World Cup: ದಕ್ಷಿಣ ಆಫ್ರಿಕಾಕ್ಕೆ ಬವುಮ ಸಾರಥ್ಯ

Team Udayavani, Sep 5, 2023, 11:19 PM IST

ಜೊಹಾನ್ಸ್‌ಬರ್ಗ್‌: ದಕ್ಷಿಣ ಆಫ್ರಿಕಾದ ವಿಶ್ವಕಪ್‌ ಕ್ರಿಕೆಟ್‌ ತಂಡವೂ ಮಂಗಳವಾರ ಪ್ರಕಟಗೊಂಡಿದೆ. ಆರಂಭಕಾರ ಟೆಂಬ ಬವುಮ ನಾಯಕರಾಗಿದ್ದಾರೆ.

ಕಳೆದ ವಿಶ್ವಕಪ್‌ನಲ್ಲಿ ಆಡಿದ 7 ಮಂದಿಯನ್ನಷ್ಟೇ ಕೋಚ್‌ ರಾಬ್‌ ವಾಲ್ಟರ್‌ ಉಳಿಸಿಕೊಂಡಿದ್ದಾರೆ. ಸ್ಪಿನ್ನರ್‌ ಕೇಶವ್‌ ಮಹಾರಾಜ್‌ ಮತ್ತು ಸೀಮರ್‌ ಸಿಸಾಂಡ ಮಗಾಲ ಸ್ಥಾನ ಪಡೆದಿದ್ದಾರೆ. ಗಾಯಾಳಾಗಿದ್ದ ಮಹಾರಾಜ್‌ ಮಾರ್ಚ್‌ ಬಳಿಕ ಮೊನ್ನೆಯಷ್ಟೇ ಕಣಕ್ಕಿಳಿದಿದ್ದರು. ಮಗಾಲ ಕೂಡ ಗಾಯಾಳಾಗಿ ಸ್ವಲ್ಪ ಕಾಲ ತಂಡದಿಂದ ಬೇರ್ಪಟ್ಟಿದ್ದರು. ಭುಜದ ನೋವಿಗೊಳಗಾಗಿರುವ ಅನುಭವಿ ಆಲ್‌ರೌಂಡರ್‌ ವೇಯ್ನ ಪಾರ್ನೆಲ್‌ ಸ್ಥಾನ ಪಡೆದಿಲ್ಲ. ಯುವ ಬ್ಯಾಟರ್‌ಗಳಾದ ಡಿವಾಲ್ಡ್‌ ಬ್ರೇವಿಸ್‌, ಟ್ರಿಸ್ಟನ್‌ ಸ್ಟಬ್ಸ್ ಕೂಡ ಆಯ್ಕೆಯಾಗಿಲ್ಲ.

ತಬ್ರೇಜ್‌ ಶಂಶಿ ತಂಡದ ಮತ್ತೋರ್ವ ಪ್ರಧಾನ ಸ್ಪಿನ್ನರ್‌. ಆಲ್‌ರೌಂಡರ್‌ ಐಡನ್‌ ಮಾರ್ಕ್‌ರಮ್‌ 3ನೇ ಸ್ಪಿನ್‌ ಆಯ್ಕೆಯಾಗಿದ್ದಾರೆ.

1992ರಲ್ಲಿ ಮೊದಲ ಸಲ ವಿಶ್ವಕಪ್‌ ಆಡಿದ ದಕ್ಷಿಣ ಆಫ್ರಿಕಾ ಈವರೆಗೆ ಚಾಂಪಿಯನ್‌ ಆಗಿಲ್ಲ.

ದಕ್ಷಿಣ ಆಫ್ರಿಕಾ ತಂಡ: ಟೆಂಬ ಬವುಮ (ನಾಯಕ), ಗೆರಾಲ್ಡ್‌ ಕೋಲ್ಜಿ, ಕ್ವಿಂಟನ್‌ ಡಿ ಕಾಕ್‌, ರೀಝ ಹೆಂಡ್ರಿಕ್ಸ್‌, ಮಾರ್ಕೊ ಜಾನ್ಸೆನ್‌, ಹೆನ್ರಿಕ್‌ ಕ್ಲಾಸೆನ್‌, ಸಿಸಾಂಡ ಮಗಾಲ, ಕೇಶವ್‌ ಮಹಾರಾಜ್‌, ಐಡನ್‌ ಮಾರ್ಕ್‌ರಮ್‌, ಡೇವಿಡ್‌ ಮಿಲ್ಲರ್‌, ಲುಂಗಿ ಎನ್‌ಗಿಡಿ, ಆ್ಯನ್ರಿಚ್‌ ನೋರ್ಜೆ, ಕಾಗಿಸೊ ರಬಾಡ, ತಬ್ರೇಜ್‌ ಶಂಶಿ, ರಸ್ಸಿ ವಾನ್‌ ಡರ್‌ ಡುಸೆನ್‌.