ಟೋಕಿಯೊ ಒಲಿಂಪಿಕ್ಸ್‌: ಹೊಸ ಭರವಸೆಯಲ್ಲಿ ಭಾರತ..

Team Udayavani, Jul 23, 2021, 7:45 AM IST

122 ವರ್ಷಗಳ ಒಲಿಂಪಿಕ್ಸ್‌ ನಂಟಿನ ಭಾರತ ಈ ವರೆಗೆ ಗೆದ್ದದ್ದು ಕೇವಲ 28 ಪದಕ. 2012ರ ಲಂಡನ್‌ ಕೂಟದಲ್ಲಿ  6 ಪದಕ ಒಲಿದದ್ದೇ ಶ್ರೇಷ್ಠ ಸಾಧನೆ. ಟೋಕಿಯೋದಲ್ಲಿ ಇದು ಎರಡಂಕೆಯ ಗಡಿ ಮುಟ್ಟಿತೇ?

ಭಾರತ ಮತ್ತು ಒಲಿಂಪಿಕ್ಸ್‌ಗೆ ಬರೋಬ್ಬರಿ 122 ವರ್ಷಗಳ ನಂಟು. ನಮ್ಮ ದೇಶ 1900ರಿಂದಲೇ ಒಲಿಂಪಿಕ್ಸ್‌ ಕ್ರೀಡಾಕೂಟದಲ್ಲಿ ಪ್ರತಿನಿಧಿಸುತ್ತ ಬಂದಿದೆ. ಆದರೆ ಭಾರತದ ಒಲಿಂಪಿಕ್ಸ್‌ ಸಾಧನೆಯ ಪುಸ್ತಕದಲ್ಲಿ ಗೋಚರಿಸುವುದು ಹಾಕಿ ಸುವರ್ಣ ಅಧ್ಯಾಯವೊಂದೇ.

ಭಾರತದ ಜನಸಂಖ್ಯೆಗೂ ಪದಕ ಬೇಟೆಗೂ ಯಾವ ಸಂಬಂಧವೂ ಇಲ್ಲ. 130 ಕೋಟಿ ಜನಸಂಖ್ಯೆಯ ಭಾರತ ಈ ವರೆಗೆ ಒಲಿಂಪಿಕ್ಸ್‌ನಲ್ಲಿ ಜಯಿಸಿದ್ದು ಬರೀ 28 ಪದಕ. 9 ಚಿನ್ನ, 7 ಬೆಳ್ಳಿ, 12 ಕಂಚು. ಇದರಲ್ಲಿ 8 ಚಿನ್ನ ಹಾಕಿಯೊಂದರಲ್ಲೇ ಒಲಿದಿದೆ. ಉಳಿದ ಏಕೈಕ ವೈಯಕ್ತಿಕ ಚಿನ್ನದ ಒಡೆಯನೆಂದರೆ ಶೂಟರ್‌ ಅಭಿನವ್‌ ಬಿಂದ್ರಾ (2008).

2012ರ ಲಂಡನ್‌ ಒಲಿಂಪಿಕ್ಸ್‌ನಲ್ಲಿ 6 ಪದಕ ಗೆದ್ದದ್ದು ಭಾರತದ ಅತ್ಯುತ್ತಮ ನಿರ್ವಹಣೆ. ಆದರೆ ಇದರಲ್ಲಿ ಒಂದೂ ಬಂಗಾರವಿಲ್ಲ. ಒಲಿಂಪಿಕ್ಸ್‌ನಲ್ಲಿ ಇಂಥದೊಂದು ಕಳಪೆ ಹಿನ್ನೆಲೆ ಹೊಂದಿರುವ ಭಾರತದಿಂದ ಟೋಕಿಯೊದಲ್ಲಿ ಪವಾಡ ನಿರೀಕ್ಷಿಸಲು ಸಾಧ್ಯವೇ? ಆದರೆ ಆಶಾವಾದಕ್ಕೆ ಮಿತಿ ಇಲ್ಲ. ಎರಡಂಕೆಯ ಪದಕ ಭಾರತದ ಗುರಿ. ಇದರಲ್ಲಿ ಎಷ್ಟರ ಮಟ್ಟಿಗೆ ಯಶಸ್ಸು ಲಭಿಸಲಿದೆ ಎಂಬುದನ್ನು ಕುತೂಹಲದಿಂದ ಗಮನಿಸಬೇಕಿದೆ.