World Cup: ಆಸ್ಟ್ರೇಲಿಯ-ಇಂಗ್ಲೆಂಡ್‌: ಆ್ಯಶಸ್‌ ತಂಡಗಳ ಮುಖಾಮುಖಿ

ಕಾಂಗರೂ ವಿರುದ್ಧ ಘರ್ಜಿಸುವುದೇ "ತ್ರೀ ಲಯನ್ಸ್‌" ? ಮಾರ್ಷ್‌, ಗ್ಲೆನ್‌ ಮ್ಯಾಕ್ಸ್‌ವೆಲ್‌ ಗೈರು

Team Udayavani, Nov 4, 2023, 12:18 AM IST

ಅಹ್ಮದಾಬಾದ್‌: ಆ್ಯಶಸ್‌ನ ಬದ್ಧ ಎದುರಾಳಿಗಳಾದ ಇಂಗ್ಲೆಂಡ್‌ -ಆಸ್ಟ್ರೇಲಿಯ ತಂಡಗಳು ಶನಿವಾರ ವಿಶ್ವಕಪ್‌ ಹಣಾಹಣಿಯಲ್ಲಿ ಎದುರಾ ಗಲಿವೆ. ಆದರೆ ಈ ಪಂದ್ಯ ಎಂದಿನ ಜೋಶ್‌ ಕಾಣುವುದು ಮಾತ್ರ ಅನು ಮಾನ. ಕಾರಣ, ಆಸ್ಟ್ರೇಲಿ ಯದ ಪ್ರಬುದ್ಧ ಆಟ ಹಾಗೂ ಇಂಗ್ಲೆಂಡ್‌ ವಿಶ್ವಕಪ್‌ ಇತಿಹಾಸದಲ್ಲಿ ತೋರ್ಪಡಿ ಸಿದ ಅತ್ಯಂತ ಕಳಪೆ ಪ್ರದರ್ಶನ.

ಹಾಲಿ ಚಾಂಪಿಯನ್‌ ತಂಡವೊಂದು ಅತ್ಯಂತ ದಯನೀಯ ಸ್ಥಿತಿಗೆ ತಲುಪಿ ಅಂಕಪಟ್ಟಿಯ ಕೊನೆಯ ಸ್ಥಾನಕ್ಕೆ ಜಾರಿದ ದುರಂತಕ್ಕೆ ಸಾಕ್ಷಿಯಾದ ವಿಶ್ವಕಪ್‌ ಪಂದ್ಯಾವಳಿ ಇದು. 2019ರಲ್ಲಿ, ವಿಚಿತ್ರ ಸನ್ನಿವೇಶವೊಂದರಲ್ಲಿ ಮೊದಲ ಬಾರಿಗೆ ವಿಶ್ವಕಪ್‌ ಎತ್ತಿದ ಇಂಗ್ಲೆಂಡ್‌ ಈ ಬಾರಿ ಇದರ ಶೇ. ಹತ್ತರಷ್ಟೂ ಸಾಧನೆ ಮಾಡಿಲ್ಲ. ಆರರಲ್ಲಿ ಗೆದ್ದದ್ದು ಒಂದು ಪಂದ್ಯ ಮಾತ್ರ. ಹೀಗಾಗಿ ಜಾಸ್‌ ಬಟ್ಲರ್‌ ತಂಡ ಈಗಾಗಲೇ ಹೊರಬಿದ್ದಾಗಿದೆ. ಇದಕ್ಕೆ ಅಧಿಕೃತ ಮುದ್ರೆ ಬೀಳಬೇಕಾದ ಅಗತ್ಯವಿಲ್ಲ. ಏಕೆಂದರೆ ಉಳಿದ 3 ಪಂದ್ಯ ಗೆದ್ದರೂ ಮೇಲೇರಲಾಗದ ಅವಸ್ಥೆ ಇಂಗ್ಲೆಂಡ್‌ ತಂಡದ್ದು. ಆದರೆ ಆಸ್ಟ್ರೇಲಿಯವನ್ನು ಸೋಲಿಸಿದರೆ ಅದೇ ಒಂದು ಮಹತ್ಸಾಧನೆ ಆಗಲಿದೆ.

ಇಂಗ್ಲೆಂಡ್‌ “ಮಾಜಿ’ ಆಗಲು ಮುಖ್ಯ ಕಾರಣ ಬ್ಯಾಟಿಂಗ್‌ ವೈಫ‌ಲ್ಯ. ಆರಂಭಿಕ ಸಮೀಕ್ಷೆಯ ಪ್ರಕಾರ ಇಂಗ್ಲೆಂಡ್‌ ಈ ಪಂದ್ಯಾವಳಿಯ ಅತ್ಯಂತ ಬಲಿಷ್ಠ ಬ್ಯಾಟಿಂಗ್‌ ತಂಡವಾಗಿ ಗುರುತಿಸಲ್ಪಟ್ಟಿತ್ತು. ಆದರೆ ಇದು ಕಾಗದದಲ್ಲಿ ಮಾತ್ರ ಎಂಬುದು ಅರಿವಾಗಲು ಹೆಚ್ಚಿನ ವೇಳೆ ಹಿಡಿಯಲಿಲ್ಲ. ಕಳೆದ 3 ಪಂದ್ಯಗಳಲ್ಲಂತೂ 170 ಅಥವಾ ಕಡಿಮೆ ಮೊತ್ತಕ್ಕೆ ಆಲೌಟ್‌ ಆಗಿ ತೀವ್ರ ಸಂಕಟಕ್ಕೆ ಸಿಲುಕಿದೆ.
ಆಸ್ಟ್ರೇಲಿಯದ್ದು ಇದಕ್ಕೆ ವಿರುದ್ಧವಾದ ಸಾಧನೆ. ಆರಂಭದಲ್ಲಿ ಅದುರುತ್ತಿದ್ದ ಕಾಂಗರೂ ಬ್ಯಾಟಿಂಗ್‌ ಲೈನ್‌ಅಪ್‌ ಅನಂತರ ಬಲಿಷ್ಠಗೊಳ್ಳುತ್ತ ಬಂದಿದೆ. 5 ಬಾರಿಯ ಚಾಂಪಿಯನ್‌ ಆಗಿರುವ ಆಸ್ಟ್ರೇಲಿಯ ಕಳೆದ 4 ಪಂದ್ಯಗಳಲ್ಲಿ ಅಮೋಘ ಪ್ರದರ್ಶನ ಕಾಯ್ದುಕೊಂಡಿದೆ. ಇದರಿಂದ ಅಂಕಪಟ್ಟಿಯಲ್ಲಿ 3ನೇ ಸ್ಥಾನಕ್ಕೆ ಏರಿದೆ. ಇದೂ ಸೇರಿದಂತೆ ಆಸೀಸ್‌ ಒಟ್ಟು 3 ಪಂದ್ಯಗಳನ್ನು ಆಡಬೇಕಿರುವುದರಿಂದ ಆತಂಕಪಡುವ ಅಗತ್ಯವೇನಿಲ್ಲ.

ಮ್ಯಾಕ್ಸಿ , ಮಾರ್ಷ್‌ ಗೈರು
ಆಸ್ಟ್ರೇಲಿಯ ತಂಡದ ಪ್ರಮುಖ ಆಟಗಾರರಾದ ಮಿಚೆಲ್‌ ಮಾರ್ಷ್‌ ಮತ್ತು ಗ್ಲೆನ್‌ ಮ್ಯಾಕ್ಸ್‌ವೆಲ್‌ ಈ ಪಂದ್ಯಕ್ಕೆ ಲಭ್ಯರಿಲ್ಲ. ಮಾರ್ಷ್‌ ವೈಯಕ್ತಿಕ ಕಾರಣಗಳಿಂದ ತವರಿಗೆ ಮರಳಿದ್ದಾರೆ. ಮ್ಯಾಕ್ಸ್‌ವೆಲ್‌ ಬಿದ್ದು ತಲೆಗೆ ಪೆಟ್ಟು ಮಾಡಿಕೊಂಡಿದ್ದಾರೆ. ಇಬ್ಬರೂ ಪ್ರಚಂಡ ಫಾರ್ಮ್ನಲ್ಲಿದ್ದ ಆಟಗಾರರು. ಅದರಲ್ಲೂ ಮ್ಯಾಕ್ಸ್‌ವೆಲ್‌ ವಿಶ್ವಕಪ್‌ ಇತಿಹಾಸದ ಶರವೇಗದ ಶತಕ ಬಾರಿಸಿ ಮಿಂಚಿದ್ದರು. ಆದರೆ ಆಸ್ಟ್ರೇಲಿಯ ಗಂಭೀರವಾಗಿ ಚಿಂತಿಸಬೇಕಾದ ಅಗತ್ಯವೇನೂ ಇಲ್ಲ. ಇವರ ಬದಲು ಕ್ಯಾಮರಾನ್‌ ಗ್ರೀನ್‌ ಮತ್ತು ಮಾರ್ಕಸ್‌ ಸ್ಟೋಯಿನಿಸ್‌ ಆಡಲಿಳಿಯುತ್ತಾರೆ.

ಆಸೀಸ್‌ ಈಗಾಗಲೇ ಸತತ 3 ಪಂದ್ಯಗಳಲ್ಲಿ 350 ರನ್‌ ಬಾರಿಸಿ ಅಪಾಯಕಾರಿಯಾಗಿ ಗೋಚರಿಸಿದೆ. ಕೂಟದಲ್ಲಿ ಸರ್ವಾಧಿಕ 5 ಶತಕ ಬಾರಿಸಿದೆ. ಇವರಲ್ಲಿ, ಆರಂಭಕಾರ ಡೇವಿಡ್‌ ವಾರ್ನರ್‌ ಯುವಕರನ್ನೂ ನಾಚಿಸುವ ರೀತಿಯಲ್ಲಿ ಬ್ಯಾಟ್‌ ಬೀಸುತ್ತಿದ್ದಾರೆ. 2 ಸೆಂಚುರಿ ಬಾರಿಸಿ ಎದುರಾಳಿಗಳ ಮೇಲೆ ಅಪಾಯದ ಬಾವುಟ ಹಾರಿಸಿದ್ದಾರೆ. ಟ್ರ್ಯಾವಿಸ್‌ ಹೆಡ್‌ ನ್ಯೂಜಿಲ್ಯಾಂಡ್‌ ವಿರುದ್ಧ ಮರಳಿದವರೇ ಶತಕದೊಂದಿಗೆ ಅಬ್ಬರಿಸಿದ್ದಾರೆ. ಸ್ಮಿತ್‌ ಮತ್ತು ಲಬುಶೇನ್‌ ಅವರದೂ ಪರಾÌಗಿಲ್ಲ ಎಂಬಂಥ ಸಾಧನೆ.

ಬೌಲಿಂಗ್‌ನಲ್ಲಿ ಸ್ಪಿನ್ನರ್‌ ಆ್ಯಡಂ ಝಂಪ ಟ್ರಂಪ್‌ಕಾರ್ಡ್‌ ಆಗುತ್ತಿದ್ದಾರೆ. ಭಾರತದ ಸ್ಪಿನ್‌ ಟ್ರ್ಯಾಕ್‌ಗಳನ್ನು ಅರೆದು ಕುಡಿದವರ ರೀತಿಯಲ್ಲಿ ಬೌಲಿಂಗ್‌ ನಡೆಸುತ್ತಿದ್ದು, ಈಗಾಗಲೇ 16 ವಿಕೆಟ್‌ ಉಡಾಯಿಸಿದ್ದಾರೆ. ಆದರೆ ವೇಗದ ಬೌಲಿಂಗ್‌ ನಿರೀಕ್ಷಿತ ಯಶಸ್ಸು ಕಂಡಿಲ್ಲ. ಹೇಝಲ್‌ವುಡ್‌, ಕಮಿನ್ಸ್‌ ತಲಾ 8 ವಿಕೆಟ್‌ ಕೆಡವಿದರೆ, ಸ್ಟಾರ್ಕ್‌ ವಿಶ್ವಕಪ್‌ನಲ್ಲಿ ಮೊದಲ ಸಲ “ವಿಕೆಟ್‌ ಲೆಸ್‌’ ಎನಿಸಿದ್ದಾರೆ. ನ್ಯೂಜಿಲ್ಯಾಂಡ್‌ ವಿರುದ್ಧ ಸ್ಟಾರ್ಕ್‌ ಈ ವೈಫ‌ಲ್ಯ ಕಂಡಿದ್ದರು.

ಚಾಂಪಿಯನ್ಸ್‌ ಟ್ರೋಫಿ ಆತಂಕ
ಆಸ್ಟ್ರೇಲಿಯದ ಬಲಿಷ್ಠ ಬ್ಯಾಟಿಂಗ್‌ ಸರದಿಗೆ ನಡುಕ ಹುಟ್ಟಿಸಲು ಡೇವಿಡ್‌ ವಿಲ್ಲಿ, ಮಾರ್ಕ್‌ ವುಡ್‌, ಕ್ರಿಸ್‌ ವೋಕ್ಸ್‌, ಆದಿಲ್‌ ರಶೀದ್‌ ಅವರಿಂದ ಸಾಧ್ಯವೇ ಎಂಬುದೊಂದು ಪ್ರಶ್ನೆ. ಉತ್ತಮ ಲಯದಲ್ಲಿದ್ದ ರೀಸ್‌ ಟಾಪ್‌ಲೀ ತಂಡದಿಂದ ಬೇರ್ಪಟ್ಟದ್ದು, ಆಲ್‌ರೌಂಡರ್‌ ಬೆನ್‌ ಸ್ಟೋಕ್ಸ್‌ ಕ್ರಿಕೆಟೇ ಮರೆತವರಂತೆ ಆಡುತ್ತಿರುವುದು ಇಂಗ್ಲೆಂಡ್‌ಗೆ ಬಿದ್ದ ದೊಡ್ಡ ಹೊಡೆತ.
2025ರ ಚಾಂಪಿಯನ್ಸ್‌ ಟ್ರೋಫಿ ಪಂದ್ಯಾವಳಿಯಲ್ಲಿ ಆಡಬೇಕಾದರೆ ಇಂಗ್ಲೆಂಡ್‌ ಟಾಪ್‌-7 ಯಾದಿಯಲ್ಲಿ ಕಾಣಿಸಿಕೊಳ್ಳಬೇಕಿದೆ. ಈ ಕಾರಣಕ್ಕಾಗಿ ಯಾದರೂ ಇಂಗ್ಲೆಂಡ್‌ ಗೆಲ್ಲಬೇಕು.

ಆಸ್ಟ್ರೇಲಿಯ ಮೇಲುಗೈ
ಏಕದಿನ ಇತಿಹಾಸ ಆಸ್ಟ್ರೇಲಿಯ ಪರವಾಗಿಯೇ ಇದೆ. ಇತ್ತಂಡಗಳ ನಡುವೆ 155 ಪಂದ್ಯ ಏರ್ಪಟ್ಟಿದ್ದು, ಇಂಗ್ಲೆಂಡ್‌ 87ರಲ್ಲಿ ಸೋಲನುಭವಿಸಿದೆ. ವಿಶ್ವಕಪ್‌ನಲ್ಲಿ 3-6 ಹಿನ್ನಡೆ ಹೊಂದಿದೆ.