ಪ್ರಜ್ವಲ್‌ಗೆ ಮೂವರು ನಾಯಕಿಯರ ಸಾಥ್‌

Team Udayavani, Jan 13, 2020, 7:04 AM IST

ಪ್ರಜ್ವಲ್‌ ದೇವರಾಜ್‌ ಅಭಿಯದ ಒಂದೊಂದೇ ಚಿತ್ರಗಳು ಬಿಡುಗಡೆಗೆ ಸಿದ್ಧವಾಗಿವೆ. ಇದರ ಜೊತೆಗೆ ಅವರ ಸಿನಿಮಾಗಳ ಚಿತ್ರೀಕರಣ ಕೂಡಾ ನಡೆಯುತ್ತಿದೆ. ಸದ್ಯ ಪ್ರಜ್ವಲ್‌ ಸದ್ದಿಲ್ಲದಂತೆ ಹೊಸ ಸಿನಿಮಾವೊಂದರ ಚಿತ್ರೀಕರಣದಲ್ಲಿ ಬಿಝಿಯಾಗಿದ್ದಾರೆ. ಅದು ರಾಮ್‌ನಾರಾಯಣ್‌ ನಿರ್ದೇಶನದ ಸಿನಿಮಾ.

ರಾಮ್‌ನಾರಾಯಣ್‌ ನಿರ್ದೇಶನದಲ್ಲಿ ಪ್ರಜ್ವಲ್‌ ಹೊಸ ಸಿನಿಮಾ ಮಾಡುತ್ತಿರುವ ಸುದ್ದಿಯನ್ನು ನೀವು ಕೇಳಿರಬಹುದು. ಆ ಚಿತ್ರಕ್ಕೆ ಇನ್ನೂ ಟೈಟಲ್‌ ಫಿಕ್ಸ್‌ ಆಗಿಲ್ಲ. ಆದರೆ, ಬರೋಬ್ಬರಿ ಮೂವರು ನಾಯಕಿಯರ ಆಯ್ಕೆ ಮಾತ್ರ ಆಗಿದೆ. ಹೌದು, ಪ್ರಜ್ವಲ್‌ಗೆ ಈ ಬಾರಿ ಮೂವರು ನಾಯಕಿಯರು ಸಾಥ್‌ ನೀಡುತ್ತಿದ್ದಾರೆ. ರಾಶ್ರೀ ಪೊನ್ನಪ್ಪ, ಲೇಖಾ ಚಂದ್ರ ಹಾಗೂ ನಿಮಿಕಾ ರತ್ನಾಕರ್‌.

ಈಗಾಗಲೇ ಕನ್ನಡ ಹಲವು ಸಿನಿಮಾಗಳಲ್ಲಿ ನಟಿಸಿರುವ ರಾಶ್ರೀ ಅವರಿಗೂ ಇಲ್ಲಿ ಪ್ರಮುಖ ಪಾತ್ರವಿದೆ, ಉಳಿದಂತೆ ಲೇಖಾ ಚಂದ್ರ ಹಾಗೂ ನಿಮಿಕಾ ಕೂಡಾ ಚಿತ್ರದಲ್ಲಿ ನಾಯಕಿಯರಾಗಿ ನಟಿಸುತ್ತಿದ್ದಾರೆ. ಈಗಾಗಲೇ ರಾಮ್‌ನಾರಾಯಣ್‌ ವಿನೋದ್‌ ಪ್ರಭಾಕರ್‌ಗೆ “ಕ್ರ್ಯಾಕ್‌’ ಸೇರಿದಂತೆ ಕೆಲವು ಸಿನಿಮಾಗಳನ್ನು ಮಾಡಿದ್ದಾರೆ. ಈಗ ಪ್ರಜ್ವಲ್‌ಗೆ ಸಿನಿಮಾ ಮಾಡುತ್ತಿದ್ದು, ಇದೊಂದು ಫ್ಯಾಮಿಲಿ ಎಂಟರ್‌ಟೈನರ್‌ ಸಿನಿಮಾ ಅನ್ನೋದು ರಾಮ್‌ ನಾರಾಯಣ್‌ ಮಾತು.

ಜಂಟಲ್‌ಮನ್‌ ರೀಮೇಕ್‌ಗೆ ಬೇಡಿಕೆ
ಪ್ರಜ್ವಲ್‌ ದೇವರಾಜ್‌ ಅವರ “ಜಂಟಲ್‌ಮನ್‌’ ಚಿತ್ರದ ಟ್ರೇಲರ್‌ ಈಗಾಗಲೇ ಬಿಡುಗಡೆಯಾಗಿ ಮೆಚ್ಚುಗೆ ವ್ಯಕ್ತವಾಗುತ್ತಿದೆ. ಟ್ರೇಲರ್‌ ನೋಡಿದವರು ಸಿನಿಮಾದಲ್ಲಿ ಹೊಸ ಬಗೆಯ ಕಥೆ ಇದೆ ಎನ್ನುತ್ತಿದ್ದಾರೆ. ಈ ಖುಷಿಯ ಜೊತೆಗೆ ಚಿತ್ರತಂಡಕ್ಕೆ ಮತ್ತೂಂದು ಖುಷಿ ಸಿಕ್ಕಿದೆ. ಅದು ಚಿತ್ರದ ರೀಮೇಕ್‌ ಕುರಿತಾದ ಮಾತುಕತೆ.

ಟ್ರೇಲರ್‌ ಹೊರಬಂದ ಬೆನ್ನಲ್ಲೇ ಚಿತ್ರದ ರೀಮೇಕ್‌ಗೆ ಬೇಡಿಕೆ ಬರುತ್ತಿದೆ. ತಮಿಳು, ತೆಲುಗು ಹಾಗೂ ಮಲಯಾಳಂನಿಂದ ಚಿತ್ರದ ರೀಮೇಕ್‌ ಬಗ್ಗೆ ವಿಚಾರಿಸುತ್ತಿದ್ದಾರೆ. ಚಿತ್ರವನ್ನು ತೆಲುಗಿಗೆ ರೀಮೇಕ್‌ ಮಾಡುವ ಕುರಿತು ನಿರ್ಮಾಪಕ ಗುರುದೇಶಪಾಂಡೆ ಜೊತೆ ಸಾಯಿಕುಮಾರ್‌ ವಿಚಾರಿಸಿದರೆ, ತಮಿಳು ನಟ ಸಿಂಬು ಅವರ ಮ್ಯಾನೇಜರ್‌ ಕೂಡಾ ಈ ಬಗ್ಗೆ ಮಾತುಕತೆ ನಡೆಸಿದ್ದಾರಂತೆ.

ಇದರ ಜೊತೆಗೆ ಇನ್ನೊಂದಿಷ್ಟು ಕರೆಗಳು ಕೂಡಾ ಗುರುದೇಶಪಾಂಡೆಯವರಿಗೆ ಬರುತ್ತಿವೆಯಂತೆ. “ಚಿತ್ರದ ಟ್ರೇಲರ್‌ ಬಿಡುಗಡೆಯಾದ ನಂತರ ಚಿತ್ರದ ಬಗೆಗಿನ ನಿರೀಕ್ಷೆ ಹೆಚ್ಚಾಗಿದೆ. ಮೂವರು ಪ್ರಮುಖ ವಿತರಕರು ಚಿತ್ರ ಬಿಡುಗಡೆ ಮಾಡಲು ಮುಂದೆ ಬಂದಿದ್ದು, ಈ ಕುರಿತು ಮಾತುಕತೆಯಾಗುತ್ತಿದೆ’ ಎನ್ನುವುದು ನಿರ್ಮಾಪಕ ಗುರುದೇಶಪಾಂಡೆ ಮಾತು.