ನಾಯಿಯೆಂದು ಭಾವಿಸಿ, ಕರಡಿ ಸಾಕಿಕೊಂಡಿದ್ದಳು!

Team Udayavani, Jun 14, 2019, 10:18 AM IST

ಆನೆ ಕದ್ದರೂ ಕಳ್ಳ, ಅಡಿಕೆ ಕದ್ದರೂ ಕಳ್ಳ ಎಂಬ ಗಾದೆ ಕನ್ನಡದಲ್ಲಿದೆ. ಇಂಥ ಪರಿಸ್ಥಿತಿ ಮಲೇಷ್ಯಾದ ಗಾಯಕಿಗೆ ಬಂದೊದಗಿದೆ. ಗಾಯಕಿ ಝಾರಿತ್‌ ಸೋಫಿಯಾ ಯಾಸಿನ್‌ ತಮ್ಮ ಮನೆಯಲ್ಲಿ ಕಾಡು ಕರಡಿಯೊಂದನ್ನು ಇರಿಸಿಕೊಂಡಿದ್ದ ಆರೋಪದ ಮೇಲೆ ಪೊಲೀಸರು ಅವರನ್ನು ಬಂಧಿಸಿದ್ದರು. ಈ ಕುರಿತು ಪ್ರತಿಕ್ರಿಯೆ ನೀಡಿರುವ ಝಾರಿತ್‌, ತಮಗೆ ಆ ಪ್ರಾಣಿ ಕಾಡಿನಲ್ಲಿ ದೊರೆತಾಗ ಅದನ್ನು ನಾಯಿ ಎಂದು ತಿಳಿದಿದ್ದೆ. ನಾಯಿ ಬಹಳ ಬಡಕಲಾಗಿದೆ, ಅದನ್ನು ಪೋಷಿಸಬೇಕು ಎಂದು ಮನೆಗೆ ತಂದೆ. ಮನೆಗೆ ಬಂದ ಬಳಿಕವೇ ಅದು ಕಾಡು ಕರಡಿ ಎಂದು ತಿಳಿದಿದ್ದು. ಅದು ನಿಸ್ತೇಜವಾಗಿದ್ದರಿಂದ ಅದನ್ನು ಕೆಲ ದಿನಗಳ ಕಾಲ ಮನೆಯಲ್ಲಿರಿಸಿಕೊಂಡು ಆರೈಕೆ ಮಾಡಿ ಪ್ರಾಣಿ ಸಂಗ್ರಹಾಲಯಕ್ಕೆ ಮರಳಿಸುತ್ತಿದ್ದೆ. ಅಷ್ಟರಲ್ಲಿ ನನ್ನನ್ನು ಬಂಧಿಸಲಾಯಿತು ಎಂದು ಹೇಳಿದ್ದಾರೆ. ಅವರು ಮನೆಯಲ್ಲಿ ಕರಡಿ ಮರಿಯನ್ನು ಏಕಾಂಗಿಯಾಗಿ ಬಿಟ್ಟು ಹೋದ ವೇಳೆ ಕರಡಿ ಕಿಟಕಿಯಿಂದ ಹೊರ ಬಾಗಿ ಸಹಾಯಕ್ಕಾಗಿ ಕೂಗುವ ದೃಶ್ಯವನ್ನು ಗಾಯಕಿಯ ನೆರೆ ಮನೆಯವರು ವಿಡಿಯೋ ಚಿತ್ರೀಕರಿಸಿದ್ದರು.


ಈ ವಿಭಾಗದಿಂದ ಇನ್ನಷ್ಟು

ಹೊಸ ಸೇರ್ಪಡೆ