ಗುರುವಾಯನಕೆರೆ-ಉಪ್ಪಿನಂಗಡಿ ರಸ್ತೆ : ಅಧಿಕಾರಿಗಳಿಂದ ಪರಿಶೀಲನೆ

Team Udayavani, Feb 14, 2021, 5:00 AM IST

ಬೆಳ್ತಂಗಡಿ: ಬೆಳ್ತ‌ಂಗಡಿ ಭಾಗದಿಂದ ಉಪ್ಪಿನಂಗಡಿ, ಪುತ್ತೂರು ಸಂಪರ್ಕಿಸುವ ಗುರುವಾಯನಕೆರೆ- ಉಪ್ಪಿನಂಗಡಿ ಮುಖ್ಯ ರಸ್ತೆಯ ಹಲೇಜಿ ಸಮೀಪ ರಸ್ತೆ ಅಂಚಿನ ತಡೆಗೋಡೆ ಕುಸಿತ ಸ್ಥಳಕ್ಕೆ ಶನಿವಾರ ಲೋಕೋಪಯೋಗಿ ಇಲಾಖೆ ಅಧಿಕಾರಿಗಳು ಭೇಟಿ ನೀಡಿ ಪರಿಶೀಲನೆ ನಡೆಸಿದರು.

ಮುಖ್ಯ ರಸ್ತೆಯ ಹಲೇಜಿ ಸಮೀಪ ಸುಮಾರು 30 ಮೀ.ನಷ್ಟು ತಡೆಗೋಡೆ ಕುಸಿತ ಉಂಟಾಗಿ ಅಪಾಯ ಎದುರಾಗಿರುವುದನ್ನು ಉದಯವಾಣಿ ಸುದಿನದಲ್ಲಿ ಫೆ.13ರಂದು ವರದಿ ಪ್ರಕಟಿಸಲಾಗಿತ್ತು. ಸ್ಪಂದಿಸಿದ ಅಧಿಕಾರಿಗಳು ಸ್ಥಳಕ್ಕೆ ಭೇಟಿ ನೀಡಿದ್ದಾರೆ.

ಕುಸಿತ ಪ್ರದೇಶದಲ್ಲಿ 5 ಮೀ. ಎತ್ತರ, 30 ಮೀಟರ್‌ ಉದ್ದ ರಿಟೇನಿಂಗ್‌ ವಾಲ್‌ ನಿರ್ಮಾಣದ ಆವಶ್ಯಕತೆ ಇದೆ. ಅಂದಾಜು 30 ಲಕ್ಷ ರೂ. ವೆಚ್ಚವಿರುವುದರಿಂದ ಲೋಕೋ ಪಯೋಗಿ ಇಲಾಖೆಯಿಂದ ತುರ್ತಾಗಿ 10 ಮೀಟರ್‌ ಉದ್ದ ರಿಟೇನಿಂಗ್‌ ವಾಲ್‌ ನಿರ್ಮಾಣಕ್ಕೆ ವರದಿ ನೀಡಲಾಗುವುದು ಎಂದು ಲೋಕೋಪಯೋಗಿ ಇಲಾಖೆ ಬೆಳ್ತಂಗಡಿ ವಿಭಾಗ ಎಇಇ ಶಿವಪ್ರಸಾದ್‌ ತಿಳಿಸಿದ್ದಾರೆ. ಜೆಇ ತೌಸಿಫ್‌, ಸುಶೃತ್‌ ಜೈನ್‌ ಉಪಸ್ಥಿತರಿದ್ದರು.