ಲಂಡನ್‌ ಮಾಲ್‌ನಲ್ಲಿ ವೃದ್ಧೆಯರ ಭಾಂಗ್ರಾ ಡ್ಯಾನ್ಸ್‌;Viral Video

Team Udayavani, Mar 17, 2017, 6:30 AM IST

ಭಾಂಗ್ರಾ ನೃತ್ಯಕ್ಕೆ ಮನಸೋಲದವರಿದ್ದಾರೆಯೇ? ಪಂಜಾಬ್‌ನಲ್ಲಿ ಮಾತ್ರವಲ್ಲ ದೇಶದ ಯಾವ ಮೂಲೆಯಲ್ಲಾದರೂ ಅದನ್ನು ನೋಡಿದರೆ ಕುಣಿಯದೇ ಇರುವವರು ಯಾರಿದ್ದಾರೆ? ಭಾಂಗ್ರಾ ಜನಪ್ರಿಯತೆ ಕೇವಲ ಭಾರತಕ್ಕೆ ಮಾತ್ರ ಸೀಮಿತವಾಗಿಲ್ಲ ಎಂಬುದಕ್ಕೆ ಸಾಕ್ಷಿಯಾದ ವಿಡಿಯೋ ಒಂದು ಜಾಲತಾಣಗಳಲ್ಲಿ ಹರಿದಾಡುತ್ತಿದೆ. ಲಂಡನ್‌ನ ಜನನಿಬಿಡ ಶಾಪಿಂಗ್‌ ಮಾಲ್‌ ಒಂದರಲ್ಲಿ ಶಾಪಿಂಗ್‌ ಮಾಡುತ್ತಿದ್ದ ಮೂವರು ವಯೋವೃದ್ಧೆಯರು ಇದ್ದಕ್ಕಿದ್ದಂತೆ ನೃತ್ಯ ಮಾಡಲು ಶುರು ಮಾಡುತ್ತಾರೆ. ಅವರು ಇದ್ದಕ್ಕಿದ್ದ ಹಾಗೆ ನೃತ್ಯ ಮಾಡಲು ಆರಂಭಿಸಲು ಕಾರಣ ಮಾಲ್‌ನಲ್ಲಿ ಪ್ರಸಾರ ವಾಗುವ ಭಾಂಗ್ರಾ ಸಂಗೀತ.

ಸಂಗೀತ ಕೇಳುತ್ತಿದ್ದಂತೆ ಅವರು ಮೂವರು ತಮ್ಮ ವಯಸ್ಸು, ತಾವು ಬಂದ ಕಾರಣ ಏನನ್ನೂ ಲೆಕ್ಕಿಸದೇ ತಮಗೆ ಬಂದಂತೆ ನೃತ್ಯ ಮಾಡಲಾರಂಭಿಸುತ್ತಾರೆ. ಅದನ್ನು ಅಪರಿಚಿತರೊಬ್ಬರು ಮೊಬೈಲ್‌ನಲ್ಲಿ ಚಿತ್ರೀಕರಿಸಿ ಸಾಮಾಜಿಕ ಜಾಲತಾಣಗಳಲ್ಲಿ ಹರಿಬಿಟ್ಟಿದ್ದಾರೆ ಇಳಿವಯಸ್ಸಿನಲ್ಲೂ ಮಹಿಳೆಯರಿಗಿರುವ ಉತ್ಸಾಹ ಮತ್ತು ಭಾಂಗ್ರಾ ನೃತ್ಯಕ್ಕಿರುವ ತಾಕತ್ತಿನ ಕುರಿತು ಚರ್ಚೆಯಾಗುತ್ತಿದೆ.