ದ.ಕ., ಉಡುಪಿಗೆ ಇಂದು ಲಸಿಕೆ

Team Udayavani, Jan 14, 2021, 1:48 AM IST

ಮಂಗಳೂರು/ಉಡುಪಿ: ದಕ್ಷಿಣ ಕನ್ನಡ ಮತ್ತು ಉಡುಪಿ ಜಿಲ್ಲೆಗಳಿಗೆ ಇಂದು ಕೋವಿಡ್ ಲಸಿಕೆ ಬರಲಿದ್ದು, ಸಂಗ್ರಹಣೆಗೆ ಮತ್ತು ಹಂಚಿಕೆಗೆ ಜಿಲ್ಲಾಡಳಿತ, ಆರೋಗ್ಯ ಇಲಾಖೆ ಈಗಾಗಲೇ ಎಲ್ಲ ರೀತಿಯ ಸಿದ್ಧತೆಗಳನ್ನು ಮಾಡಿವೆ.

ದಕ್ಷಿಣ ಕನ್ನಡ ಜಿಲ್ಲೆಯಲ್ಲಿ ವೆನ್ಲಾಕ್‌ ಆಸ್ಪತ್ರೆಗೆ ಗುರುವಾರ ಲಸಿಕೆ ಬರಲಿದ್ದು, ಇಲ್ಲಿನ ವ್ಯಾಕ್ಸಿನ್‌ ಸ್ಟೋರೇಜ್‌ನಲ್ಲಿ ಇಡಲಾಗುತ್ತದೆ. ಆ ಬಳಿಕ ತಾಲೂಕು ಹಾಗೂ ನಿಗದಿ ಪಡಿಸಿದ ಕೇಂದ್ರಗಳಿಗೆ ಲಸಿಕೆ ಸಾಗಾಟ ಕಾರ್ಯ ನಡೆಯಲಿದೆ. ಜ.16ರಂದು ದಕ್ಷಿಣ ಕನ್ನಡ ಜಿಲ್ಲೆಯ 6 ಕೇಂದ್ರಗಳಲ್ಲಿ ಲಸಿಕೆ ನೀಡಲು ನಿರ್ಧರಿಸ ಲಾಗಿದೆ. ಮಂಗಳೂರಿನ ವೆನ್ಲಾಕ್‌ ಆಸ್ಪತ್ರೆ, ಬಂಟ್ವಾಳ, ಸುಳ್ಯ, ಬೆಳ್ತಂಗಡಿ, ಪುತ್ತೂರು ತಾಲೂಕು ಆರೋಗ್ಯ ಕೇಂದ್ರ, ಸುರತ್ಕಲ್‌ನ ನಗರ ಪ್ರಾಥಮಿಕ ಆರೋಗ್ಯ ಕೇಂದ್ರದಲ್ಲಿ ಲಸಿಕೆ ನೀಡಲು ತೀರ್ಮಾನಿಸಲಾಗಿದೆ.

ಕೊಚ್ಚಿಗೆ ತಲುಪಿದ 3 ಲಕ್ಷ ಡೋಸ್‌ ಲಸಿಕೆ : 

ಕಾಸರಗೋಡು: ಮೊದಲ ಹಂತದಲ್ಲಿ ವಿತರಿಸುವ ನಿಟ್ಟಿನಲ್ಲಿ ಕೇರಳಕ್ಕೆ ಕೋವಿಡ್

ಲಸಿಕೆ ಬುಧವಾರ ತಲುಪಿದೆ. ನೆಡುಂಬಾಶ್ವರಿ ವಿಮಾನ ನಿಲ್ದಾಣದಿಂದ ವ್ಯಾಕ್ಸಿನ್‌ ಶೀತಲೀಕರಣ ವ್ಯವಸ್ಥೆಯಿರುವ ಪ್ರತ್ಯೇಕ ವಾಹನದಲ್ಲಿ ಕೊಚ್ಚಿ ರೀಜನಲ್‌ ಸ್ಟೋರ್‌ನಲ್ಲಿ ಸಂಗ್ರಹಿಸಿಡಲಾಯಿತು. ವಿತರಣೆಯ ದಿನಾಂಕ ನಿರ್ಧಾರವಾಗಬೇಕಿದೆ.