ಮಲೇಷ್ಯಾ ಬ್ಯಾಡ್ಮಿಂಟನ್‌: ಮತ್ತೆ ತೈ ಜು ಬಲೆಗೆ ಬಿದ್ದ ಸಿಂಧು,ಪ್ರಣಯ್‌ ಸೆಮಿಫೈನಲ್‌ ಪ್ರವೇಶ

Team Udayavani, Jul 8, 2022, 11:27 PM IST

ಕೌಲಾಲಂಪುರ: ಎಚ್‌.ಎಸ್‌. ಪ್ರಣಯ್‌ “ಮಲೇಷ್ಯಾ ಮಾಸ್ಟರ್ ಸೂಪರ್‌ 500′ ಬ್ಯಾಡ್ಮಿಂಟನ್‌ ಪಂದ್ಯಾವಳಿಯ ಸೆಮಿಫೈನಲ್‌ಗೆ ಲಗ್ಗೆ ಹಾಕಿದ್ದಾರೆ.

ಆದರೆ ಪಿ.ವಿ. ಸಿಂಧು ಮತ್ತೆ ತೈ ಜು ಯಿಂಗ್‌ ಬಲೆಗೆ ಬಿದ್ದಿದ್ದಾರೆ. ಶುಕ್ರವಾರ ನಡೆದ 55 ನಿಮಿಷಗಳ ಕ್ವಾರ್ಟರ್‌ ಫೈನಲ್‌ ಕಾದಾಟದಲ್ಲಿ ಚೈನೀಸ್‌ ತೈಪೆಯ ಆಟಗಾರ್ತಿ ಭಾರತೀಯಳನ್ನು 21-13, 12-21, 21-12 ಅಂತರದಿಂದ ಮಣಿಸಿದರು.

ಕಳೆದ ವಾರದ ಮಲೇಷ್ಯಾ ಓಪನ್‌ ಕ್ವಾರ್ಟರ್‌ ಫೈನಲ್‌ನಲ್ಲೂ ಇವರಿಬ್ಬರ ಮುಖಾಮುಖಿ ಆಗಿತ್ತು. ಅಲ್ಲಿಯೂ ಸಿಂಧು ಪರಾಭವಗೊಂಡಿದ್ದರು. ಇದು ಸಿಂಧು ವಿರುದ್ಧ ತೈ ಜು ಯಿಂಗ್‌ ಸಾಧಿಸಿದ 17ನೇ ಹಾಗೂ ಸತತ 7ನೇ ಗೆಲುವು. ಸಿಂಧು ಕೊನೆಯ ಸಲ ತೈ ಜು ಯಿಂಗ್‌ ವಿರುದ್ಧ ಗೆಲುವು ಸಾಧಿಸಿದ್ದು 2019ರ ವಿಶ್ವ ಚಾಂಪಿಯನ್‌ಶಿಪ್‌ನಲ್ಲಿ. ಅಂದಿನ ಬಾಸೆಲ್‌ ಫೈನಲ್‌ ಕದನದಲ್ಲಿ ಗೆದ್ದು ಬಂದ ಸಿಂಧು ಸ್ವರ್ಣ ಸಂಭ್ರಮ ಆಚರಿಸಿದ್ದರು.

ಪುರುಷರ ಸಿಂಗಲ್ಸ್‌ನಲ್ಲಿ ಎಚ್‌.ಎಸ್‌. ಪ್ರಣಯ್‌ ಭಾರತೀಯರ ನಿರೀಕ್ಷೆಯನ್ನು ಗರಿಗೆದರುವಂತೆ ಮಾಡಿದ್ದಾರೆ. ಅವರು ಜಪಾನಿನ ಕಂಟ ಸುನೆಯಾಮ ವಿರುದ್ಧ ಭರ್ತಿ ಒಂದು ಗಂಟೆ ಕಾಲ ಹೋರಾಡಿ 25-23, 22-20 ಅಂತರದ ಗೆಲುವು ಸಾಧಿಸಿದರು. ಇವರ ಮುಂದಿನ ಎದುರಾಳಿ ಹಾಂಕಾಂಗ್‌ನ ಎನ್‌ಜಿ ಕಾ ಲಾಂಗ್‌ ಆ್ಯಂಗಸ್‌.