ಇ-ಖಾತಾ ಆಂದೋಲನಕ್ಕೆ ಚಾಲನೆ

ದೊಡ್ಡಬಳ್ಳಾಪುರ: ಮನೆ ನಿರ್ಮಿಸಲು, ಮನೆ ಅಥವಾ ನಿವೇಶನದ ಹಕ್ಕು ವರ್ಗಾವಣೆ, ಬ್ಯಾಂಕಿನಿಂದ ಸಾಲ ಪಡೆಯುವುದು ಸೇರಿದಂತೆ ಎಲ್ಲದಕ್ಕೂ ಈಗ ಇ-ಖಾತೆ ಕಡ್ಡಾಯವಾಗಿದ್ದು, ನಗರಸಭೆಯಿಂದ ಆರಂಭವಾಗಿರುವ ಇ-ಖಾತಾ ಆಂದೋಲನದಲ್ಲಿ ನಾಗರಿಕರು ಅಗತ್ಯ ದಾಖಲೆಗಳನ್ನು ಹಾಜರುಪಡಿಸಿ ಇ-ಖಾತೆಗಳನ್ನು ಪಡೆಯಬೇಕು ಎಂದು ಶಾಸಕ ಟಿ.ವೆಂಕಟರಮಣಯ್ಯ ಹೇಳಿದರು.

ಅವರು ಗುರುವಾರ ನಗರಸಭೆ ವತಿಯಿಂದ ನಗರದ 14ನೇ ವಾರ್ಡ್‌ ದೇವಲ ಮಹರ್ಷಿ ಶಾಲೆಯಲ್ಲಿ ನಡೆದ ಇ-ಖಾತೆ ಆಂದೋಲದಲ್ಲಿ ಇ-ಖಾತೆಯನ್ನು ಸ್ಥಳದಲ್ಲೇ ವಿತರಿಸಿ ಮಾತನಾಡಿದರು.

ಸಾರ್ವಜನಿಕರು ಮನೆ ನಿರ್ಮಿಸಲು, ಮನೆ ಅಥವಾ ನಿವೇಶನದ ಹಕ್ಕು ವರ್ಗಾವಣೆ, ಬ್ಯಾಂಕಿನಿಂದ ಸಾಲ ಪಡೆಯುವುದು ಸೇರಿದಂತೆ ಎಲ್ಲದಕ್ಕೂ ಈಗ ಇ-ಖಾತೆ ಕಡ್ಡಾಯವಾಗಿವೆ. ನಗರಸಭೆ ವ್ಯಾಪ್ತಿಯಲ್ಲಿನ ಎಲ್ಲ ಕಂದಾಯ ದಾಖಲೆಗಳು ಡಿಜಿಟಲೀಕರಣವಾಗಿವೆ. ಯಾವುದೇ ಸ್ವತ್ತನ್ನು ಮಾಲೀಕರಿಗೆ ತಿಳಿಯದಂತೆ ಮಾರಾಟ ಮಾಡಲು ಸಾಧ್ಯವೇ ಇಲ್ಲ. ಹೀಗಾಗಿ ಎಲ್ಲರು ಇ-ಖಾತೆಗಳಿಗೆ ಅರ್ಜಿ ಸಲ್ಲಿಸಿ ಇ-ಖಾತೆಗಳನ್ನು ಮಾಡಿಸಿಕೊಳ್ಳಬೇಕು. ಸರ್ಕಾರಿ ರಜಾ ದಿನ ಹೊರತುಪಡಿಸಿ ಪ್ರತಿದಿನ ಬೆಳಗ್ಗೆ 10 ರಿಂದ ಸಂಜೆ 4 ಗಂಟೆವರೆಗೆ ನಡೆಯಲಿದೆ ಎಂದರು.

ಇ-ಖಾತಾ ಕುರಿತು ಮಾಹಿತಿ ನೀಡಿದ ನಗರಸಭೆ ಪೌರಾಯುಕ್ತ ಆರ್‌.ಮಂಜುನಾಥ್‌ ಆಸ್ತಿ ಹಾಗೂ ಮಾಲೀಕರ ಭಾವ ಚಿತ್ರದ ಸಮೇತ ಆಧಾರ್‌ ಸಂಖ್ಯೆಯೊಂದಿಗೆ ಎಲ್ಲವೂ ಇ-ಖಾತಾ ಪತ್ರದಲ್ಲಿ ಇರಲಿವೆ. ಆಸ್ತಿ ಪರಭಾರೆಗೆ ಉಪನೋಂದಣಿ ಕಚೇರಿಗೆ ಹೋದರೆ ಅಲ್ಲಿ ಮಾಲೀಕರ ಭಾವಚಿತ್ರ ಸಮೇತ ಎಲ್ಲ ಮಾಹಿತಿಯು ಬರಲಿದೆ. ನಗರದಲ್ಲಿ ಇ-ಖಾತೆಗೆ ಹೆಚ್ಚು ಜನ ಅರ್ಜಿಗಳನ್ನು ಸಲ್ಲಿಸುತ್ತಿದ್ದಾರೆ. ಆದರೆ ಸೂಕ್ತ ದಾಖಲೆಗಳು, ಸಿಬ್ಬಂದಿಗೆ ಕಾರ್ಯಾಭಾರದ ಒತ್ತಡದಿಂದಾಗಿ ಸಾರ್ವಜನಿಕರಿಗೆ ಸಕಾಲದಲ್ಲಿ ಇ-ಖಾತೆಗಳನ್ನು ನೀಡುವುದು ವಿಳಂಭವಾಗುತಿತ್ತು.

ಇದನ್ನು ಮನಗೊಂಡ ಜಿಲ್ಲಾಧಿಕಾರಿಗಳು ಹಾಗೂ ನಗರಸಭೆ ಆಡಳಿತಾಧಿಕಾರಿ ಕರೀಗೌಡ ಅವರ ಆದೇಶದ ಮೇರೆಗೆ ಪ್ರತಿ ವಾರ್ಡ್‌ಗಳಲ್ಲಿಯೂ ಇ-ಖಾತೆ ಆಂದೋಲನವನ್ನು ಹಮ್ಮಿಕೊಳ್ಳಲಾಗಿದೆ. 2019-20ನೇ ಸಾಲಿನ ನೀರು, ನಿವೇಶನ ಕಂದಯ ಪಾವತಿ ಸೇರಿದಂತೆ ಅಗತ್ಯ ದಾಖಲಾತಿಗಳ ಮಾಹಿತಿಯನ್ನು ಒಳಗೊಂಡ ಕರ ಪತ್ರವನ್ನು ಮುದ್ರಿಸಿ ಹಂಚಿಕೆ ಮಾಡಲಾಗಿದೆ. ಅರ್ಜಿ ಸಲ್ಲಿಸಿದ ಒಂದು ಗಂಟೆಯಲ್ಲೇ ಇ-ಖಾತಾ ಪತ್ರವನ್ನು ಸ್ಥಳದಲ್ಲೇ ವಿತರಿಸಲಾಗುತ್ತಿದೆ ಎಂದರು.

ನಗರ ವಾಸದ ಹಾಗೂ ವಾಣಿಜ್ಯ ಸೇರಿ ಒಟ್ಟು 17,739 ಅಸ್ತಿಗಳಿವೆ. ಇವುಗಳ ಪೈಕಿ ಇಲ್ಲಿಯವರೆಗೆ 4,000 ಆಸ್ತಿಗಳಿಗೆ ಮಾತ್ರ ಇ-ಖಾತೆಗಳಾಗಿವೆ. ಮೊದಲ ದಿನ ಇ-ಖಾತೆಗೆ 35 ಜನ ಅರ್ಜಿಗಳನ್ನು ಪಡೆದಿದ್ದಾರೆ. ಶುಕ್ರವಾರ15 ನೇ ವಾರ್ಡ್‌ ಇ-ಖಾತಾ ಆಂದೋಲನವು ಸಹ ದೇವಲ ಮಹರ್ಷಿ ಶಾಲೆಯಲ್ಲಿಯೇ ಬೆಳಿಗ್ಗೆ 10 ರಿಂದ ಸಂಜೆ 4 ಗಂಟೆವರೆಗೂ ನಡೆಯಲಿದೆ. ಉಳಿದ ವಾಡ್ಗರ್ಳಲ್ಲಿ ಯಾವ ದಿನಾಂಕ, ಸ್ಥಳ, ಸಮಯವನ್ನು ಕರಪತ್ರದ ಮೂಲಕ ಹಂಚಿಕೆ ಮಾಡಲಾಗಿದೆ ಎಂದು ತಿಳಿಸಿದರು.