ಸರಕಾರಿ ಯೋಜನೆಗಳಲ್ಲಿ ಇನ್ನು ಪೌಷ್ಟಿಕಾಂಶ ಇರುವ ಅಕ್ಕಿ ವಿತರಣೆ
Team Udayavani, Apr 9, 2022, 7:30 AM IST
ಹೊಸದಿಲ್ಲಿ: ದೇಶಾದ್ಯಂತ ಉದ್ದೇಶಿತ ಸಾರ್ವಜನಿಕ ವಿತರಣ ವ್ಯವಸ್ಥೆಯಲ್ಲಿ ಪೌಷ್ಟಿಕಾಂಶಯುಕ್ತ ಅಕ್ಕಿ ವಿತರಣೆ ಮಾಡುವುದಕ್ಕೆ ಪ್ರಧಾನಿ ನರೇಂದ್ರ ಮೋದಿ ನೇತೃತ್ವದ ಆರ್ಥಿಕ ವ್ಯವಹಾರಗಳ ಸಂಪುಟ ಸಮಿತಿ ಶುಕ್ರವಾರ ಅನುಮೋದನೆ ನೀಡಿದೆ. ಈ ಬಗ್ಗೆ ಕೇಂದ್ರ ವಾರ್ತಾ ಮತ್ತು ಪ್ರಸಾರ ಸಚಿವ ಅನುರಾಗ್ ಠಾಕೂರ್ ಮಾಹಿತಿ ನೀಡಿದ್ದಾರೆ. ರಾಷ್ಟ್ರೀಯ ಆಹಾರ ಭದ್ರತಾ ಕಾಯ್ದೆ(ಎನ್ಎಫ್ಎಸ್ಎ), ಸಮಗ್ರ ಮಕ್ಕಳ ಅಭಿವೃದ್ಧಿ ಸೇವೆ(ಐಸಿಡಿಎಸ್), ಪ್ರಧಾನ ಮಂತ್ರಿ ಪೋಷಣ ಶಕ್ತಿ ನಿರ್ಮಾಣ(ಪಿಎಂ- ಪೋಷಣ್) ಮತ್ತು ಇತರ ಕಲ್ಯಾಣ ಯೋಜನೆಗಳು(ಒಡಬ್ಲ್ಯುಎಸ್) ಅಡಿಯಲ್ಲಿ ಈ ಯೋಜನೆ ಜಾರಿಗೊಳಿಸಲಾಗುತ್ತದೆ. 2024ರೊಳಗೆ ದೇಶಾದ್ಯಂತ ಹಂತ ಹಂತವಾಗಿ ಯೋಜನೆ ಜಾರಿಗೆ ಬರಲಿದೆ. ಈ ಯೋಜನೆಗೆ ಸರಕಾರ ವಾರ್ಷಿಕವಾಗಿ 2,700 ಕೋಟಿ ರೂ. ಖರ್ಚು ಮಾಡಲಿದೆ.
ಯೋಜನೆ ವಿಸ್ತರಣೆ: ಮಾಜಿ ಪ್ರಧಾನಿ ದಿ| ಅಟಲ್ ಬಿಹಾರಿ ವಾಜಪೇಯಿ ಅವರ ಸ್ಮರಣಾರ್ಥ ನೀತಿ ಆಯೋಗವು 2015ರಲ್ಲಿ ಆರಂಭಿಸಿರುವ ಅಟಲ್ ಇನೋವೇಶನ್ ಮಿಷನ್(ಎಐಎಂ) ಅನ್ನು 2023ರ ಮಾರ್ಚ್ವರೆಗೆ ವಿಸ್ತರಿಸುವುದಕ್ಕೇ ಕೇಂದ್ರ ಸಂಪುಟ ಅನುಮೋದನೆ ನೀಡಿದೆ. ಈ ವಿಸ್ತೃತ ಅವಧಿಯಲ್ಲಿ 10,000 ಟಿಂಕರಿಂಗ್ ಲ್ಯಾಬ್ಗಳು(ಎಟಿಎಲ್), 101 ಅಟಲ್ ಇನ್ಕ್ಯುಬೇಷನ್ ಕೇಂದ್ರಗಳು(ಎಐಸಿ), 50 ಕಮ್ಯುನಿಟಿ ಇನೋವೇಶನ್ ಸೆಂಟರ್(ಎಸಿಐಸಿ) ಆರಂಭಿಸಲಾಗು ವುದು. ಹಾಗೆಯೇ 200 ಸ್ಟಾರ್ಟ್ಅಪ್ ಗಳಿಗೆ “ಅಟಲ್ ನ್ಯೂ ಇಂಡಿಯಾ ಚಾಲೆಂಜ್’ ಯೋಜನೆಯಡಿ ಬೆಂಬಲ ನೀಡಲಾಗುವುದು. ಅದಕ್ಕಾಗಿ ಕೇಂದ್ರ ಸರಕಾರ 2000 ಕೋಟಿ ರೂ. ಮೊತ್ತ ವಿನಿಯೋಗ ಮಾಡಲಿದೆ.