ಸದ್ದು ಮಾಡುತ್ತಿದೆ ಸ್ಫೂಕಿ ಕಾಲೇಜ್ ಟ್ರೇಲರ್!
Team Udayavani, Jan 2, 2023, 4:45 PM IST
ಈಗಾಗಲೇ ತನ್ನ ಫಸ್ಟ್ಲುಕ್, ಟೀಸರ್ ಹಾಗೂ ಹಾಡುಗಳ ಮೂಲಕ ಸಿನಿಪ್ರಿಯರ ಗಮನ ಸೆಳೆದಿರುವ “ಸ್ಫೂಕಿ ಕಾಲೇಜ್’ ಚಿತ್ರದ ಮೊದಲ ಟ್ರೇಲರ್ ಇತ್ತೀಚೆಗೆ ಬಿಡುಗಡೆಯಾಗಿದೆ.
ಟ್ರೇಲರ್ ಬಿಡುಗಡೆಯ ಬಳಿಕ ಮಾತನಾಡಿದ ಚಿತ್ರದ ನಿರ್ದೇಶಕ ಭರತ್ ಜಿ, “ಸ್ಫೂಕಿ ಎಂದರೆ ಭಯ. ಈ ಭಯವನ್ನು ನಮ್ಮ ಸಿನಿಮಾದಲ್ಲಿ ಸ್ವಲ್ಪ ಭಿನ್ನವಾಗಿ ತೋರಿಸಿದ್ದೇವೆ. ಇದೊಂದು ಸೈಕಾಲಜಿಕಲ್ ಹಾರರ್-ಥ್ರಿಲ್ಲರ್ ಶೈಲಿಯ ಸಿನಿಮಾ. ಟ್ರೇಲರ್ನಲ್ಲಿ ಕಥೆಯ ಸಣ್ಣ ಎಳೆ ಬಿಟ್ಟುಕೊಟ್ಟಿದ್ದೇವೆ. ಸಿನಿಮಾ ಬೇರೆಯ ಲೆವೆಲ್ನಲ್ಲಿ ಇರಲಿದೆ. ಸುಮಾರು 100 ವರ್ಷಕ್ಕೂ ಹಿಂದಿನ ಧಾರವಾಡದ ಕಾಲೇಜ್ನಲ್ಲಿ ಸಿನಿಮಾದ ಬಹುಭಾಗ ಶೂಟಿಂಗ್ ನಡೆಸಲಾಗಿದೆ. “ವೀರಕೇಸರಿ’ ಸಿನಿಮಾದ “ಮೆಲ್ಲುಸಿರೆ ಸವಿಗಾನ…’ ಹಾಡನ್ನು ನಮ್ಮ ಸಿನಿಮಾದಲ್ಲಿ ಹೊಸರೀತಿಯಲ್ಲಿ ಬಳಸಿಕೊಂಡಿದ್ದೇವೆ. ಸಿನಿಮಾದ ಸಬ್ಜೆಕ್ಟ್ ಮತ್ತು ಕಲಾವಿದರ ಅಭಿನಯದ ಒಂದು ಹೈಲೈಟ್ ಆದರೆ, ಮ್ಯೂಸಿಕ್, ಛಾಯಾಗ್ರಹಣ, ಸಂಕಲನ, ಆರ್ಟ್ ವರ್ಕ್ ಸಿನಿಮಾದ ಮತ್ತೂಂದು ಹೈಲೈಟ್. ಸಿನಿಮಾ ನೋಡುವ ಪ್ರತಿಯೊಬ್ಬರಿಗೂ ಹೊಸ ಫೀಲ್ ಕೊಡುತ್ತದೆ’ ಎಂದು ವಿಶ್ವಾಸ ವ್ಯಕ್ತಪಡಿಸಿದರು.
ಈ ಹಿಂದೆ “ರಂಗಿತರಂಗ’, “ಅವನೇ ಶ್ರೀಮನ್ನಾರಾಯಣ’ ಸಿನಿಮಾಗಳನ್ನು ನಿರ್ಮಿಸಿದ ಪ್ರಕಾಶ್ ಹೆಚ್. ಕೆ “ಶ್ರೀದೇವಿ ಎಂಟರ್ಟೈನರ್’ ಬ್ಯಾನರ್ನಲ್ಲಿ ಈ ಸಿನಿಮಾವನ್ನು ನಿರ್ಮಿಸಿದ್ದಾರೆ. “ಕೋವಿಡ್ ಸಮಯದಲ್ಲಿ ಸಿನಿಮಾದ ಬಹುತೇಕ ಶೂಟಿಂಗ್ ಮಾಡಲಾಯಿತು. ಇಡೀ ಟೀಮ್ವರ್ಕ್ನಿಂದ ಸಿನಿಮಾ ತುಂಬ ಚೆನ್ನಾಗಿ ಬಂದಿದೆ. “ಸ್ಫೂಕಿ ಕಾಲೇಜ್’ ಎಲ್ಲರಿಗೂ ಇಷ್ಟವಾಗುವಂಥ ಸಿನಿಮಾವಾಗಲಿದೆ’ ಎಂದು ಭರವಸೆಯ ಮಾತುಗಳನ್ನಾಡಿದರು.
“ಚೂರಿಕಟ್ಟೆ’ ಸಿನಿಮಾದ ಮೂಲಕ ಬೆಳ್ಳಿತೆರೆಗೆ ಪರಿಚಯವಾಗಿದ್ದ, ಆನಂತರ “ಪ್ರೀಮಿಯರ್ ಪದ್ಮಿನಿ’ ಸಿನಿಮಾದಲ್ಲಿ ಪ್ರಮುಖ ಪಾತ್ರದಲ್ಲಿ ಕಾಣಿಸಿಕೊಂಡಿದ್ದ ವಿವೇಕ್ ಸಿಂಹ ಈ ಸಿನಿಮಾದಲ್ಲಿ ನಾಯಕನಾಗಿ ಕಾಣಿಸಿಕೊಂಡಿದ್ದಾರೆ. “ದಿಯಾ’ ಖ್ಯಾತಿಯ ಖುಷಿ ರವಿ ನಾಯಕಿಯಾಗಿದ್ದಾರೆ. ಸಿನಿಮಾದಲ್ಲಿ ಇಬ್ಬರೂ ಕೂಡ ಕಾಲೇಜ್ ಸ್ಟುಡೆಂಟ್ ಪಾತ್ರದಲ್ಲಿ ಕಾಣಿಸಿಕೊಂಡಿದ್ದು, ಸಿನಿಮಾ ಮತ್ತು ತಮ್ಮ ಪಾತ್ರದ ಬಗ್ಗೆ ನಿರೀಕ್ಷೆಯ ಮಾತುಗಳನ್ನಾಡಿದರು.
ಛಾಯಾಗ್ರಹಕ ಮನೋಹರ ಜೋಶಿ, ನಟರಾದ ಅಜೇಯ್ ಪೃಥ್ವಿ, ಶರಣ್ಯಾ ಶೆಟ್ಟಿ, ರಘು ರಾಮನಕೊಪ್ಪ, ವಿಜಯ್ ಚೆಂಡೂರ್, ಶೃತಿ ರಾವ್ ಮೊದಲಾದವರು ಚಿತ್ರದ ಬಗ್ಗೆ ತಮ್ಮ ಅಭಿಪ್ರಾಯ ಹಂಚಿಕೊಂಡರು.
ಇನ್ನು ಸಿನಿಮಾದ ಟೈಟಲ್ ನಲ್ಲಿರುವಂತೆ ಟ್ರೇಲರ್ ಕೂಡ “ಸ್ಫೂಕಿ’ಯಾಗಿ ಮೂಡಿ ಬಂದಿದ್ದು, ಅನೇಕ ತಾರೆಯರು ಟ್ರೇಲರ್ ಬಗ್ಗೆ ಮೆಚ್ಚುಗೆಯ ಮಾತುಗಳನ್ನಾಡಿದ್ದಾರೆ. ಸೋಶಿಯಲ್ ಮೀಡಿಯಾದಲ್ಲೂ ಟ್ರೇಲರ್ ಜೋರಾಗಿ ಸದ್ದು ಮಾಡಲು ಯಶಸ್ವಿಯಾಗಿದ್ದು, ಸಿನಿಮಾ ಇದೇ ಜ. 6ಕ್ಕೆ ತೆರೆಗೆ ಬರುತ್ತಿದೆ.