ಕಾರು ಅಪಘಾತ: ಜನಪ್ರಿಯ ನಟಿ ಊರ್ವಶಿ ಧೋಲಾಕಿಯಾ ಪಾರು

Team Udayavani, Feb 5, 2023, 2:51 PM IST

ಮುಂಬಯಿ: ನಗರಕ್ಕೆ ಹೊಂದಿಕೊಂಡಿರುವ ಥಾಣೆ ಜಿಲ್ಲೆಯಲ್ಲಿ ಜನಪ್ರಿಯ ಕಿರುತೆರೆ ನಟಿ ಊರ್ವಶಿ ಧೋಲಾಕಿಯಾ ಅವರ ಕಾರು ಅಪಘಾತಕ್ಕೀಡಾಗಿದೆ, ಆದರೆ ಅವರಿಗೆ ಯಾವುದೇ ಗಾಯವಾಗಿಲ್ಲ ಎಂದು ಪೊಲೀಸ್ ಅಧಿಕಾರಿಯೊಬ್ಬರು ಭಾನುವಾರ ತಿಳಿಸಿದ್ದಾರೆ.

ಕಾಶಿಮಿರಾ ಪ್ರದೇಶದಲ್ಲಿ ಶನಿವಾರ ಈ ಅಪಘಾತ ಸಂಭವಿಸಿದ್ದು, ಶೂಟಿಂಗ್‌ಗಾಗಿ ಮೀರಾ ರೋಡ್ ಪ್ರದೇಶದ ಸ್ಟುಡಿಯೊಗೆ ತೆರಳುತ್ತಿದ್ದಾಗ ಮಕ್ಕಳನ್ನು ಕರೆದೊಯ್ಯುತ್ತಿದ್ದ ಶಾಲಾ ಬಸ್ ಹಿಂದಿನಿಂದ ನಟಿಯ ಕಾರಿಗೆ ಢಿಕ್ಕಿ ಹೊಡೆದಿದೆ ಎಂದು ಅಧಿಕಾರಿ ತಿಳಿಸಿದ್ದಾರೆ.

ಬಸ್ ಚಾಲಕನ ವಿರುದ್ಧ ಧೋಲಾಕಿಯಾ ಯಾವುದೇ ದೂರು ದಾಖಲಿಸಿಲ್ಲ. ಆದಾಗ್ಯೂ, ಸ್ಥಳೀಯ ಪೊಲೀಸರು ಬಸ್ ಚಾಲಕನ ಎಲ್ಲಾ ವಿವರಗಳನ್ನು ತೆಗೆದುಕೊಂಡಿದ್ದಾರೆ ಎಂದು ಅಧಿಕಾರಿ ಹೇಳಿದ್ದಾರೆ.

ರಿಯಾಲಿಟಿ ಶೋ “ಬಿಗ್ ಬಾಸ್” ನ ಆರನೇ ಸೀಸನ್ ಅನ್ನು ನಟಿ ಗೆದ್ದಿದ್ದರು. ದೂರದರ್ಶನದ ಧಾರಾವಾಹಿ ‘ಕಸೌತಿ ಜಿಂದಗಿ ಕೇ’ನಲ್ಲಿನ ಪಾತ್ರಕ್ಕಾಗಿಯೂ ಅವರು ಖ್ಯಾತಿಯಾಗಿದ್ದಾರೆ.