ತಿರುವನಂತಪುರಂನಲ್ಲಿ ವಿರಾಟ್-ಗಿಲ್ ಶತಕದಬ್ಬರ: ಲಂಕಾಗೆ ಕಠಿಣ ಗುರಿ

Team Udayavani, Jan 15, 2023, 5:37 PM IST

ತಿರುವನಂತಪುರಂ: ಮತ್ತೆ ಅದ್ಭುತ ಫಾರ್ಮ್ ಗೆ ಮರಳಿರುವ ಮಾಜಿ ನಾಯಕ ವಿರಾಟ್ ಕೊಹ್ಲಿ ಸರಣಿಯಲ್ಲಿ ಮತ್ತೊಂದು ಶತಕ ಸಿಡಿಸಿದ್ದಾರೆ. ಲಂಕಾ ಬೌಲರ್ ಗಳ ಎಸೆತಗಳನ್ನು ಗ್ರೀನ್ ಫೀಲ್ಡ್ ಅಂಗಳದ ಮೂಲೆ ಮೂಲೆಗೆ ಹೊಡೆದ ವಿರಾಟ್ ಕೊಹ್ಲಿ ಭರ್ಜರಿ ಶತಕ ಬಾರಿಸಿದ್ದಾರೆ. ಅಲ್ಲದೆ ಆರಂಭಿಕ ಆಟಗಾರ ಶುಭ್ಮನ್ ಗಿಲ್ ಕೂಡಾ ಶತಕ ಬಾರಿಸಿದರು.

ಇವರಿಬ್ಬರ ಶತಕದ ನೆರವಿನಿಂದ ಭಾರತ ತಂಡ ಐದು ವಿಕೆಟ್ ನಷ್ಟಕ್ಕೆ 390 ರನ್ ಗಳಿಸಿದೆ. ಈಗಾಗಲೇ ಸರಣಿ ಕಳೆದುಕೊಂಡಿರುವ ಲಂಕಾ ಮರ್ಯಾದೆ ಉಳಿಸಿಕೊಳ್ಳಲು 391 ರನ್ ಗಳಿಸಬೇಕಾಗಿದೆ.

ಟಾಸ್ ಗೆದ್ದ ಭಾರತಕ್ಕೆ ಉತ್ತಮ ಆರಂಭ ಸಿಕ್ಕಿತ್ತು. ಗಿಲ್ ಮತ್ತು ರೋಹಿತ್ ಮೊದಲ ವಿಕೆಟ್ ಗೆ 95 ರನ್ ಗಳಿಸಿದರು. ರೋಹಿತ್ 42 ರನ್ ಗಳಿಸಿ ಔಟಾದರು. ಉತ್ತಮ ಇನ್ನಿಂಗ್ಸ್ ಕಟ್ಟಿದ ಗಿಲ್ 97 ಎಸೆತದಲ್ಲಿ 14 ಬೌಂಡರಿ ಎರಡು ಸಿಕ್ಸರ್ ನೆರವಿನಿಂದ 116 ರನ್ ಗಳಿಸಿದರು. ಅಯ್ಯರ್ 38 ರನ್ ಮಾಡಿದರು.

ಆದರೆ ವಿರಾಟ್ ಕೊಹ್ಲಿ ತಾನೇಕೇ ಈ ಜನರೇಶನ್ ನ ಬೆಸ್ಟ್ ಬ್ಯಾಟರ್ ಎನ್ನುವುದನ್ನು ಮತ್ತೊಮ್ಮೆ ಸಾಬೀತು ಮಾಡಿದರು. 85 ಎಸೆತಗಳಲ್ಲಿ ಶತಕ ಪೂರೈಸಿದ ವಿರಾಟ್ ನಂತರ ಮನಸೋಇಚ್ಚೆ ಬ್ಯಾಟ್ ಬೀಸಿದರು. ಒಟ್ಟು 110 ಎಸೆತ ಎದುರಿಸಿದ ವಿರಾಟ್ ಕೊಹ್ಲಿ ಅಜೇಯ 166 ರನ್ ಗಳಿಸಿದರು. ವಿರಾಟ್ ಇನ್ನಿಂಗ್ಸ್ ನಲ್ಲಿ 13 ಬೌಂಡರಿ ಮತ್ತು ಎಂಟು ಸಿಕ್ಸರ್ ಗಳು ಸೇರಿತ್ತು.

ಇದೊಂದಿಗೆ ವಿರಾಟ್ ಏಕದಿನ ಕ್ರಿಕೆಟ್ ನಲ್ಲಿ 46ನೇ ಶತಕ ಬಾರಿಸಿದರು. ಸಚಿನ್ ತೆಂಡೂಲ್ಕರ್ ಅವರು 49 ಶತಕ ಬಾರಿಸಿ ಮೊದಲ ಸ್ಥಾನದಲ್ಲಿದ್ದಾರೆ. ಇದೇ ವೇಳೆ ವಿರಾಟ್ ಲಂಕಾ ವಿರುದ್ಧ ಹತ್ತನೇ ಶತಕ ಬಾರಿಸಿದರು.