ನಿರ್ಮಾಪಕರ ಸಂಘಕ್ಕೆ ಸದ್ಯದಲ್ಲೇ ಸ್ವಂತ ಕಟ್ಟಡ

Team Udayavani, Aug 29, 2018, 11:45 AM IST

ಸ್ವಂತದ್ದೊಂದು ಕಟ್ಟಡ ಮಾಡಿಕೊಳ್ಳಬೇಕು ಎಂಬುದು ಕನ್ನಡ ಚಲನಚಿತ್ರ ನಿರ್ಮಾಪಕರ ಸಂಘದ ಹಲವು ವರ್ಷಗಳ ಕನಸಾಗಿತ್ತು. ಆದರೆ, ಕಾರಣಾಂತರಗಳಿಂದ ಯೋಜನೆ ಮುಂದಕ್ಕೆ ಹೋಗುತ್ತಲೇ ಇತ್ತು. ಇದೀಗ ಆ ಕನಸು ನನಸಾಗುವ ಹಂತಕ್ಕೆ ಬಂದಿದ್ದು, ನಿರ್ಮಾಪಕರ ಸಂಘವು ಕಟ್ಟಡಕ್ಕಾಗಿ ಸ್ವಂತ ನಿವೇಶವನ್ನು ಖರೀದಿಸಿದೆ.

ಹೌದು, ಕನ್ನಡ ಚಲನಚಿತ್ರ ನಿರ್ಮಾಪಕರ ಸಂಘವು ನಗರದ ಗಾಂಧಿ ಭವನದ ಎದುರು ನಿವೇಶನವೊಂದನ್ನು ಖರೀದಿಸಿದೆ. ಸುಮಾರು ಮೂರೂವರೆ ಸಾವಿರ ಚದುರಡಿ ರುವ ಈ ನಿವೇಶನ ಮೌಲ್ಯ 9.45 ಕೋಟಿ. ಆ ಪೈಕಿ ಇತ್ತೀಚೆಗೆ 7.45 ಕೋಟಿಯಷ್ಟು ಮುಂಗಡ ನೀಡಲಾಗಿದೆ. ಸಂಘದ ಅಧ್ಯಕ್ಷ ಮುನಿರತ್ನ, ಕಾರ್ಯದರ್ಶಿ ಸೂರಪ್ಪ ಬಾಬು, ನಿರ್ಮಾಪಕರಾದ ಎ. ಗಣೇಶ್‌, ರಮೇಶ್‌ ಯಾದವ್‌, ಉಮೇಶ್‌ ಬಣಕಾರ್‌, ಸೌಂದರ್ಯ ಜಗದೀಶ್‌, ಮಾರುತಿ ಜೆಡಿಯವರ್‌ ಮುಂತಾದವರು ಮುಂಗಡ ಚೆಕ್‌ ಕೊಟ್ಟಿದ್ದಾರೆ.

ಅಂದಹಾಗೆ, ಈ ನಿವೇಶನದಲ್ಲಿ ಹಳೆಯ ಕಟ್ಟಡವೊಂದಿದ್ದು, ಅದನ್ನು ಸದ್ಯದಲ್ಲೇ ನೆಲಸಮ ಮಾಡಲಾಗುತ್ತದೆ. ವಿಜಯದಶಮಿಯಂದು ಮುಖ್ಯಮಂತ್ರಿ ಹಾಗೂ ನಿರ್ಮಾಪಕರಾದ ಎಚ್‌.ಡಿ. ಕುಮಾರಸ್ವಾಮಿ ಅವರು ಭೂಮಿಪೂಜೆ ನೆರವೇರಿಸಲಿದ್ದಾರೆ.