ಪ್ರೊ ಕಬಡ್ಡಿ: ಯುಪಿ ಯೋಧಾಸ್, ಯು ಮುಂಬಾ ಗೆಲುವು
Team Udayavani, Nov 11, 2022, 10:50 PM IST
ಪುಣೆ: ಹರ್ಯಾಣ ಸ್ಟೀಲರ್ ತಂಡವನ್ನು 40-34 ಅಂಕಗಳಿಂದ ಉರುಳಿಸುವ ಮೂಲಕ ಯುಪಿ ಯೋಧಾಸ್ ಪ್ರೊ ಕಬಡ್ಡಿಯಲ್ಲಿ 6ನೇ ಗೆಲುವು ಸಾಧಿಸಿದೆ. ಹರ್ಯಾಣ 7ನೇ ಸೋಲುಂಡಿತು.
ಯೋಧಾಸ್ ರೈಡರ್ ಸುರೇಂದರ್ ಗಿಲ್ ಅವರ ಆಟವನ್ನು ನೆಚ್ಚಿಕೊಂಡಿತು. ಅವರು ಅತ್ಯಧಿಕ 11 ಅಂಕ ಗಳಿಸಿದರು. ನಾಯಕ ಪದೀಪ್ ನರ್ವಾಲ್ 8 ಅಂಕ ತಂದಿತ್ತರು. ಹರ್ಯಾಣ ತಂಡದಲ್ಲಿ ಮಂಜೀತ್ ಮಿಂಚಿನ ಪ್ರದರ್ಶನವಿತ್ತರು. ಇವರ ಗಳಿಕೆ 12 ಅಂಕ. ಪ್ರದೀಪ್ ನರ್ವಾಲ್ 17 ಬಾರಿ ಹರ್ಯಾಣ ಕೋಟೆಗೆ ನುಗ್ಗಿದರು. 6 ಬಾರಿ ಅದನ್ನು ಭೇದಿಸಲು ಯಶಸ್ವಿಯಾದರು. ಸುರೇಂದರ್ ಗಿಲ್ 16 ಬಾರಿ ದಾಳಿ ಮಾಡಿದರು. ಇದರಲ್ಲಿ 7 ಬಾರಿ ಯಶಸ್ವಿಯಾಗಿ 11 ಅಂಕ ಪಡೆದರು.
ಮುಂಬಾಗೆ ರೋಚಕ ಜಯ
ಯು ಮುಂಬಾ ಮತ್ತು ಅಗ್ರಸ್ಥಾನಿ ಪುನೇರಿ ಪಲ್ಟಾನ್ಸ್ ನಡುವಿನ ದ್ವಿತೀಯ ಪಂದ್ಯ ಅತ್ಯಂತ ರೋಚಕವಾಗಿತ್ತು. ಇದನ್ನು ಮುಂಬಾ 34-33 ಅಂತರದಿಂದ ಜಯಿಸಿತು. ಮುಂಬಾ ಪರ ಗುಮಾನ್ ಸಿಂಗ್ (13 ಅಂಕ) ಮತ್ತು ಪುನೇರಿ ಪರ ಮೋಹಿತ್ ಗೋಯತ್ (13 ಅಂಕ) ಉತ್ತಮ ಆಟವಾಡಿದರು.