ಏನ್ರೀ.. ಇಲ್ಲೆಲ್ಲಾ ಯಾರಾದ್ರೂ ಫೋನ್ ಚೆಕ್ ಮಾಡ್ತಾರಾ.. ಥೂ..!

Team Udayavani, Feb 25, 2019, 8:11 AM IST

ಮೊಬೈಲ್ ಫೋನುಗಳು ಅದರಲ್ಲೂ ಸ್ಮಾರ್ಟ್ ಪೋನುಗಳು ನಮ್ಮ ಬದುಕಿನ ಅವಿಭಾಜ್ಯ ಅಂಗವೇ ಆಗಿಹೋಗಿವೆ. ಮನೆಯಲ್ಲೂ ಫೋನು, ಕಛೇರಿಯಲ್ಲೂ ಫೋನು, ಸಮಾರಂಭಗಳಲ್ಲೂ ಫೋನು, ಹೀಗೆ ಎಲ್ಲಿ ಹೋದ್ರೂ ನಮ್ಮೆಲ್ಲರ ಕೈಯಲ್ಲಿ ಈ ಮೊಬೈಲ್ ತಪ್ಪುವುದಿಲ್ಲ. ಆದ್ರೆ, ಹೆಚ್ಚಿನವರು ಕೆಲವೊಂದು ಕಡೆಗಳಲ್ಲಿ ತಮ್ಮ ಮೊಬೈಲ್ ಫೋನುಗಳಿಗೆ ಎಂಟ್ರಿ ಕೊಡುವುದಿಲ್ಲ. ಆದ್ರೆ​​​,​​​​ ಇಲ್ಲೊಂದು ಸಮೀಕ್ಞೆಯಲ್ಲಿ ಬಹಿರಂಗವಾಗಿರುವ ಮಾಹಿತಿಯ ಪ್ರಕಾರ ಕೆಲವರು ಎಲ್ಲೆಂದರಲ್ಲಿ ತಮ್ಮ ಮೊಬೈಲ್ ಫೋನನ್ನು ಚೆಕ್ ಮಾಡ್ತಿರುತ್ತಾರಂತೆ. ಈ ಸಮೀಕ್ಷೆಯಲ್ಲಿ ಹೊರಬಿದ್ದಿರುವ ಫಲಿತಾಂಶಗಳನ್ನು ಕೆಳಿದ್ರೆ ನಿಮ್ಮ ತಲೆ ತಿರುಗಬಹುದು.

ಸೆಕ್ಸ್ ಸಂದರ್ಭದಲ್ಲೂ ಮೊಬೈಲ್ ಚೆಕ್ ಮಾಡುವ ಭೂಪರಿದ್ದಾರೆ!
ತಮ್ಮ ಸಂಗಾತಿಯೊಂದಿಗೆ ಲೈಂಗಿಕ ಕ್ರಿಯೆಯಲ್ಲಿ ತೊಡಗಿಕೊಂಡಿರುವಾಗ ಸುಮಾರು 17 ಪ್ರತಿಶತದಷ್ಟು ಯುವಜನತೆ ತಮ್ಮಲ್ಲಿರುವ ಸ್ಮಾರ್ಟ್ ಫೋನನ್ನು ಚೆಕ್ ಮಾಡುತ್ತಿರುತ್ತಾರಂತೆ. ಆ ಸಮಯದಲ್ಲಿ ಮೊಬೈಲ್ ನಲ್ಲಿ ನೋಡುವಂತದ್ದೇನಿರ್ತದೋಪ್ಪ?

ಇಲ್ಲೂ ಮೊಬೈಲ್ ಬಿಡಲ್ವಲ್ರೀ ಈ ಜನಗಳು!
ಇನ್ನು 18 ರಿಂದ 34 ವರ್ಷ ಪ್ರಾಯದವರಲ್ಲಿ 85 ಪ್ರತಿಶತದಷ್ಟು ಜನರು ತಾವು ಶೌಚಾಲಯದಲ್ಲಿ ಇರುವಾಗಲೂ ಮೊಬೈಲ್ ಫೋನನ್ನು ಬಳಸುತ್ತಾರಂತೆ. ಇನ್ನು 43 ಪ್ರತಿಶತ ಜನರು ಸ್ನಾನ ಮಾಡುವ ಸಂದರ್ಭದಲ್ಲೂ ಮೊಬೈಲ್ ಚೆಕ್ ಮಾಡ್ತಾರಂತೆ ಮಾರ್ರೆ.. ಅಷ್ಟು ಎಮರ್ಜೆನ್ಸಿ ಏನಿರುತ್ತೋಪ್ಪ!. ಮತ್ತು ಈ ರೀತಿಯ ವರ್ತನೆ 35 ರಿಂದ 51 ವರ್ಷದೊಳಗಿನ ಪ್ರಾಯವರ್ಗದವರಲ್ಲಿ ಜಾಸ್ತಿಯೆಂಬ ಅಂಶವೂ ‘ಶ್ಯೂರ್ ಕಾಲ್’ ಎಂಬ ಸಂಸ್ಥೆ ನಡೆಸಿರುವ ಈ ಸಮೀಕ್ಷೆಯಿಂದ ಬಯಲಾಗಿದೆ.

ಸಮೀಕ್ಷೆಗೊಳಪಟ್ಟ 1,137 ಜನರಲ್ಲಿ ಕಾಲು ಬಾಗದಷ್ಟು ಮೊಬೈಲ್ ಬಳಕೆದಾರರು ತಮ್ಮ ಬಳಿಯಲ್ಲಿ ಮೊಬೈಲ್ ಇಲ್ಲದಿದ್ದರೆ ಅದೇನೋ ಆತಂಕ ಮನಸ್ಥಿತಿ ಕಾಡುತ್ತದೆ ಎಂಬ ಅಭಿಪ್ರಾಯವನ್ನು ವ್ಯಕ್ತಪಡಿಸಿದ್ದಾರೆ. ಮತ್ತು ನೆಟ್ವರ್ಕ್ ಲಭ್ಯವಿಲ್ಲದ ಸಂದರ್ಭದಲ್ಲಿ ಈ ಆತಂಕ ಮನಸ್ಥಿತಿಯ ಪ್ರಮಾಣ 30 ಪ್ರತಿಶತಕ್ಕೆ ಏರುತ್ತದಂತೆ. ಇನ್ನು ಇವರಲ್ಲಿ ಮುಕ್ಕಾಲು ಪಾಲು ಜನರು ತಾವು ಮಲಗುವ ಸಂದರ್ಭದಲ್ಲಿ ತಮ್ಮ ಪಕ್ಕದಲ್ಲೇ ಮೊಬೈಲ್ ಇರಿಸಿಕೊಳ್ತಾರಂತೆ. ಮತ್ತು ಈ ರೀತಿಯಾಗಿ ಮೊಬೈಲ್ ಅನ್ನು ಸದಾಕಾಲ ತಮ್ಮ ಬಳಿಯಲ್ಲೇ ಇರಿಸಿಕೊಳ್ಳುವ ಜನರು ತಮ್ಮ ಜೀವನದಲ್ಲಿ ಸಂತೃಪ್ತಿಯಿಂದಿಲ್ಲ ಎಂಬ ವಿಚಾರವನ್ನೂ ಸಹ ಒಪ್ಪಿಕೊಂಡಿದ್ದಾರೆ.

ಇನ್ನೂ ಆತಂಕಕಾರಿ ವಿಚಾರವೆಂದರೆ ತಮ್ಮ ಈ ಮೊಬೈಲ್ ಗೀಳಿನಿಂದಾಗಿ ಅವರ ಕೌಟುಂಬಿಕ ಸಂಬಂಧಗಳಲ್ಲಿ ವ್ಯತ್ಯಾಸ ಆಗಿರುವ ವಿಚಾರವನ್ನು 19 ಪ್ರತಿಶತದಷ್ಟು ಜನ ಒಪ್ಪಿಕೊಂಡಿದ್ದಾರೆ ಹಾಗೂ 9 ಪ್ರತಿಶದಷ್ಟು ಜನರಿಗೆ ಕಛೇರಿಯಲ್ಲಿ ಸಹೋದ್ಯೋಗಿಗಳೊಂದಿಗಿನ ಸಂಬಂಧಗಳಲ್ಲಿ ಸಮಸ್ಯೆ ಉಂಟಾಗಿದೆಯಂತೆ. ನಿದ್ದೆ ಮಾಡುವ ಮೊದಲು ಮೊಬೈಲ್ ನೋಡುವುದರಿಂದ ಸುಖನಿದ್ರೆಗೆ ತೊಂದರೆಯಾಗಿದೆ ಎಂಬ ವಿಚಾರವನ್ನು 35 ಪ್ರತಿಶದಷ್ಟು ಜನ ಒಪ್ಪಿಕೊಂಡಿದ್ದಾರೆ ಹಾಗೂ ಈ ರೀತಿ ಮೊಬೈಲ್ ಬಳಸುವವರು ರಾತ್ರಿ ಕನಿಷ್ಟಪಕ್ಷ ಎರಡರಿಂದ ಮೂರು ಬಾರಿಯಾದರೂ ಎಚ್ಚರಗೊಳ್ಳುತ್ತಾರಂತೆ.

ಒಟ್ಟಿನಲ್ಲಿ ಅತೀಯಾದ ಮೊಬೈಲ್ ಅವಲಂಬನೆ ಯುವ ಜನರ ಜೀವನ ಗುಣಮಟ್ಟದ ಮೇಲೆ ಗಂಭೀರ ಪರಿಣಾಮ ಬೀರಿರುವ ವಿಚಾರವಂತೂ ಈ ಸಮೀಕ್ಷೆಯಿಂದ ಬಯಲಾಗಿರುವುದಂತೂ ಸತ್ಯ.