Indian Railways: ಜನರಲ್‌ ಕೋಚ್‌ ಪ್ರಯಾಣಿಕರಿಗೂ ಕೈಗೆಟಕುವ ದರಲ್ಲಿ ಊಟ

Team Udayavani, Jul 20, 2023, 7:08 AM IST

ನವದೆಹಲಿ: ರೈಲಿನಲ್ಲಿ ಜನರಲ್‌ ಕೋಚ್‌ಗಳಲ್ಲಿ ಪ್ರಯಾಣಿಸುವವರ ಬಗ್ಗೆ ಭಾರತೀಯ ರೈಲ್ವೆ ವಿಶೇಷ ಕಾಳಜಿ ವಹಿಸಿದ್ದು, ಅಂಥ ಪ್ರಯಾಣಿಕರಿಗೂ ಕೈಗೆಟುಕುವ ದರದಲ್ಲಿ ಆಹಾರ- ನೀರು ಪೂರೈಕೆ ಮಾಡಲು ಹೆಜ್ಜೆಯನ್ನಿಟ್ಟಿದೆ. ಸಾಮಾನ್ಯವಾಗಿ ರೈಲಿನ ಹಿಂಭಾಗ ಅಥವಾ ಮುಂಭಾಗದಲ್ಲಿರುವ ಕೋಚ್‌ಗಳಿಗೆ ಸಮೀಪವಾಗುವಂತೆ ರೈಲ್ವೆ ನಿಲ್ದಾಣದಲ್ಲಿ ವಿಶೇಷ ಕೌಂಟರ್‌ಗಳನ್ನು ತೆರೆದು ಊಟ ಒದಗಿಸಲು ಮುಂದಾಗಿದೆ.

ಇಂಥ ಕೌಂಟರ್‌ಗಳಲ್ಲಿ 2 ರೀತಿಯ ಊಟ ಲಭ್ಯವಿದ್ದು, 20 ರೂ.ಗಳಿಗೆ 7 ಪೂರಿ, ಆಲೂಪಲ್ಯ ಹಾಗೂ ಉಪ್ಪಿನಕಾಯಿ ನೀಡಿದರೆ, 50ರೂ.ಗಳಿಗೆ ದಕ್ಷಿಣ ಭಾರತದ ತಿನಿಸುಗಳಾದ ಅನ್ನ, ರಾಜ್ಮಾ, ಚೋಲೆ ಭಟೂರೆ,ಕಿಚಡಿ, ಕುಲ್ಚೆ, ಪಾವ್‌-ಬಾಜಿ ಹಾಗೂ ಮಸಾಲೆ ದೋಸೆಯಂಥ ತಿನಿಸು ಒದಗಿಸಲಾಗುತ್ತದೆ. ಈಗಾಗಲೇ 51 ರೈಲ್ವೆ ನಿಲ್ದಾಣಗಳಲ್ಲಿ ಇಂಥ ಜನರಲ್‌ ಕೋಚ್‌ ಊಟದ ಕೌಂಟರ್‌ಗಳಿದ್ದು, ಗುರುವಾರದ ವೇಳೆ ಇನ್ನೂ 13 ನಿಲ್ದಾಣಗಳಲ್ಲೂ ಕೌಂಟರ್‌ ಆರಂಭಗೊಳ್ಳಲಿದೆ ಎಂದು ಅಧಿಕಾರಿಗಳು ತಿಳಿಸಿದ್ದಾರೆ.