ಬಿಗ್ ಬಾಶ್ ಟಿ20 ಲೀಗ್ : ಕಿರೀಟ ಉಳಿಸಿಕೊಂಡು ಮೆರೆದ ಸಿಡ್ನಿ ಸಿಕ್ಸರ್
Team Udayavani, Feb 6, 2021, 11:40 PM IST
ಸಿಡ್ನಿ: ಮೊಸಸ್ ಹೆನ್ರಿಕ್ಸ್ ಸಾರಥ್ಯದ ಸಿಡ್ನಿ ಸಿಕ್ಸರ್ ಸತತ ಎರಡನೇ ಬಾರಿಗೆ “ಬಿಗ್ ಬಾಶ್ ಟಿ20 ಲೀಗ್’ ಚಾಂಪಿಯನ್ ಕಿರೀಟವನ್ನು ಏರಿಸಿಕೊಂಡಿದೆ. ರವಿವಾರದ ಫೈನಲ್ನಲ್ಲಿ ಅದು ಪರ್ತ್ ಸ್ಕಾರ್ಚರ್ ವಿರುದ್ಧ 27 ರನ್ನುಗಳ ಜಯ ಸಾಧಿಸಿತು.
ಮೊದಲು ಬ್ಯಾಟಿಂಗಿಗೆ ಇಳಿಸಲ್ಪಟ್ಟ ಸಿಡ್ನಿ ಸಿಕ್ಸರ್ ಆರಂಭಕಾರ ಜೇಮ್ಸ್ ವಿನ್ಸ್ ಅವರ ಅಮೋಘ 95 ರನ್ ಪರಾಕ್ರಮದಿಂದ 6 ವಿಕೆಟಿಗೆ 188 ರನ್ ಪೇರಿಸಿ ಸವಾಲೊಡ್ಡಿತು. ಜವಾಬಿತ್ತ ಪರ್ತ್ ಸ್ಕಾರ್ಚರ್ 9 ವಿಕೆಟಿಗೆ 161 ರನ್ ಗಳಿಸಿ ಶರಣಾಯಿತು.
ಇದು ಸಿಡ್ನಿ ಸಿಕ್ಸರ್ಗೆ ಒಲಿದ 3ನೇ ಬಿಗ್ ಬಾಶ್ ಪ್ರಶಸ್ತಿ. ಅದು 2011-12ರ ಮೊದಲ ಆವೃತ್ತಿಯಲ್ಲೇ ಚಾಂಪಿಯನ್ ಆಗಿ ಹೊರಹೊಮ್ಮಿತ್ತು. ಕಳೆದ ಸಲದ ಫೈನಲ್ನಲ್ಲಿ ಮೆಲ್ಬರ್ನ್ ಸ್ಟಾರ್ ವಿರುದ್ಧ 19 ರನ್ನುಗಳಿಂದ ಗೆದ್ದು ಬಂದಿತ್ತು.
ವಿನ್ಸ್ ಗೆಲುವಿನ ರೂವಾರಿ
16ನೇ ಓವರ್ ತನಕ ಕ್ರೀಸಿಗೆ ಅಂಟಿಕೊಂಡ ಜೇಮ್ಸ್ ವಿನ್ಸ್ ಮುಂದೆ ಶತಕ ಬಾರಿಸುವ ಉತ್ತಮ ಅವಕಾಶ ವೊಂದಿತ್ತು. ಆದರೆ ಐದೇ ರನ್ನಿನಿಂದ ಇದನ್ನು ಕಳೆದು ಕೊಂಡರು. 60 ಎಸೆತ ಎದುರಿಸಿದ ವಿನ್ಸ್ 10 ಬೌಂಡರಿ ಹಾಗೂ 3 ಸಿಕ್ಸರ್ ಸಿಡಿಸಿ ಸಿಡ್ನಿಯ ದೊಡ್ಡ ಮೊತ್ತಕ್ಕೆ ಕಾರಣರಾದರು. ವಿನ್ಸ್ ಹೊರತುಪಡಿಸಿದರೆ 20 ರನ್ ಮಾಡಿದ ಡೇನಿಯಲ್ ಕ್ರಿಸ್ಟಿಯನ್ ಅವರದೇ ಹೆಚ್ಚಿನ ಗಳಿಕೆ.
ಪರ್ತ್ ತಂಡದ ಚೇಸಿಂಗ್ ಭರ್ಜರಿ ಯಾಗಿಯೇ ಇತ್ತು. ಆರಂಭಿಕರಾದ ಲಿಯಮ್ ಲಿವಿಂಗ್ಸ್ಟೋನ್ (45) ಮತ್ತು ಕ್ಯಾಮರಾನ್ ಬಾನ್ಕ್ರಾಫ್ಟ್ (30) ಓವರಿಗೆ ಹತ್ತರ ಸರಾಸರಿಯಲ್ಲಿ ರನ್ ಪೇರಿಸುತ್ತ ಸಾಗಿದರು. 4.5 ಓವರ್ಗಳಿಂದ 45 ರನ್ ಬಾರಿಸಿದರು. ಆದರೆ ಈ ಜೋಡಿ ಬೇರ್ಪಟ್ಟ ಬಳಿಕ ಸಿಡ್ನಿ ಬೌಲರ್ ಸಂಪೂರ್ಣ ಮೇಲುಗೈ ಸಾಧಿಸಿದರು.
ಬೆನ್ ಡ್ವಾರ್ಶಿಯಸ್ 3, ಜಾಕ್ಸನ್ ಬರ್ಡ್, ಸೀನ್ ಅಬೋಟ್ ಮತ್ತು ಡೇನಿಯಲ್ ಕ್ರಿಸ್ಟಿಯನ್ ತಲಾ 2 ವಿಕೆಟ್ ಉರುಳಿಸಿ ಸಿಡ್ನಿ ಸಿಕ್ಸರ್ ಗೆಲುವು ಸಾರಿದರು.
ಸಂಕ್ಷಿಪ್ತ ಸ್ಕೋರ್
ಸಿಡ್ನಿ ಸಿಕ್ಸರ್-6 ವಿಕೆಟಿಗೆ 188 (ವಿನ್ಸ್ 95, ಕ್ರಿಸ್ಟಿಯನ್ 20, ಸಿಲ್ಕ್ ಔಟಾಗದೆ 17, ಟೈ 29ಕ್ಕೆ 2, ರಿಚರ್ಡ್
ಸನ್ 45ಕ್ಕೆ 2). ಪರ್ತ್ ಸ್ಕಾರ್ಚರ್-9 ವಿಕೆಟಿಗೆ 161 (ಲಿವಿಂಗ್ಸ್ಟೋನ್ 45, ಬಾನ್ಕ್ರಾಫ್ಟ್ 30, ಹಾರ್ಡಿ 26, ಡ್ವಾ ರ್ಶಿಯಸ್ 37ಕ್ಕೆ 3, ಬರ್ಡ್ 14ಕ್ಕೆ 2, ಕ್ರಿಸ್ಟಿಯನ್ 25ಕ್ಕೆ 2).
ಪಂದ್ಯಶ್ರೇಷ್ಠ: ಜೇಮ್ಸ್ ವಿನ್ಸ್. ಸರಣಿಶ್ರೇಷ್ಠ: ಜೋಶ್ ಫಿಲಿಪ್.