Updated at Wed,24th May, 2017 11:51AM IST
Please Select Your Default Edition         ಕರ್ನಾಟಕ ಆವೃತ್ತಿ    |     ಕರಾವಳಿ ಆವೃತ್ತಿ     |     English Edition

ಇನ್ಫಿಯ ಕಿರಿಯ ಸಿಬ್ಬಂದಿಗಿಲ್ಲ ಎಚ್‌-1ಬಿ ಭಾಗ್ಯ!

ಬೆಂಗಳೂರು: ಸಂಸ್ಥೆಯ ಯಾವುದೇ ಕಿರಿಯ ಉದ್ಯೋಗಿಗಳು ಇನ್ನು ಎಚ್‌- 1ಬಿ ವೀಸಾಗೆ ಅರ್ಜಿ ಸಲ್ಲಿಸುವಂತಿಲ್ಲ ಎಂದು ಐಟಿ ದಿಗ್ಗಜ ಇನ್ಫೋಸಿಸ್‌ ತನ್ನ ಸಿಬ್ಬಂದಿಗೆ ಸೂಚನೆ ಹೊರಡಿಸಿದೆ. ಐಟಿ ಉದ್ಯೋಗದ ಹೊಸ್ತಿಲಲ್ಲೇ ಅಮೆರಿಕದ ಕನಸು ಕಾಣುವ ಸಂಸ್ಥೆಯ ಆಕಾಂಕ್ಷಿಗಳಿಗೆ ಇದರಿಂದ ನಿರಾಶೆ ಆದಂತಾಗಿದೆ.

"ಎಚ್‌- 1ಬಿ ವೀಸಾ ಬಳಸಿಕೊಂಡು ವಿದೇಶಕ್ಕೆ ಹಾರುವ ಪರಿಪಾಠ ನಿಲ್ಲಬೇಕು' ಎಂದು ಇತ್ತೀಚೆಗಷ್ಟೇ ಇನ್ಫೋಸಿಸ್‌ ಸಂಸ್ಥಾಪಕ ನಾರಾಯಣ ಮೂರ್ತಿ ಹೇಳಿದ ಬೆನ್ನಲ್ಲೇ ಸಂಸ್ಥೆ ಈ ತೀರ್ಮಾನಕ್ಕೆ ಬಂದಿದೆ. ಕನಿಷ್ಠ 4 ವರ್ಷದ ತನಕ ಯಾವ ಸಿಬ್ಬಂದಿಯೂ ಅರ್ಜಿ ಸಲ್ಲಿಸುವಂತಿಲ್ಲ ಎಂದು ಆದೇಶ ಹೊರಡಿಸಿದೆ.

"ಸಾಗರೋತ್ತರದ ಮಂದಿ ಭಾರತಕ್ಕಾಗಿ ಕೆಲಸ ಮಾಡುತ್ತಿದ್ದಾರೆ. ಮತ್ತು ಅಲ್ಲಿನ ಕಿರಿಯ ಉದ್ಯೋಗಿಗಳಿಗೆ ಭಾರತ ಕೆಲಸ ಕೊಟ್ಟಿದೆ. ಎಚ್‌-1ಬಿ ವೀಸಾದ ಕನಸಿನ ಗುಂಗಿನಲ್ಲೇ ಇಲ್ಲಿನ ಕಿರಿಯ ಉದ್ಯೋಗಿಗಳು ಕೆಲಸಕ್ಕೆ ಬರುತ್ತಾರೆ' ಎಂಬುದು ಸಂಸ್ಥೆಯ ಎಕ್ಸಿಕ್ಯೂಟಿವ್‌ ಒಬ್ಬರ ಮಾತು. ಇದರೊಂದಿಗೆ, ಸಿಸ್ಟಮ್ಸ್‌ ಎಂಜಿನಿಯರ್‌ ಮತ್ತು ಸೀನಿಯರ್‌ ಸಿಸ್ಟಮ್ಸ್‌ ಎಂಜಿನಿಯರುಗಳೂ ಅರ್ಜಿ ಸಲ್ಲಿಸುವಂತಿಲ್ಲ ಎಂದು ಸೂಚನೆ ಹೊರಡಿಸಲಾಗಿದೆ. ಟ್ರಂಪ್‌ ಸರಕಾರದ ಎಚ್‌-1ಬಿ ವೀಸಾ ಕಡಿತ ನೀತಿ ಹಿನ್ನೆಲೆಯಲ್ಲಿ ಈ ಕ್ರಮ ಎನ್ನಲಾಗಿದೆ.

ಯಾರಿಗೂ ಲಾಭ ಇಲ್ಲ:  ಸಂಸ್ಥೆಯ ಈ ಆದೇಶದಿಂದ ಹಿರಿಯ ಉದ್ಯೋಗಿಗಳಿಗೆ ಲಾಭವಂತೂ ಇಲ್ಲ. ಲಿಂಕ್ಡ್ಇನ್‌ನ ಪ್ರಕಾರ, ಅಮೆರಿಕದಲ್ಲಿ 150 ಕೆಲಸ ಖಾಲಿ ಇದೆ ಎಂದು ಕಳೆದ ತಿಂಗಳು ಜಾಹೀರಾತು ಪ್ರಕಟವಾಗಿತ್ತು. ಅನೇಕ ಸಂಸ್ಥೆಗಳು ಕೇವಲ 2 ವರ್ಷದ ಅನುಭವ ಕೇಳಿದ್ದವು. ಈಗ ಹಿರಿಯ (ಅನುಭವಿ) ಸಿಬ್ಬಂದಿಗೆ ಈ ವೀಸಾ ಸೌಲಭ್ಯ ಸಿಕ್ಕರೂ ಪ್ರಯೋಜನವಿಲ್ಲ.. ಸಂಸ್ಥೆ ತೊರೆಯುವ ಉದ್ಯೋಗಿಗಳನ್ನು ಆದಷ್ಟು ತನ್ನಲ್ಲಿಯೇ ಉಳಿಸಿಕೊಳ್ಳಲು ಇನ್ಫೋಸಿಸ್‌ ನಿರ್ಧರಿಸಿದೆ ಎನ್ನಲಾಗಿದೆ.

ಕಾಗ್ನಿಝಂಟ್‌ನ 6 ಸಾವಿರ ಕೆಲಸಕ್ಕೆ ಕತ್ತರಿ?
ವೇತನ ಮೌಲ್ಯಮಾಪನ ಸಮೀಪಿಸುತ್ತಿದ್ದಂತೆ ಐಟಿ ಜಗತ್ತಿನಲ್ಲಿ ಉದ್ಯೋಗ ಕತ್ತರಿ ಪರ್ವ ಆರಂಭಗೊಂಡಿದೆ. ಅಮೆರಿಕದ ಮೂಲದ ಕಾಗ್ನಿಜೆಂಟ್‌ ಸಂಸ್ಥೆ ಇದೀಗ ಭಾರತದಲ್ಲಿ 6 ಸಾವಿರ ಸಿಬ್ಬಂದಿಗೆ ಗೇಟ್‌ಪಾಸ್‌ ನೀಡಲು ಮುಂದಾಗಿದೆ ಎಂದು ವರದಿಯಾಗಿದೆ. ಒಟ್ಟಾರೆ 2,65,000 ಸಿಬ್ಬಂದಿ ಇರುವ ಕಾಗ್ನಿಜೆಂಟ್‌ ಸಂಸ್ಥೆಯಲ್ಲಿ ಶೇ.2-3 ಮಂದಿ ಕನಿಷ್ಠ ಕಾರ್ಯನಿರ್ವಹಣೆಗೆ ಒಳಪಟ್ಟಿದ್ದಾರೆ. ಕಂಪೆನಿ ಯಾಂತ್ರೀಕೃತ ಅಳವಡಿಕೆಗೆ ಮುಂದಾಗಿದ್ದು, ಈ ಹಿನ್ನೆಲೆಯಲ್ಲಿ 6 ಸಾವಿರ ಸಿಬ್ಬಂದಿಯ ಕೆಲಸಕ್ಕೆ ಕುತ್ತು ಬರಲಿದೆ ಎನ್ನಲಾಗಿದೆ. "ಇಂಥ ಕ್ರಮಗಳನ್ನು ಇತರ ಐಟಿ ಕಂಪೆನಿಗಳೂ ಕೈಗೊಳ್ಳುತ್ತವೆ. ನಾವು ಮಾತ್ರ ಅಲ್ಲ' ಎಂದು ಕಂಪೆನಿ ಮೂಲಗಳು ಹೇಳಿವೆ.


More News of your Interest

Trending videos

Back to Top