ಪ್ರಿಯಕರನ ಮೇಲೆ ಬಿಸಿ ನೀರು ಎರಚಿದ ನರ್ಸ್‌! 

Team Udayavani, May 31, 2023, 3:49 PM IST

ಬೆಂಗಳೂರು: ಅಕ್ರಮ ಸಂಬಂಧ ಮುಂದುವರಿಸಲು ನಿರಾಕರಿಸಿದ ಪ್ರಿಯಕರನ ಮುಖದ ಮೇಲೆ ನರ್ಸ್‌ವೊಬ್ಬಳು ಬಿಸಿ ನೀರು ಎರಚಿ ಪರಾರಿಯಾಗಿದ್ದಾಳೆ. ಈ ಸಂಬಂಧ ಕಲಬುರಗಿ ಮೂಲದ ವಿಜಯ್‌ ಶಂಕರ್‌ ಎಂಬಾತ ಅಫ್ಜಲ್ ಪುರ ಮೂಲದ ಜ್ಯೋತಿ ದೊಡ್ಡಮನಿ ವಿರುದ್ಧ ಚಾಮರಾಜಪೇಟೆ ಠಾಣೆಯಲ್ಲಿ ಪ್ರಕರಣ ದಾಖಲಿಸಿದ್ದಾರೆ.

ವಿಜಯ್‌ ಶಂಕರ್‌ ಮತ್ತು ಜ್ಯೋತಿ ಅಫ್ಜಲ್ಪುರದ ಅಕ್ಕ-ಪಕ್ಕದ ಗ್ರಾಮದವರಾಗಿದ್ದು, ನಾಲ್ಕೈದು ವರ್ಷಗಳಿಂದ ಪರಸ್ಪರ ಆತ್ಮೀಯರಾಗಿದ್ದರು. ಎರಡೂವರೆ ವರ್ಷಗಳ ಹಿಂದೆ ವಿಜಯ್‌ ಕುಮಾರ್‌ ಬೆಂಗಳೂರಿಗೆ ಬಂದಿದ್ದು, ಸ್ಟುಡಿಯೋವೊಂದರಲ್ಲಿ ಫೋಟೋ ಎಡಿಟಿಂಗ್‌ ಕೆಲಸ ಮಾಡಿಕೊಂಡಿದ್ದ. ಚಾಮರಾಜಪೇಟೆಯ ಎಂಡಿ ಬ್ಲಾಕ್‌ನಲ್ಲಿ ಬಾಡಿಗೆ ಮನೆಯಲ್ಲಿ ವಾಸವಾಗಿದ್ದ. ಬಳಿಕ ಆಕೆ ಕೂಡ ಬೆಂಗಳೂರಿಗೆ ಬಂದಿದ್ದು, ಹನುಮಂತನಗರದಲ್ಲಿರುವ ಆಸ್ಪತ್ರೆಯಲ್ಲಿ ನರ್ಸ್‌ ಆಗಿ ಕೆಲಸ ಮಾಡುತ್ತಿದ್ದಳು. ವಿಜಯ್‌ ಆಕೆಗೆ ತನ್ನ ಕೋಣೆಯನ್ನು ಬಿಟ್ಟುಕೊಟ್ಟು, ಈತ ಬೇರೆಡೆ ವಾಸವಾಗಿದ್ದ. ಅದರ ಬಾಡಿಗೆ ಈತನೇ ಪಾವತಿಸುತ್ತಿದ್ದ ಕಾರಣ ಆಗಾಗ ಬಂದು ಹೋಗುತ್ತಿದ್ದು, ಸಲುಗೆ ಹೊಂದಿದ್ದ ಎಂದು ಪೊಲೀಸರು ಹೇಳಿದರು.

ಮದುವೆ ವಿಚಾರ ತಿಳಿದು ದೂರ: ಈ ನಡುವೆ ಆರೇಳು ತಿಂಗಳ ಹಿಂದೆ ಜ್ಯೋತಿಗೆ ಮದುವೆಯಾಗಿದೆ ಎಂಬ ವಿಚಾರ ತಿಳಿದ ವಿಜಯ್‌ ಕುಮಾರ್‌ ಆಕೆ ಯಿಂದ ಅಂತರ ಕಾಯ್ದುಕೊಂಡಿದ್ದ. ಅಲ್ಲದೆ, ತಮ್ಮ ಅಕ್ರಮ ಸಂಬಂಧ ಇಲ್ಲಿಗೆ ನಿಲ್ಲಿಸೋಣ. ಮುಂದುವರಿಸುವುದು ಬೇಡ ಎಂದು ಹೇಳಿದ್ದ. ಆದರೆ, ಆಕೆ ನಿರಾಕರಿಸಿದ್ದಳು. ಇತ್ತ ಪೋಷಕರು ನಿಶ್ಚಿಯಿಸಿದ್ದ ರೇಖಾ ಎಂಬಾಕೆ ಜತೆ ಮೇ 11ರಂದು ಮದುವೆಯಾಗಿ ಮೇ 23ರಂದು ಬೆಂಗಳೂರಿಗೆ ಬಂದಿದ್ದ ವಿಜಯ್‌ಗೆ ಕರೆ ಮಾಡಿದ್ದ ಜ್ಯೋತಿ, ಜೂನ್‌ 5ರಂದು ತನ್ನ ಹುಟ್ಟು ಹಬ್ಬವಿದ್ದು, ಎಲ್ಲಾದರೂ ಹೊರಗಡೆ ಹೋಗಲು ಫ್ಲ್ಯಾನ್‌ ಮಾಡೋಣ ಎಂದು ಮನೆಗೆ ಬರುವಂತೆ ಹೇಳಿದ್ದಾಳೆ. ಹೀಗಾಗಿ ಮೇ 25ರಂದು ರಾತ್ರಿ ಜ್ಯೋತಿ ಮನೆಗೆ ಬಂದಿದ್ದ ವಿಜಯ್‌, ಮದುವೆ ಸಂಭ್ರಮ, ಪ್ರಯಾಣದಿಂದ ಆಯಾಸಗೊಂಡಿದ್ದೇನೆ ಎಂದು ಆಕೆಯ ಬಳಿಯೇ ಡ್ರಿಪ್ಸ್‌ ಹಾಕಿಸಿಕೊಂಡ. ಅಲ್ಲಿಂದಲೇ ತಾಯಿ ಹಾಗೂ ಪತ್ನಿಗೆ ಕರೆ ಮಾಡಿ ಮಾತಾಡಿದ್ದ. ಆಗಲೂ ಜ್ಯೋತಿ ತಮ್ಮ ಸಂಬಂಧ ಮುಂದುವರಿಸೋಣ ಎಂದು ಪೀಡಿಸಿದಳು. ಅದಕ್ಕೆ ವಿಜಯ್‌, ಇಬ್ಬರಿಗೂ ಮದುವೆಯಾಗಿದ್ದು, ಬೇಡ ಎಂದು ತಿಳಿ ಹೇಳಿದ್ದ. ಇದರಿಂದ ಕೋಪಗೊಂಡ ಆಕೆ, ಮೇ 26ರಂದು ಮುಂಜಾನೆ 5 ಗಂಟೆ ಸುಮಾರಿಗೆ ಬಿಸಿ ನೀರನ್ನು ವಿಜಯ್‌ ಮುಖಕ್ಕೆ ಎರಚಿದ್ದಾಳೆ. ಆತ ಜೋರಾಗಿ ಕೂಗಿಕೊಂಡಾಗ ಬಾಟಲಿಯಿಂದ ಮುಖಕ್ಕೆ ಹೊಡೆದು ಹೊರಭಾಗದಿಂದ ಬಾಗಿಲು ಹಾಕಿಕೊಂಡು ಪರಾರಿಯಾಗಿದ್ದಳು. ವಿಜಯ್‌ನ ಕಿರುಚಾಟ ಕೇಳಿ ಮನೆ ಮಾಲೀಕರು ಬಂದು ಬಾಗಿಲು ತೆರೆದು ಆಸ್ಪತ್ರೆಗೆ ಕರೆದೊಯ್ದಿದ್ದಾರೆ.

ಚಿಕಿತ್ಸೆ ಪಡೆದ ವಿಜಯ್‌, ಚಾಮರಾಜಪೇಟೆ ಠಾಣೆಗೆ ದೂರು ನೀಡಿದ್ದಾನೆ. ಜ್ಯೋತಿ ಪರಾರಿಯಾಗಿದ್ದು, ಆಕೆಗಾಗಿ ಶೋಧ ಕಾರ್ಯ ನಡೆಯುತ್ತಿದೆ ಎಂದು ಪೊಲೀಸರು ಹೇಳಿದರು.