ಆಫ್ಘಾನ್-ಪಾಕ್ ಅಭಿಮಾನಿಗಳ ನಡುವೆ “ಬಲೂಚಿಸ್ತಾನ’ ಗಲಾಟೆ
Team Udayavani, Jun 30, 2019, 11:18 AM IST
ಹೆಡಿಂಗ್ಲೆಯಲ್ಲಿ ಆಫ್ಘಾನಿಸ್ತಾನ-ಪಾಕಿಸ್ತಾನ ಅಭಿಮಾನಿಗಳ ನಡುವೆ ಗಲಾಟೆಯಾಗಿ, ಪಂದ್ಯಕ್ಕಿಂತ ಗಲಾಟೆ ವಿಚಾರವೇ ಜಾಸ್ತಿ ಸುದ್ದಿಯಾಗಿದೆ. ಈ ಗಲಾಟೆಗೆ ನಿಖರ ಕಾರಣಗಳು ತಿಳಿದುಬಂದಿಲ್ಲ. ಆದರೆ ಪಂದ್ಯದ ವೇಳೆ ಮೈದಾನದ ಮೇಲೆ ಜಸ್ಟೀಸ್ ಫಾರ್ ಬಲೂಚಿಸ್ತಾನ ಎಂಬ ಫಲಕವನ್ನು ಇಳಿಬಿಟ್ಟುಕೊಂಡ ವಿಮಾನವನ್ನು ನೋಡಿದ ನಂತರ ಎರಡೂ ಗುಂಪಿನ ನಡುವೆ ಘರ್ಷಣೆ ಸಂಭವಿಸಿದೆ ಎನ್ನಲಾಗಿದೆ.
ಬಲೂಚಿಸ್ತಾನ ಪಾಕಿಸ್ತಾನದ ಒಂದು ಭಾಗ. ಆ ಭಾಗದ ಜನತೆ ತಮಗೆ ಪಾಕಿಸ್ತಾನದಿಂದ ಮುಕ್ತಿ ಬೇಕು ಎಂದು ಕೆಲ ದಶಕಗಳಿಂದ ಹೋರಾಟ ಮಾಡುತ್ತಿದ್ದಾರೆ. ಈ ಪ್ರತ್ಯೇಕತಾವಾದಿ ನಾಯಕರು ಗಲಾಟೆ ಹಬ್ಬಿಸಿದ್ದಾರೆ ಎಂದೂ ಹೇಳಲಾಗಿದೆ. ಗಲಾಟೆ ಜೋರಾದ ಕೂಡಲೇ ಪೊಲೀಸರು ಮಧ್ಯಪ್ರವೇಶಿಸಿ ಇಬ್ಬರು ಆಫನಿ ಅಭಿಮಾನಿಗಳನ್ನು ಹೊರಹಾಕಿದ್ದಾರೆ. ಅಲ್ಲೂ ಅವರು ಗಲಾಟೆ ಮುಂದುವರಿಸಿದ್ದಾರೆ. ಬ್ಯಾರಿಕೇಡ್ಗಳನ್ನೇ ಬಳಸಿ ಪೊಲೀಸರ ವಿರುದ್ಧ ಗಲಾಟೆ ಮಾಡಿದ್ದಾರೆ. ಕೆಲ ಪತ್ರಕರ್ತರಿಗೂ ಬಾರಿಸಿದ್ದಾರೆಂದು ಹೇಳಲಾಗಿದೆ. ಆಫ್ಘಾನಿ ಮತ್ತು ಪಾಕ್ ಅಭಿಮಾನಿಗಳ ಘರ್ಷಣೆ ನಡೆಸುವಂತಹ ಯಾವ ಸಂಗತಿ ನಡೆಯಿತೆನ್ನುವುದು ಇನ್ನೂ ಖಚಿತವಾಗಿಲ್ಲ