Leo: 1 ಗಂಟೆಯೊಳಗೆ ʼಪುಷ್ಪ-2ʼ ವಿನ ಈ ದಾಖಲೆಯನ್ನು ಉಡೀಸ್‌ ಮಾಡಿದ ʼಲಿಯೋʼ ತೆಲುಗು ಪೋಸ್ಟರ್

Team Udayavani, Sep 18, 2023, 3:25 PM IST

ಹೈದರಾಬಾದ್: ದಳಪತಿ ವಿಜಯ್‌ ಅವರ ʼಲಿಯೋʼ ಸಿನಿಮಾ ಮುಂದಿನ ತಿಂಗಳು ರಿಲೀಸ್‌ ಆಗಲಿದೆ. ಅಭಿಮಾನಿಗಳು ಎರಡನೇ ಹಾಡಿನ ರಿಲೀಸ್‌ ಗೆ ಕಾಯುತ್ತಿದ್ದಾರೆ.

ಲೋಕೇಶ್‌ ಕನಕರಾಜ್‌ ಅವರ ʼಲಿಯೋʼ ಹೈಪ್‌ ಹೆಚ್ಚಿಸಲು ಚಿತ್ರತಂಡ ಪೋಸ್ಟರ್‌ ರಿಲೀಸ್‌ ಮಾಡುವ ಯೋಜನೆ ಹಾಕಿಕೊಂಡಿದೆ. ಪ್ಯಾನ್‌ ಇಂಡಿಯಾ ಭಾಷೆಯಲ್ಲಿ ಸಿನಿಮಾದ ಪೋಸ್ಟರ್‌ ಗಳನ್ನು ರಿವೀಲ್‌ ಮಾಡುವ ಪ್ಲ್ಯಾನ್‌ ಹಾಕಿಕೊಂಡಿರುವ ಚಿತ್ರತಂಡ ಮೊದಲ ಹಂತವಾಗಿ ʼಲಿಯೋʼ ತೆಲುಗು ಪೋಸ್ಟರ್‌ ನ್ನು ರಿಲೀಸ್‌ ಮಾಡಿದೆ.

ಭಾನುವಾರ(ಸೆ.17 ರಂದು) ದಳಪತಿ ವಿಜಯ್‌ ಅವರು ಕಾಶ್ಮೀರದಲ್ಲಿ ನಿಂತುಕೊಂಡಿರುವ ಪೋಸ್ಟರ್‌ ರಿಲೀಸ್‌ ಮಾಡಲಾಗಿದ್ದು, ವಿಶೇಷ ಅಂದರೆ ಈ ಪೋಸ್ಟರ್‌ ʼಪುಷ್ಪ-2ʼ ಫಸ್ಟ್‌ ಲುಕ್‌ ಪೋಸ್ಟರ್‌ ನ ದಾಖಲೆಯನ್ನು ಬ್ರೇಕ್‌ ಮಾಡಿದೆ.

ದಳಪತಿ ವಿಜಯ್‌ ಅವರು ತಮ್ಮ ಇನ್ಸ್ಟಾಗ್ರಾಮ್‌ ಖಾತೆ ʼಲಿಯೋʼ ತೆಲುಗು ಪೋಸ್ಟರ್‌ ನ್ನು ಹಂಚಿಕೊಂಡಿದ್ದು, ಈ ಪೋಸ್ಟರ್‌ ಭಾರತೀಯ ಸಿನಿಮಾರಂಗದಲ್ಲೇ ಅತೀ ಕಡಿಮೆ ಸಮಯದಲ್ಲಿ 1 ಮಿಲಿಯನ್‌ ಮೆಚ್ಚುಗೆ ಪಡೆದ ಪೋಸ್ಟರ್‌ ಆಗಿದೆ. ಈ ಹಿಂದೆ ಈ ದಾಖಲೆ ಅಲ್ಲು ಅರ್ಜುನ್‌ ಅವರ ʼಪುಷ್ಪ-2ʼ ಸಿನಿಮಾದ ಫಸ್ಟ್‌ ಲುಕ್‌ ಗೆ ಇತ್ತು.

ಅಲ್ಲು ಅರ್ಜುನ್‌ ಅವರ ʼಪುಷ್ಪ-2ʼ ಸಿನಿಮಾದ ಫಸ್ಟ್‌ ಲುಕ್‌ 33 ನಿಮಿಷದಲ್ಲಿ 1 ಮಿಲಿಯನ್‌ ಲೈಕ್ಸ್‌ ಪಡೆದುಕೊಂಡಿತ್ತು. ʼಲಿಯೋʼ ತೆಲುಗು ಪೋಸ್ಟರ್‌ 32 ನಿಮಿಷದಲ್ಲಿ 1 ಮಿಲಿಯನ್‌ ಗೂ ಅಧಿಕ ಲೈಕ್ಸ್‌ ಪಡೆಯುವ ಮೂಲಕ ಹೊಸ ದಾಖಲೆ ಬರೆದಿದೆ.

ʼಲಿಯೋʼ ಸಿನಿಮಾಕ್ಕೆ ಅನಿರುದ್ಧ್ ರವಿಚಂದರ್‌ ಅವರು ಮ್ಯೂಸಿಕ್ ನೀಡಿದ್ದು, ನಟಿ ತ್ರಿಷಾ ಕೃಷ್ಣನ್‌ 14 ವರ್ಷಗಳ ಬಳಿಕ ವಿಜಯ್‌ ಅವರ ಜೊತೆಯಾಗಿ ನಟಿಸಿದ್ದಾರೆ. ಸಂಜಯ್‌ ದತ್‌ ,ಅರ್ಜುನ್ ಸರ್ಜಾ, ಮಿಸ್ಕಿನ್, ಮನ್ಸೂರ್ ಅಲಿ ಖಾನ್, ಗೌತಮ್ ಮೆನನ್, ಪ್ರಿಯಾ ಆನಂದ್, ಮ್ಯಾಥ್ಯೂ ಥಾಮಸ್, ಸ್ಯಾಂಡಿ ಮಾಸ್ಟರ್ ಮುಂತಾದ ನಟರು ಸಿನಿಮಾದಲ್ಲಿ ನಟಿಸಿದ್ದಾರೆ.

ಇದೇ ಅಕ್ಟೋಬರ್‌ 19 ರಂದು ಸಿನಿಮಾ ತೆರೆಗೆ ಬರಲಿದೆ.‌ ಇನ್ನೊಂದೆಡೆ ಅಲ್ಲು ಅರ್ಜುನ್‌ ಅವರ ʼಪುಷ್ಪ-2ʼ ಸಿನಿಮಾ 2024 ರ ಆಗಸ್ಟ್‌ 15 ರಂದು ರಿಲೀಸ್‌ ಆಗಲಿದೆ.