ಪಶ್ಚಿಮ ಬಂಗಾಳ ಪಂಚಾಯ್ತಿ: TMC ಭಾರೀ ಜಯಭೇರಿ

Team Udayavani, Jul 13, 2023, 7:11 AM IST

ಕೋಲ್ಕತ: ಗಲಭೆಪೀಡಿತ ಪಶ್ಚಿಮ ಬಂಗಾಳದಲ್ಲಿ ಇತ್ತೀಚೆಗೆ ನಡೆದಿದ್ದ ಗ್ರಾಮ ಪಂಚಾಯ್ತಿ ಚುನಾವಣೆಯ ಫ‌ಲಿತಾಂಶ ಹೊರಬಿದ್ದಿದ್ದು, ಗ್ರಾಮಾಂತರ ಸ್ಥಳೀಯಾಡಳಿತದ ಎಲ್ಲಾ ಮೂರು ಹಂತಗಳಲ್ಲಿ ತೃಣಮೂಲ ಕಾಂಗ್ರೆಸ್‌ ಬಹುಮತ ಪಡೆದು, ಜಯಸಾಧಿಸಿದೆ. 3,317 ಗ್ರಾಮ ಪಂಚಾಯ್ತಿಗಳ ಪೈಕಿ 2,552 ಗ್ರಾಮ ಪಂಚಾಯ್ತಿಗಳಲ್ಲಿ ಟಿಎಂಸಿ ಗೆಲುವು ಸಾಧಿಸಿದೆ. ಜತೆಗೆ 20 ಜಿಲ್ಲಾ ಪರಿಷತ್‌ಗಳ ಪೈಕಿ 12ರಲ್ಲಿ ಹಾಗೂ 232 ಪಂಚಾಯ್ತಿ ಸಮಿತಿಯಲ್ಲಿ ಟಿಎಂಸಿ ಜಯಭೇರಿ ಬಾರಿಸಿದೆ.

ಕೇವಲ 212 ಗ್ರಾ.ಪಂ.­ಗಳು ಹಾಗೂ 7 ಪಂಚಾಯ್ತಿ ಸಮಿತಿಗಳಲ್ಲಿ ಮಾತ್ರ ಬಿಜೆಪಿ ಗೆದ್ದಿದ್ದು, ಜಿಲ್ಲಾ ಪರಿಷತ್‌ ಸ್ಥಾನಗಳಲ್ಲಿ ಯಾವುದೇ ಗೆಲುವು ವರದಿಯಾಗಿಲ್ಲ. ಕೆಲವು ಸ್ಥಾನಗಳ ಫ‌ಲಿತಾಂಶ ಬುಧವಾರ ಸಂಜೆ ವೇಳೆಗೂ ಪ್ರಕಟವಾಗಿರಲಿಲ್ಲ. ಟಿಎಂಸಿ ಗೆಲುವಿನ ಕುರಿತು ಸಿಎಂ ಮಮತಾ ಬ್ಯಾನರ್ಜಿ ಜಾಲತಾಣದಲ್ಲಿ ಜನತೆಗೆ ಧನ್ಯವಾದ ಸಲ್ಲಿಸಿದ್ದಾರೆ. ಗ್ರಾಮೀಣ ಬಂಗಾಳ ಸಂಪೂರ್ಣ ಟಿಎಂಸಿ ಮಯವಾಗಿದೆ, ಜನರ ಮನಸ್ಸಿನಲ್ಲಿ ಟಿಎಂಸಿ ಮಾತ್ರವಿದೆ ಎಂಬುದಕ್ಕೆ ಈ ಫ‌ಲಿತಾಂಶ ಸಾಕ್ಷಿ ಎಂದಿದ್ದಾರೆ.

3 ಸಾವು: ಇದೇ ವೇಳೆ ಹಿಂಸಾಚಾರದಿಂದ ಪ.ಬಂಗಾಳದ ದಕ್ಷಿಣ 24 ಪರಗಣ ಜಿಲ್ಲೆಯಲ್ಲಿ ಮೂವರು ಸಾವನ್ನಪ್ಪಿ­ದ್ದಾರೆ. ಹಲವು ಪೊಲೀಸರಿಗೆ ಗಾಯಗಳಾಗಿವೆ. ಪ್ರಸ್ತುತ ಬಂಗಾಳ ಚುನಾವಣೆ ಹಿನ್ನೆಲೆಯಲ್ಲಿ ಆರಂಭದಿಂದಲೂ ಸಂಘರ್ಷ ನಡೆಯುತ್ತಲೇ ಇತ್ತು