ನಾಯಿ ಎಂದು ತಿಳಿದು ತೋಳ ಇರಿಸಿಕೊಂಡ!

Team Udayavani, Dec 6, 2019, 7:50 AM IST

ಕೆನಡಾದ ಎಲಿ ಬೊರೋಡಿಟ್‌ಸ್ಕೈ ಎಂಬುವರಿಗೆ ಇತ್ತೀಚೆಗೆ ಮರೆಯಲಾಗದ ಪಾಠದ ಅನುಭವವಾಗಿತ್ತು. ಬೆಣ್ಣೆ ತಯಾರಿಕಾ ಕಾರ್ಖಾನೆಯಲ್ಲಿ ಕೆಲಸ ಮಾಡುವ ಅವರು ರಾತ್ರಿ ಪಾಳಿಯಲ್ಲಿ ಕೆಲಸಕ್ಕೆ ಹೋಗುತ್ತಿದ್ದಾಗ ರಸ್ತೆ ಬದಿಯಲ್ಲಿ ಗಾಯಗೊಂಡು ಪ್ರಜ್ಞೆ ತಪ್ಪಿ ಬಿದ್ದಿದ್ದ ನಾಯಿಯಂತೆಯೇ ಇರುವ ಪ್ರಾಣಿ ಕಾಣಿಸಿತು.

ಛೇ ಯಾರಧ್ದೋ ನಾಯಿ. ಅದನ್ನು ಆ ಸ್ಥಿತಿಯಲ್ಲಿ ಬಿಟ್ಟು ಹೋಗುವುದು ಸರಿಯಲ್ಲವೆಂದು ತಿಳಿದು, ಕಾರ್‌ನ ಹಿಂದಿನ ಸೀಟ್‌ನಲ್ಲಿ ತಂದು ಇರಿಸಿದರು. ಹೆಡ್‌ಲೈಟ್‌ನ ಬೆಳಕು ಇದ್ದರೂ, ಖಚಿತವಾಗಿ ಬೊರೋಡಿಟ್‌ಸ್ಕೈಗೆ ಯಾವ ಪ್ರಾಣಿ ಎಂದು ಗೊತ್ತಾಗಿರಲಿಲ್ಲವಂತೆ. ನಂತರ ಅದನ್ನು ಪ್ರಾಣಿ ದಯಾ ಸಂಘಕ್ಕೆ ಹಸ್ತಾಂತರಿಸಿದರು.

ಸಂಘದ ಕಚೇರಿಗೆ ತೆರಳಿದ ಅವರು ಪ್ರಾಣಿಯನ್ನು ನೋಡಿ ಅಲ್ಲಿದ್ದವರೂ ಕೂಡ ಅಚ್ಚರಿಗೊಂಡರು. ಏಕೆಂದರೆ ಎಲಿ ಬೊರೋಡಿಟ್‌ ಸ್ಕೈ ಕಾರ್‌ನಲ್ಲಿ ತಂದದ್ದು ನಾಯಿ ಇಲ್ಲ ತೋಳವೆಂದು ಖಚಿತವಾಯಿತು. ಆಘಾತಗೊಂಡ ಅವರು ‘ನಾನು ಅದು ಜರ್ಮನ್‌ ಶೆಪರ್ಡ್‌ ತಳಿಯ ನಾಯಿ ಇರಬೇಕೆಂದು ಯೋಚಿಸಿದ್ದೆ. ಅಬ್ಟಾ ಏನು ಆಗಲಿಲ್ಲ. ಬದುಕಿದೆಯೇ ಬಡಜೀವವೇ’ ಎಂದು ಹೇಳಿಕೊಂಡಿದ್ದಾರೆ.