ವಿಲಿಯಮ್ಸನ್ ಕ್ರೀಡಾಸ್ಫೂರ್ತಿ ಪ್ರಶ್ನಿಸಿದ ಪಾಲ್ ಆ್ಯಡಮ್ಸ್
Team Udayavani, Jun 21, 2019, 5:27 AM IST
ಬರ್ಮಿಂಗ್ಹ್ಯಾಮ್: ದಕ್ಷಿಣ ಆಫ್ರಿಕಾ ವಿರುದ್ಧದ ಪಂದ್ಯದಲ್ಲಿ ಶತಕ ಸಿಡಿಸಿ ನ್ಯೂಜಿಲ್ಯಾಂಡ್ ಗೆಲುವಿಗೆ ಕಾರಣರಾದ ಕೇನ್ ವಿಲಿಯಮ್ಸನ್ ಅವರ ಕ್ರೀಡಾಸ್ಫೂರ್ತಿಯನ್ನು ಹರಿಣಗಳ ನಾಡಿನ ಮಾಜಿ ಸ್ಪಿನ್ನರ್ ಪಾಲ್ ಆ್ಯಡಮ್ಸ್ ಪ್ರಶ್ನಿಸಿದ್ದಾರೆ. ತಾನು ಔಟೆಂಬುದು ಗೊತ್ತಿದ್ದೂ ಅವರು ಕ್ರೀಸ್ ಬಿಟ್ಟು ಹೊರನಡೆಯದಿರುವುದು ಆ್ಯಡಮ್ಸ್ ಅವರನ್ನು ಕೆರಳಿಸಿದೆ.
ಬುಧವಾರದ ನ್ಯೂಜಿಲ್ಯಾಂಡ್ ಎದುರಿನ ಪಂದ್ಯದಲ್ಲಿ ಕಿವೀಸ್ ನಾಯಕ ಕೇನ್ ವಿಲಿಯಮ್ಸನ್ ಅಜೇಯ 106 ರನ್ ಗಳಿಸಿ ತಂಡವನ್ನು ದಡ ಸೇರಿಸುವಲ್ಲಿ ಪ್ರಮುಖ ಪಾತ್ರ ವಹಿಸಿದ್ದರು. ಆದರೆ ಇಮ್ರಾನ್ ತಾಹಿರ್ ಎಸೆದ 38ನೇ ಓವರ್ನಲ್ಲಿ ವಿಲಿಯಮ್ಸನ್ ಬ್ಯಾಟಿಗೆ ಸವರಿದ ಚೆಂಡು ವಿಕೆಟ್ ಕೀಪರ್ ಕೈಸೇರಿತ್ತು. ಈ ವೇಳೆ ಚೆಂಡು ಬ್ಯಾಟ್ಗೆ ತಾಗಿರುವುದು ಆಟಗಾರರಿಗೆ ಸ್ಪಷ್ಟವಾಗಿರಲಿಲ್ಲ. ಹೀಗಾಗಿ ಆಫ್ರಿಕಾ ಆಟಗಾರರು ಅಂಪಾಯರ್ಗೆ ಮನವಿ ಸಲ್ಲಿಸಲಿಲ್ಲ.
ಆದರೆ ಟೀವಿ ರೀಪ್ಲೆಯಲ್ಲಿ ಬ್ಯಾಟ್ಗೆ ಚೆಂಡು ಬಡಿದಿರುವುದು ಸ್ಪಷ್ಟವಾಗಿತ್ತು. ಈ ಕುರಿತು ಟ್ವೀಟ್ ಮಾಡಿರುವ ಆ್ಯಡಮ್ಸ್, “ಔಟ್ ಎಂದು ಗೊತ್ತಿದ್ದರೂ ವಿಲಿಯಮ್ಸನ್ ಕ್ರೀಸ್ ಬಿಡಲಿಲ್ಲ. ಅವರಿಗೆ ಕ್ರೀಡಾಸ್ಫೂರ್ತಿ ಇದೆಯೇ? ಈ ರೀತಿಯ ತಪ್ಪುಗಳಿಂದ ಆಟಗಾರರು ತಮ್ಮ ಹೆಸರಿಗೆ ಕಳಂಕ ತಂದುಕೊಳ್ಳುತ್ತಾರೆ’ ಎಂದಿದ್ದಾರೆ.
ಕೇನ್ ವಿಲಿಯಮ್ಸನ್ ಅವರ ವರ್ತನೆಗೆ ಕ್ರೀಡಾಭಿಮಾನಿಗಳು ಖಾರವಾದ ಪ್ರತಿಕ್ರಿಯೆ ನೀಡಿದ್ದಾರೆ.