ವನಿತಾ ಟಿ20 ಬೌಲಿಂಗ್‌ ರ್‍ಯಾಂಕಿಂಗ್‌: ಅಗ್ರಸ್ಥಾನದತ್ತ ದೀಪ್ತಿ ಶರ್ಮ

Team Udayavani, Jan 31, 2023, 11:40 PM IST

ದುಬಾೖ: ಮಂಗಳವಾರ ಪ್ರಕಟ ಗೊಂಡ ನೂತನ ಐಸಿಸಿ ವನಿತಾ ಟಿ20 ಬೌಲಿಂಗ್‌ ರ್‍ಯಾಂಕಿಂಗ್‌ನಲ್ಲಿ ಭಾರತದ ಆಫ್ಸ್ಪಿನ್ನರ್‌ ದೀಪ್ತಿ ಶರ್ಮ ಅಗ್ರಸ್ಥಾನವನ್ನು ಸಮೀಪಿಸಿದ್ದಾರೆ.

ಪ್ರಸಕ್ತ ಸಾಗುತ್ತಿರುವ ಟಿ20 ತ್ರಿಕೋನ ಸರಣಿಯಲ್ಲಿ ಸರ್ವಾಧಿಕ 9 ವಿಕೆಟ್‌ ಉರುಳಿಸಿರುವ ಅವರು ಮೂರರಿಂದ ಎರಡನೇ ಸ್ಥಾನಕ್ಕೆ ನೆಗೆದಿದ್ದಾರೆ.

ಇಂಗ್ಲೆಂಡ್‌ನ‌ ಸೋಫಿ ಎಕ್‌ಸ್ಟೋನ್‌ ನಂ.1 ಸ್ಥಾನ ಕಾಯ್ದುಕೊಂಡಿದ್ದಾರೆ. ಇವರ ಹಾಗೂ ದೀಪ್ತಿ ನಡುವೆ 26 ಅಂಕಗಳ ಅಂತರವಿದೆ. ದೀಪ್ತಿ 737, ಎಕ್‌ಸ್ಟೋನ್‌ 763 ಅಂಕ ಹೊಂದಿದ್ದಾರೆ. ಇದೇ ವೇಳೆ ದಕ್ಷಿಣ ಆಫ್ರಿಕಾದ ನೊಂಕುಲುಲೆಕೊ ಮ್ಲಾಬಾ ಒಂದು ಸ್ಥಾನ ಮೇಲೇರಿ ಮೂರಕ್ಕೆ ಬಂದು ನಿಂತಿದ್ದಾರೆ (732 ಅಂಕ).

ಭಾರತದ ಎಡಗೈ ಸ್ಪಿನ್ನರ್‌ ರಾಜೇಶ್ವರಿ ಗಾಯಕ್ವಾಡ್‌ ಅವರ ರ್‍ಯಾಂಕಿಂಗ್‌ನಲ್ಲೂ ಉತ್ತಮ ಪ್ರಗತಿಯಾಗಿದೆ. ಅವರದು 4 ಸ್ಥಾನಗಳ ಜಿಗಿತ. ಈಗ 14ನೇ ಸ್ಥಾನ ಅಲಂಕರಿಸಿದ್ದಾರೆ.