ಕ್ವಾರಂಟೈನ್ ನಿಂದ ಬಂದ ದಂಪತಿಗೆ ಸೋಂಕು ದೃಢ: ಮುಂಡ್ಕೂರು ಶಾಲೆ ಬಳಿ ಸೀಲ್ ಡೌನ್

Team Udayavani, Jun 8, 2020, 2:33 PM IST

ಬೆಳ್ಮಣ್: ಅನ್ಯರಾಜ್ಯದಿಂದ ಆಗಮಿಸಿ ಕ್ವಾರಂಟೈನ್ ನಲ್ಲಿದ್ದು ಮನೆಗೆ ಆಗಮಿಸಿದ್ದ ದಂಪತಿಗೆ ಕೋವಿಡ್-19 ಸೋಂಕು ದೃಢವಾಗಿದ್ದು, ಮುಂಡ್ಕೂರು ಪ್ರಾಥಮಿಕ ಶಾಲೆಯ ಬಳಿಯ ಅವರ ನಿವಾಸವನ್ನು ಸೀಲ್ ಡೌನ್ ಮಾಡಲಾಗಿದೆ.

ಈ ದಂಪತಿಯು ಉಳಿದ ಆರು ಮಂದಿ ಸಂಬಂಧಿಕರೊಂದಿಗೆ ಕಾಪುವಿನಲ್ಲಿ ಒಂಬತ್ತು ದಿನ ಕ್ವಾರಂಟೈನ್ ನಲ್ಲಿದ್ದರು. ನಂತರ ಮನೆಗೆ ಆಗಮಿಸಿದ್ದು, ಮೂರು ದಿನಗಳ ಹಿಂದೆಯೇ ಕೋವಿಡ್ ಪಾಸಿಟಿವ್ ಬಂದಿತ್ತು. ಆದರೆ ಇವರು ನಂದಿಕೂರಿನ ಸಂಬಂಧಿಗಳ ಮನೆಯ ವಿಳಾಸ ನೀಡಿದ್ದ ಕಾರಣ ಅಧಿಕಾರಿಗಳು ಇವರನ್ನು ಸಂಪರ್ಕಿಸಲಾಗಿರಲಿಲ್ಲ.

ದಂಪತಿಗೆ ಅನಾರೋಗ್ಯ ಕಂಡುಬಂದ ಹಿನ್ನಲೆಯಲ್ಲಿ ಆರೋಗ್ಯ ಅಧಿಕಾರಿಗಳನ್ನು ಸಂಪರ್ಕಿಸಿದ ನಂತರ ಇವರನ್ನು ರವಿವಾರ ಮಣಿಪಾಲ ಆಸ್ಪತ್ರೆಗೆ ದಾಖಲಿಸಲಾಗಿದೆ.

ಇಂದು ಇವರ ನಿವಾಸದ ಬಳಿ ಸೀಲ್ ಡೌನ್ ಮಾಡಿದ್ದು, ಕಂಟೈನ್ ಮೆಂಟ್ ಜೋನ್ ಎಂದು ಘೋಷಿಸಲಾಗಿದೆ. ಕಾರ್ಕಳ ಕಂದಾಯ ಅಧಿಕಾರಿ ಗುರುಪ್ರಸಾದ್, ಮುಂಡ್ಕೂರು ಪಿಡಿಒ ರವಿರಾಜ್, ಸಚ್ಚೇರಿಪೇಟೆ ಪ್ರಾಥಮಿಕ ಆರೋಗ್ಯ ಕೇಂದ್ರದ ವೈದ್ಯಾಧಿಕಾರಿಗಳು ಸ್ಥಳಕ್ಕಾಗಮಿಸಿದ್ದರು.