ಕುಣಿಗಲ್ ನಲ್ಲಿ ಮತ್ತೆ ಹೆಜ್ಜೇನು ದಾಳಿ; ರೈತನಿಗೆ ಗಾಯ, ಎತ್ತುಗಳ ಸ್ಥಿತಿ ಗಂಭೀರ

Team Udayavani, Jan 8, 2023, 8:49 PM IST

ಕುಣಿಗಲ್ : ಕುಣಿಗಲ್‌ನ ಸ್ಟಡ್ ಫಾರಂನಲ್ಲಿ ಹೆಜ್ಜೇನು ದಾಳಿ ನಡೆಸಿ ಕೋಟ್ಯಾಂತರೂ ಬೆಲೆ ಬಾಳುವ ಎರಡು ಗಂಡು ಕುದುರೇಗಳು ಮೃತಪಟ್ಟ ಮಾಸುವ ಮುನ್ನವೇ ಮತ್ತೋಂದು ಘಟನೆ ಹುಲಿಯೂರುದುರ್ಗ ಹೋಬಳಿ ಕೆಬ್ಬಳಿ ಗ್ರಾಮದಲ್ಲಿ ನಡೆದಿದ್ದು ಎತ್ತಿನಗಾಡಿಯಲ್ಲಿ ಹುರುಳಿಕಾಯಿ ತರುತ್ತಿದ್ದ ರೈತ ಹಾಗೂ ಎತ್ತುಗಳ ಮೇಲೆ ದಾಳಿ ನಡೆಸಿದ ಹೆಜ್ಜೇನು ತೀವ್ರವಾಗಿ ಗಾಯಗೊಳಿಸಿವೆ. ರೈತ ರಮೇಶ್ (45) ಹಾಗೂ ಎತ್ತುಗಳು ಗಾಯಗೊಂಡಿವೆ.

ಘಟನೆ ವಿವರ
ಭಾನುವಾರ ಬೆಳಗ್ಗೆ 11 ರ ಸಮಯದಲ್ಲಿ ರೈತ ರಮೇಶನ್ನು ತಮ್ಮ ಹೊಲದಲ್ಲಿ ಕಟಾವು ಮಾಡಿ ಹಾಕಿದ್ದ ಹುರುಳಿಕಾಯಿಯನ್ನು ಎತ್ತಿನ ಗಾಡಿಯಲ್ಲಿ ತುಂಬಿಕೊಂಡು ಕಣಕ್ಕೆ ಹಾಕಲು ತರುತ್ತಿರ ಬೇಕಾದರೆ ದಾರಿ ಮಧ್ಯದಲ್ಲಿ ಹೆಜ್ಜೇನುಗಳು ದಾಳಿ ನಡೆಸಿವೆ, ದಾಳಿಯಲ್ಲಿ ರಮೇಶ್ ಹಾಗೂ ಎತ್ತುಗಳು ಗಾಯಗೊಂಡು ನೆಲಕ್ಕೆ ಬಿದ್ದು ಒದ್ದಾಡುತ್ತಿದ್ದವು. ಸಮೀಪದ ಜಮೀನಲ್ಲಿ ಕೆಲಸ ಮಾಡುತ್ತಿದ್ದ ರಮೇಶ್ ಅತ್ತಿಗೆ ಸರೋಜಮ್ಮ ಓಡಿ ಬಂದು ಅಕ್ಕ ಪಕ್ಕದ ರೈತರನ್ನು ಕರೆದು ಕಂಬಳಿ ತಂದು ರಮೇಶ ಅವರ ಮೇಲೆ ಹೊಚ್ಚಿದ್ದಾರೆ. ಬಳಿಕ ಎತ್ತಿನ ಕೊರಳಲ್ಲಿ ಇದ್ದ ಹಗ್ಗವನ್ನು ಕೊಯ್ದಿದ್ದಾರೆ, ಬಳಿಕ ಗಾಯಗೊಂಡ ರಮೇಶನನ್ನು ಹುಲಿಯೂರುದುರ್ಗ ಸರ್ಕಾರಿ ಆಸ್ಪತ್ರೆಯಲ್ಲಿ ಚಿಕಿತ್ಸೆ ಕೊಡಿಸಿದ್ದಾರೆ. ಎತ್ತುಗಳಿಗೆ ಪಶು ಆಸ್ಪತ್ರೆಯಲ್ಲಿ ಚಿಕಿತ್ಸೆ ಕೊಡಿಸಿ ಚುಚ್ಚಿಕೊಂಡಿದ್ದ ಜೇನು ಹುಳುವಿನ ಮುಳ್ಳನ್ನು ವೈದ್ಯರು ತೆಗೆದಿದ್ದಾರೆ. ಎತ್ತುಗಳ ಪರಿಸ್ಥಿತಿ ಗಂಭೀರವಾಗಿದೆ.