ನಿಕ್ಕೆಲ್ ಎಂದು ಭಾವಿಸಿದ್ದ ಬ್ಯಾಗ್ನಲ್ಲಿತ್ತು ಬರೀ ಕಲ್ಲು !
Team Udayavani, Mar 22, 2023, 9:40 AM IST
ನವದೆಹಲಿ: ಜಗತ್ತಿನ ಪ್ರಮುಖ ಷೇರು ಪೇಟೆ ವಹಿವಾಟು ಸಂಸ್ಥೆ ಜೆಪಿ ಮಾರ್ಗನ್ನ ಚೇಸ್ ನಿಕ್ಕೆಲ್ ಸಂಗ್ರಹದಲ್ಲಿ ಬಹುದೊಡ್ಡ ವಂಚನೆ ವರದಿಯಾಗಿದೆ. ಒಟ್ಟು 1.3 ಶತಕೋಟಿ ಡಾಲರ್ ಮೌಲ್ಯದ ನಿಕ್ಕೆಲ್ ಎಂದು ಭಾವಿಸಿ ಸಂಸ್ಥೆ ಸಂಗ್ರಹಿಸಿದ್ದ ಬ್ಯಾಗ್ಗಳ ತುಂಬೆಲ್ಲಾ ಕಲ್ಲುಗಳು ಪತ್ತೆಯಾಗಿವೆ.
ನೆದರ್ಲೆಂಡ್ನ ರೊಟರ್ಡಾಮ್ನಲ್ಲಿರುವ ಆ್ಯಕ್ಸೆಸ್ ವರ್ಡ್ ಎನ್ನುವ ಸಂಸ್ಥೆಯ ನಿರ್ವಹಣೆಯಲ್ಲಿದ್ದ ವೇರ್ಹೌಸ್ನಲ್ಲಿ ಒಂದು ವರ್ಷದ ಹಿಂದೆ 54 ಮೆಟ್ರಿಕ್ ಟನ್ ನಿಕ್ಕಲ್ ಇರುವಂಥ ಬ್ಯಾಗ್ಗಳನ್ನು ಮೆಟಲ್ ಎಕ್ಸ್ಚೇಂಜ್ ತುಂಬಿಸಿಟ್ಟಿತ್ತು.
ಎರಡು ದಿನಗಳ ಹಿಂದಷ್ಟೇ ಲಂಡನ್ ಮೆಟಲ್ ಎಕ್ಸ್ಚೇಂಜ್ ಸಂಸ್ಥೆಯ ಅಧಿಕಾರಿಗಳು ನಿಕ್ಕಲ್ಗಳನ್ನು ಖರೀದಿಸಲು ವೇರ್ಹೌಸ್ಗೆ ತೆರಳಿದ್ದರು ಈ ವೇಳೆ ಅಲ್ಲಿ ಕಂಡಿದ್ದು ನಿಕ್ಕೆಲ್ ಬದಲಿಗೆ ಬರೀ ಕಲ್ಲು. ಈ ರೀತಿ ಆದದ್ದು ಹೇಗೆ ಎಂಬುದು ಮಾತ್ರ ಇನ್ನೂ ತಿಳಿದಿಲ್ಲ.
ಈ ಬಗ್ಗೆ ತನಿಖೆ ನಡೆಯುತ್ತಿದ್ದು, ಒಂದು ವೇಳೆ ನಿಕ್ಕೆಲ್ ಪತ್ತೆಯಾಗದಿದ್ದರೆ ಅದರ ವೆಚ್ಚವನ್ನು ವೇರ್ಹೌಸ್ನ ನಿರ್ವಹಣಾ ಸಂಸ್ಥೆ ಆ್ಯಕ್ಸೆಸ್ ವರ್ಡ್ ಭರಿಸಬೇಕಾದ ಸಾಧ್ಯತೆಗಳಿವೆ.