ಲಂಡನ್ : ಮಾಜಿ ವಿಶ್ವ ಚಾಂಪಿಯನ್ ರಶ್ಯದ ತಾತ್ಯಾನಾ ಲಿಸೆಂಕೊ ಅವರು ಒಲಿಂಪಿಕ್ ದಾಖಲೆಯೊಂದಿಗೆ ವನಿತೆಯರ ಹ್ಯಾಮರ್ ಸ್ಪರ್ಧೆಯ ಚಿನ್ನವನ್ನು ಗೆದ್ದುಕೊಂಡಿದ್ದಾರೆ.2011ರ ಎಪ್ರಿಲ್ನಲ್ಲಿ ಎರಡು ವರ್ಷಗಳ ನಿಷೇಧದಿಂದ ಮರಳಿದ್ದ 28ರ ಹರೆಯದ ಲಿಸೆಂಕೊ ಅವರು ಪೋಲಂಡಿನ ಅನಿತಾ ವೊಡರ್ಚಿಕ್ ಅವರನ್ನು ಕೆಡಹಿ ಚಿನ್ನ ಗೆದ್ದರು. ಹ್ಯಾಮರನ್ನು 78.18 ಮೀ. ದೂರಕ್ಕೆ ಎಸೆಯುವ ಮೂಲಕ ಲಿಸೆಂಕೊ ಒಲಿಂಪಿಕ್ ದಾಖಲೆಗೈದರೆ ಬೆಳ್ಳಿ ಗೆದ್ದ ವೂಡರ್ಚಿಕ್ 77.60 ಮೀ. ದೂರ ಎಸೆದರು. ಜರ್ಮನಿಯ ಬೆಟ್ಟಿ ಹೈಡ್ಲರ್ ಕಂಚು (77.13 ಮೀ.) ಗೆದ್ದರು.ಏಶ್ಯನ್ ದಾಖಲೆ ಹೊಂದಿರುವ ಚೀನದ ಝಾಂಗ್ ವೆನ್ಕ್ಸಿಯು ಅವರು ಕಂಚು ಪಡೆದ ಸಂಭ್ರಮ ಆಚರಿಸಿದರು. ಆದರೆ ಅವರ ಅಂತಿಮ ಪ್ರಯತ್ನವನ್ನು ಅಧಿಕಾರಿಗಳು ಫೌಲ್ ಎಂದು ತಿಳಿಸಿದ್ದರಿಂದ ಅವರು ಕಂಚಿನ ಪದಕದಿಂದ ವಂಚಿತರಾಗಬೇಕಾಯಿತು. ಇದನ್ನು ಪ್ರಶ್ನಿಸಿ ಚೀನ ತಂಡದ ಅಧಿಕಾರಿಗಳು ದೂರು ಸಲ್ಲಿಸಿದ್ದಾರೆ.