ಬೇಜಾನ್‌ ಹಣ ಬಂದ ನಂತರ ಈಕೆ ಜೀವನ ಹಾಳಾಯ್ತಂತೆ!

Team Udayavani, Feb 13, 2017, 5:40 AM IST

ಹಣಕ್ಕಾಗಿ ಬಾಯಿ ಬಾಯಿ ಬಿಟ್ಟ ಹುಡುಗಿಯೊಬ್ಬಳು ಕೋಟ್ಯಂತರ ರೂ. ಕೈಸೇರಿದ ನಂತರ ಯಾಕಾದ್ರೂ ಬಂತೋ ಈ ಶನಿ ಎಂದು ಕೊರಗುತ್ತಿದ್ದಾಳೆ. ಈ ಹಣದಿಂದ ತನಗೆ ದಿನಾ ಮೈ ಪರಚಿಕೊಳ್ಳುವಷ್ಟು ಸಿಟ್ಟು ಬರುತ್ತಿದೆಯೆಂದು ಈಕೆ ಹೇಳುತ್ತಿದ್ದಾಳೆ. ಆಗಿದ್ದಿಷ್ಟೇ: ಇಂಗ್ಲೆಂಡ್‌ನ‌ ಜೇನ್‌ಪಾರ್ಕ್‌ ತನ್ನ 17ನೇ ವಯಸ್ಸಿನಲ್ಲೇ 7 ಕೋಟಿ ರೂ.ವನ್ನು ಲಾಟರಿ ಮೂಲಕ ಗೆದ್ದಿದ್ದಾಳೆ. ಸದ್ಯ 21 ವರ್ಷದ ಆಕೆಗೆ ದಿನಂಪ್ರತಿ ಹಣದಿಂದ ಕಿರಿಕಿರಿ ಆಗುತ್ತಿದೆಯಂತೆ. ಒಬ್ಬ ಒಳ್ಳೆಯ ಜೀವನ ಸಂಗಾತಿ ಸಿಗುತ್ತಿಲ್ಲವಂತೆ, ಸಿಕ್ಕವನೊಬ್ಬ ಹಣಕ್ಕಾಗಿಯೇ ಆಕೆಯ ಜೊತೆಯಿದ್ದನೆಂದು ತಡವಾಗಿ ಗೊತ್ತಾಗಿದೆ. ಮೊದಲಿನಂತೆ ಸಿಕ್ಕ ಸಿಕ್ಕ ಕಡೆಗೆ ಹೋಗುವುದಕ್ಕಾಗುವುದಿಲ್ಲ, ಸಿಕ್ಕಿದ್ದನ್ನು ತಿನ್ನಲಾಗುವುದಿಲ್ಲ. ಬ್ರಾಂಡೆಡ್‌ಗಳನ್ನು ಮಾತ್ರ ಕೊಳ್ಳುವ ಖಯಾಲಿ ಶುರುವಾಗಿದೆ ಎಂದು ಜೇನ್‌ ಗೋಳಾಡುತ್ತಾಳೆ. ಹಣದಿಂದ ನನ್ನ ಜೀವನ 10 ಪಟ್ಟು ಉದ್ಧಾರವಾಗಿದ್ದರೆ, 100 ಪಟ್ಟು ಹಾಳಾಗಿದೆ. ಆದ್ದರಿಂದ ಈ ಲಾಟರಿ ಕಂಪನಿ ಮೇಲೆ ಮೊಕದ್ದಮೆ ಹೂಡೋಣ ಎನಿಸುತ್ತದೆ ಎಂದು ಹೇಳುತ್ತಾಳೆ ಜೇನ್‌. ಅಯ್ಯೋ ಪಾಪ!