Budget: ಮಂಗಳೂರು ರೈಲ್ವೇ ಅಭಿವೃದ್ಧಿಗೆ 55 ಕೋ.ರೂ
Team Udayavani, Feb 2, 2024, 1:21 AM IST
ಮಂಗಳೂರು: ಕೇಂದ್ರ ವಿತ್ತ ಸಚಿವೆ ನಿರ್ಮಲಾ ಸೀತಾರಾಮನ್ ಮಂಡಿಸಿದ 2024-25ನೇ ಸಾಲಿನ ಬಜೆಟ್ನಲ್ಲಿ ಮಂಗಳೂರು ಪ್ರದೇಶದ ರೈಲ್ವೇ ಅಭಿವೃದ್ಧಿಗೆ 55 ಕೋಟಿ ರೂ. ಒದಗಿಸಲಾಗಿದೆ.
ದಕ್ಷಿಣ ರೈಲ್ವೇ ವಿಭಾಗ ವ್ಯಾಪ್ತಿಯ ಜೋಕಟ್ಟೆ ನಿಲ್ದಾಣ ಮತ್ತು ಕೊಂಕಣ ರೈಲ್ವೇಯ ತೋಕೂರು ನಿಲ್ದಾಣ ಮಧ್ಯೆ ಹಳಿ ದ್ವಿಗುಣ ಕಾಮಗಾರಿಗೆ 50 ಕೋಟಿ ರೂ. ನಿಗದಿಪಡಿಸಿದ್ದೂ ಇದರಲ್ಲಿ ಸೇರಿದೆ.
1.98 ಕಿ.ಮೀ. ದೂರದ ಈ ಕಾಮಗಾರಿ ಎರಡು ರೈಲ್ವೇ ವಲಯಗಳನ್ನು ಸಂಪರ್ಕಿಸುವುದರಿಂದ ಅತಿ ಮಹತ್ವದ್ದು.
4.74 ಕೋಟಿ ರೂ. ಮೊತ್ತವನ್ನು ಮಂಗಳೂರು ಸೆಂಟ್ರಲ್ ನಿಲ್ದಾಣದಲ್ಲಿನ ಹೆಚ್ಚುವರಿ ಪ್ಲಾಟ್ಫಾರಂಗಳ ಪೂರ್ಣಗೊಳಿಸುವ ಕೆಲಸಕ್ಕೆ ನಿಗದಿಪಡಿಸಲಾಗಿದೆ. ಈ ಹೆಚ್ಚುವರಿ ಪ್ಲಾಟ್ಫಾರಂಗಳಾದ 4 ಮತ್ತು 5 ಇತ್ತೀಚೆಗಷ್ಟೇ ಪೂರ್ಣಗೊಂಡಿದ್ದರೂ ಅವುಗಳಿಗೆ ಶೆಲ್ಟರ್ ನಿರ್ಮಾಣ, ಇನ್ನೊಂದು ಪಾದಚಾರಿ ಮೇಲ್ಸೇತುವೆ ನಿರ್ಮಾಣಗೊಳ್ಳಬೇಕಿದೆ. ಬಜೆಟ್ನಲ್ಲಿ ಮಂಗಳೂರು ಜಂಕ್ಷನ್-ಪಣಂಬೂರು ಭಾಗದ ಪ್ಯಾಚ್ ಡಬ್ಲಿಂಗ್ ಕೆಲಸಕ್ಕೆ 1 ಕೋಟಿ ಹಾಗೂ ನೇತ್ರಾವತಿ ಕ್ಯಾಬಿನ್ ಮಂಗಳೂರು ಸೆಂಟ್ರಲ್ ಡಬ್ಲಿಂಗ್ನ ಬಾಕಿ ಉಳಿದ ಕೆಲಸ ಪೂರ್ಣಗೊಳಿಸಲು 1.2 ಕೋಟಿ ರೂ. ಮೀಸಲಿರಿಸಲಾಗಿದೆ.