ಬ್ರೆಝಿಲ್‌, ಸ್ವಿಜರ್ಲೆಂಡ್‌ಗೆ ನಾಕೌಟ್‌ ಅರ್ಹತೆ

Team Udayavani, Dec 3, 2022, 10:42 PM IST

ದೋಹಾ: ಕ್ಯಾಮೆರೂನ್‌ ಹೊಡೆತಕ್ಕೆ 5 ಬಾರಿಯ ಚಾಂಪಿಯನ್‌ ಬ್ರೆಝಿಲ್‌ ಬೆಚ್ಚಿಬಿದ್ದಿದೆ. ಪೀಲೆ ನಾಡಿನ ಅಭಿಮಾನಿಗಳು ದಂಗಾಗಿದ್ದಾರೆ. ಆದರೆ ಈ ಸೋಲಿನ ಹೊರತಾಗಿಯೂ ಬ್ರೆಝಿಲ್‌ ನಾಕೌಟ್‌ ಪ್ರವೇಶಕ್ಕೇನೂ ಅಡ್ಡಿಯಾಗಿಲ್ಲ. ಈ ಐತಿಹಾಸಿಕ ಗೆಲುವಿನ ಹೊರತಾಗಿಯೂ ಕ್ಯಾಮೆರೂನ್‌ಗೆ ಮುನ್ನಡೆ ಸಾಧ್ಯವಾಗಿಲ್ಲ. “ಜಿ’ ಬಣದ ಇನ್ನೊಂದು ಪಂದ್ಯದಲ್ಲಿ ಸ್ವಿಜರ್ಲೆಂಡ್‌ ವಿರುದ್ಧ ಸೆರ್ಬಿಯ ಸೋತಿದ್ದರೆ, ಕ್ಯಾಮೆರೂನ್‌ ಮುನ್ನಡೆಯುತ್ತಿತ್ತು. ಆದರೆ ಸ್ವಿಜರ್ಲೆಂಡ್‌ ಗೆದ್ದು ಮೇಲೇರಿತು.

ಜಿ ಗುಂಪಿನಲ್ಲಿ ಬ್ರೆಝಿಲ್‌ ಮತ್ತು ಸ್ವಿಜರ್ಲೆಂಡ್‌ ತಲಾ 6 ಅಂಕ ಗಳಿಸಿದವು (2 ಗೆಲುವು, 1 ಸೋಲು). ಕ್ಯಾಮೆರೂನ್‌ ಮೂರಕ್ಕೆ ಕುಸಿಯಿತು (1 ಜಯ, 1 ಸೋಲು, 1 ಡ್ರಾ, 4 ಅಂಕ), ಸೆರ್ಬಿಯ ಅಂತಿಮ ಸ್ಥಾನಿಯಾಯಿತು (2 ಸೋಲು, 1 ಡ್ರಾ, 1 ಅಂಕ).

ಕ್ಯಾಮೆರೂನ್‌ ಇತಿಹಾಸ: “ಜಿ’ ವಿಭಾಗದ ಮುಖಾಮುಖಿಯಲ್ಲಿ ಬ್ರೆಝಿಲ್‌ ವಿರುದ್ಧ 1-0 ಅಂತರದ ಜಯಭೇರಿ ಮೊಳಗಿಸಿದ ಕ್ಯಾಮೆರೂನ್‌ ಹೊಸ ಇತಿಹಾಸವನ್ನೇ ನಿರ್ಮಿಸಿತು. ವಿಶ್ವಕಪ್‌ ಚರಿತ್ರೆಯಲ್ಲಿ ಬ್ರೆಝಿಲ್‌ಗೆ ಸೋಲುಣಿಸಿದ ಆಫ್ರಿಕಾ ಖಂಡದ ಮೊದಲ ದೇಶವೆಂಬ ಹಿರಿಮೆ ಕ್ಯಾಮೆರೂನ್‌ನದ್ದಾಯಿತು. ಹಾಗೆಯೇ ವೀರೋಚಿತವಾಗಿಯೇ ಕತಾರ್‌ ವಿಶ್ವಕಪ್‌ಗೆ ವಿದಾಯ ಹೇಳಿತು.

ಗೋಲುರಹಿತ ಡ್ರಾ ಆಗಬೇಕಿದ್ದ ಈ ಪಂದ್ಯಕ್ಕೆ ತಿರುವು ಕೊಟ್ಟವರು ವಿನ್ಸೆಂಟ್‌ ಅಬೂಬಕರ್‌. ಪೂರ್ಣಾವಧಿ ಕಳೆದು 2 ನಿಮಿಷದಲ್ಲಿ ಅವರು ಗೆಲುವಿನ ಗೋಲ್‌ ಸಿಡಿಸಿದರು. ಇದರೊಂದಿಗೆ ಬ್ರೆಝಿಲ್‌ ತಂಡದ ಹಂತದ ಸತತ 17 ಪಂದ್ಯಗಳ ಅಜೇಯ ವಿಶ್ವಕಪ್‌ ಲೀಗ್‌ ದಾಖಲೆ ಮುರಿಯಲ್ಪಟ್ಟಿತು.

ಗೋಲು ಬಾರಿಸಿದ ಸಂತಸದಲ್ಲಿ ವಿನ್ಸೆಂಟ್‌ ಅಬೂಬಕರ್‌ ತಮ್ಮ ಜೆರ್ಸಿಯನ್ನು ಕಿತ್ತೆಸೆದು ಸಂಭ್ರಮಿಸಿದರು. ಈ ಅಸಭ್ಯ ವರ್ತನೆಗೆ ಮರು ನಿಮಿಷದಲ್ಲೇ ಅವರಿಗೆ ರೆಡ್‌ ಕಾರ್ಡ್‌ ನೀಡಿ ಹೊರಗೆ ಕಳುಹಿಸಲಾಯಿತು. ಹೀಗೆ, ಗೋಲು ಬಾರಿಸಿದ ಬೆನ್ನಲ್ಲೇ ವಿಶ್ವಕಪ್‌ ಪಂದ್ಯದಿಂದ ಹೊರಬಿದ್ದು ಜಿನೆದಿನ್‌ ಜಿದಾನೆ ಸಾಲಿಗೆ ಸೇರಿದರು. ಇಟಲಿ ವಿರುದ್ಧದ 2006ರ ಫೈನಲ್‌ನಲ್ಲಿ ಜಿದಾನೆ ಈ ಶಿಕ್ಷೆಗೆ ಗುರಿಯಾಗಿದ್ದರು.

ಬ್ರೆಝಿಲ್‌ಗೆ ಒಂದೆರಡು ಸಲ ಗೋಲು ಬಾರಿಸುವ ಅವಕಾಶ ಎದುರಾಗಿತ್ತು. 14ನೇ ನಿಮಿಷದಲ್ಲೇ ಗೇಬ್ರಿಯಲ್‌ ಮಾರ್ಟಿನೆಲ್ಲಿ ಖಾತೆ ತೆರೆಯಲು ಸಜ್ಜಾಗಿದ್ದರು. ಆದರೆ ಇವರ “ಹೆಡರ್‌’ಗೆ ಡೇವಿಸ್‌ ಇಪಾಸ್ಸಿ ತಡೆಯೊಡ್ಡುವಲ್ಲಿ ಯಶಸ್ವಿಯಾದರು.

ಫ‌ಲಿತಾಂಶ
ಕ್ಯಾಮೆರೂನ್‌: 01
ಬ್ರೆಝಿಲ್‌: 00