ರಾಸ್‌ ಟೇಲರ್‌ ಪ್ರಕರಣ: ತಮಾಷೆಗಾಗಿ ಕಪಾಳಮೋಕ್ಷ ? 

Team Udayavani, Aug 15, 2022, 10:53 PM IST

ವೆಲ್ಲಿಂಗ್ಟನ್‌: ರಾಜಸ್ಥಾನ್‌ ರಾಯಲ್ಸ್‌ ಮಾಲಕರೊಬ್ಬರು ರಾಸ್‌ ಟೇಲರ್‌ಗೆ ಕಪಾಳಮೋಕ್ಷ ಮಾಡಿದರೆಂಬ ಪ್ರಕರಣ 11 ವರ್ಷಗಳ ಬಳಿಕ ಕಾವೇರಿಸಿಕೊಂಡಿದೆ. ಆದರೆ ಇದೊಂದು ಗಂಭೀರ ಘಟನೆಯಲ್ಲ, ತಮಾಷೆಗಾಗಿ ಮಾಡಿರಬಹುದು ಎಂಬುದಾಗಿ ರಾಜಸ್ಥಾನ್‌ ರಾಯಲ್ಸ್‌ ಫ್ರಾಂಚೈಸಿಯ ಅಧಿಕಾರಿಯೊಬ್ಬರು ಹೇಳಿದ್ದಾರೆ.

ಪ್ರಕರಣ ನನಗೆ ತಿಳಿದಿಲ್ಲ
“ಪ್ರಕರಣ ನನಗೆ ತಿಳಿದಿಲ್ಲ. ನಾನು ರಾಸ್‌ ಟೇಲರ್‌ ಅವರ ಪುಸ್ತಕವನ್ನೂ ಓದಿಲ್ಲ. ಕ್ರಿಕೆಟಿಗನೊಬ್ಬನ ಮೇಲೆ ಕೈ ಮಾಡುವಷ್ಟು ಕೆಟ್ಟ ಚಾಳಿಯವರು ನಮ್ಮಲ್ಲಿಲ್ಲ, ಎಲ್ಲಿಯೂ ಇಲ್ಲ. ಇದೊಂದು ತಮಾಷೆಯ ಘಟನೆ ಆಗಿರಬಹುದು…’ ಎಂದು ಹೆಸರು ಹೇಳಬಯಸದ ಅವರು ತಿಳಿಸಿದರು.

2011ರ ಐಪಿಎಲ್‌ ಸೀಸನ್‌ ವೇಳೆ ತಾನು ಸೊನ್ನೆಗೆ ಔಟಾದಾಗ ರಾಜಸ್ಥಾನ್‌ ರಾಯಲ್ಸ್‌ ತಂಡದ ಮಾಲಕರೊಬ್ಬರು ಕಪಾಳಮೋಕ್ಷ ಮಾಡಿದ್ದರು ಎಂಬುದು ರಾಸ್‌ ಟೇಲರ್‌ ಮಾಡಿರುವ ಗಂಭೀರ ಆರೋಪ. ಅವರ ಜೀವನಚರಿತ್ರೆ “ಬ್ಲ್ಯಾಕ್‌ ಆ್ಯಂಡ್‌ ವೈಟ್‌’ನಲ್ಲಿ ಇದರ ಉಲ್ಲೇಖವಿದೆ.