ತಂಡಕ್ಕೆ ಮರಳಲು ಬಯಸಿದ್ದ ಎಬಿಡಿ
Team Udayavani, Jun 7, 2019, 6:00 AM IST
ಜೊಹಾನ್ಸ್ ಬರ್ಗ್: ದಕ್ಷಿಣ ಆಫ್ರಿಕಾ ವಿಶ್ವಕಪ್ನಲ್ಲಿ ಹ್ಯಾಟ್ರಿಕ್ ಸೋಲನುಭವಿಸಿ ಸಂಕಷ್ಟದಲ್ಲಿರುವ ಹೊತ್ತಿನಲ್ಲಿ ಎಲ್ಲರೂ ಎಬಿ ಡಿ ವಿಲಿಯರ್ ತಂಡದಲ್ಲಿದ್ದರೆ…. ಎಂದು ಚಿಂತಿಸುತ್ತಿದ್ದಾರೆ. ಆದರೆ ಎಬಿಡಿ ನಿವೃತ್ತಿ ತೊರೆದು ನಿಜವಾಗಿಯೂ ದಕ್ಷಿಣ ಆಫ್ರಿಕಾ ವಿಶ್ವಕಪ್ ತಂಡವನ್ನು ಸೇರಿಕೊಳ್ಳುವ ಉತ್ಸುಕತೆಯಲ್ಲಿದ್ದರು ಎಂಬ ಈ ವಿಷಯ ಈಗ ಬೆಳಕಿಗೆ ಬಂದಿದೆ.
“ಕ್ರಿಕೆಟ್ ಸೌತ್ ಆಫ್ರಿಕಾ’ ವಿಶ್ವಕಪ್ಗೆ ತಂಡವನ್ನು ಅಂತಿಮಗೊಳಿಸುವ ಒಂದು ದಿನ ಮೊದಲು ಡಿ ವಿಲಿಯರ್ ತಂಡಕ್ಕೆ ಮರಳುವ ಇಚ್ಛೆ ವ್ಯಕ್ತಪಡಿಸಿದ್ದರು. ಆದರೆ ನಿವೃತ್ತಿಯಾಗುವುದು ಬೇಡ ಎಂದು ಹೇಳಿದರೂ ಕೇಳದೆ ಹೊರನಡೆದಿದ್ದ ಎಬಿಡಿ ಅವರನ್ನು ಮರಳಿ ಸೇರಿಸುವುದು ಬೇಡ ಎಂದು ಕ್ರಿಕೆಟ್ ಸೌತ್ ಆಫ್ರಿಕಾ ಖಡಕ್ ನಿರ್ಧಾರ ಕೈಗೊಂಡಿತು. ಈಗ ಡಿ ವಿಲಿಯರ್ ಇದ್ದಿದ್ದರೆ ಚೆನ್ನಾಗಿತ್ತು ಎಂಬ ಭಾವನೆ ಎಲ್ಲರದ್ದಾಗಿದೆ.