ ಪರಾಭವಗೊಳಿಸಿದರು. ಅವರು ಎಲ್ಲ ಅಂಕಗಳನ್ನೂ ಮೊದಲ ಅವಧಿಯಲ್ಲೇ ಸಂಪಾದಿಸಿದರು. ಆಗಲೇ ವಿನೇಶ್‌ಗೆ ಸ್ವರ್ಣ ಪದಕ ಖಾತ್ರಿಯಾಗಿತ್ತು.

ಇದು ಒಂದೇ ವಾರದ ಅವಧಿಯಲ್ಲಿ ವಿನೇಶ್‌ಗೆ ಒಲಿದ ಎರಡನೇ ಚಿನ್ನ. ಕಳೆದ ವಾರ ಉಕ್ರೇನ್‌ನ ಕೀವ್‌ನಲ್ಲಿ ನಡೆದ ಕುಸ್ತಿ ಸ್ಪರ್ಧೆಯಲ್ಲೂ ಅವರು ಬಂಗಾರಕ್ಕೆ ಕೊರಳೊಡ್ಡಿದ್ದರು.

ರೋಮ್‌ ಸ್ಪರ್ಧೆಗೆ ವಿನೇಶ್‌ ನಂ.3 ಆಗಿ ಪ್ರವೇಶಿಸಿದ್ದರು. ಈಗ ಒಮ್ಮೆಲೇ 14 ಅಂಕಗಳ ಪ್ರಗತಿ ಸಾಧಿಸಿ ಅಗ್ರಸ್ಥಾನಕ್ಕೆ ನೆಗೆದರು. ಅವರು ಈ ಕೂಟದಲ್ಲಿ ಎದುರಾಳಿಗೆ ಒಂದೂ ಅಂಕ ಬಿಟ್ಟುಕೊಡಲಿಲ್ಲ.

ಇವರ ಎದುರಾಳಿ ಡಯಾನಾ ಅವರದಂತೂ ಭರ್ಜರಿ ನೆಗೆತ. ಅವರು ಈ ಕೂಟದ ಆರಂಭದ ವೇಳೆ 40ರಷ್ಟು ಕೆಳ ರ್‍ಯಾಂಕಿಂಗ್‌ನಲ್ಲಿದ್ದರು. ಈಗ ವಿನೇಶ್‌ ಅನಂತರದ ಸ್ಥಾನಕ್ಕೆ (ನಂ.2) ಜಿಗಿದಿದ್ದಾರೆ.

ಇದನ್ನೂ ಓದಿ :ಆಸ್ಟ್ರೇಲಿಯವನ್ನು 7 ವಿಕೆಟ್‌ಗಳಿಂದ ಮಣಿಸಿ ಟಿ20 ಸರಣಿ ಗೆದ್ದ ನ್ಯೂಜಿಲ್ಯಾಂಡ್‌

ಹೊಸದಿಲ್ಲಿ: ಪಿ.ವಿ. ಸಿಂಧು ಕೂಡ ಚಾಂಪಿಯನ್‌ ಆಗಿ ಮೂಡಿಬಂದದ್ದಿದ್ದರೆ ಸೋಮ ವಾರದ ಅಂತಾರಾಷ್ಟ್ರೀಯ ಮಹಿಳಾ ದಿನದ ಸಂಭ್ರಮ ಇನ್ನಷ್ಟು ಹೆಚ್ಚುತ್ತಿತ್ತು. ಆದರೆ ಸ್ವಿಸ್‌ ಓಪನ್‌ ಫೈನಲ್‌ನಲ್ಲಿ ಅವರು ಸ್ಪೇನಿನ ಬದ್ಧ ಎದುರಾಳಿ ಕ್ಯಾರೊಲಿನಾ ಮರಿನ್‌ ವಿರುದ್ಧ ನಿರಾಶಾದಾಯಕ ಪ್ರದರ್ಶನ ನೀಡಿ ರನ್ನರ್ ಅಪ್‌ಗೆ ತೃಪ್ತಿಪಟ್ಟರು. ಮರಿನ್‌ ಬಹಳ ಸುಲಭದಲ್ಲಿ ಭಾರತೀಯಳ ಆಟ ಮುಗಿಸಿದರು. ಗೆಲುವಿನ ಅಂತರ 21-12, 21-5.

2019ರ ವಿಶ್ವಕಪ್‌ ಗೆಲುವಿನ ಬಳಿಕ ಸಿಂಧು ಕಾಣುತ್ತಿರುವ ಮೊದಲ ಫೈನಲ್‌ ಇದಾಗಿತ್ತು. ಮರಿನ್‌ ವಿರುದ್ಧ ರಿಯೋ ಒಲಿಂಪಿಕ್ಸ್‌ ಫೈನಲ್‌ ಸೋಲಿಗೆ ಸೇಡು ತೀರಿಸಿಕೊಳ್ಳುವ ಉತ್ತಮ ಅವಕಾಶವೂ ಇತ್ತು. ಆದರೆ ಸಿಂಧು ತೀರಾ ಕಳಪೆ ಪ್ರದರ್ಶನ ನೀಡಿ ನಿರಾಸೆ ಮೂಡಿಸಿದರು.

ಬಲಾಡ್ಯ ಆಟಗಾರ್ತಿ ಮರಿನ್‌ ವಿರುದ್ಧ ಸಿಂಧು ಆಡಿದ 14ನೇ ಪಂದ್ಯ ಇದಾಗಿತ್ತು. ಮರಿನ್‌ ತಮ್ಮ ಗೆಲುವಿನ ದಾಖಲೆಯನ್ನು 9ಕ್ಕೆ ವಿಸ್ತರಿಸಿದರು. ಇದು ಮರಿನ್‌ ಗೆದ್ದ ಮೊದಲ ಸ್ವಿಸ್‌ ಓಪನ್‌ ಪ್ರಶಸ್ತಿ.