Yo-Yo testನಲ್ಲಿ 17.2 ಅಂಕ ಪಡೆದ ವಿರಾಟ್: ಇಲ್ಲಿದೆ ಅತೀ ಹೆಚ್ಚು ಅಂಕ ಪಡೆದವರ ಪಟ್ಟಿ
Team Udayavani, Aug 24, 2023, 11:39 AM IST
ಬೆಂಗಳೂರು: ಟೀಂ ಇಂಡಿಯಾದ ಮಾಜಿ ನಾಯಕ ವಿರಾಟ್ ಕೊಹ್ಲಿ ಅವರು ಈಗಾಗಲೇ ವಿಶ್ವದ ಕ್ರೀಡಾಪಟುಗಳಿಗೆ ಫಿಟ್ನೆಸ್ ಐಕಾನ್ ಆಗಿದ್ದಾರೆ. ತನ್ನ ನಾಯಕತ್ವದ ಅವಧಿಯಲ್ಲಿ ತಂಡದ ಎಲ್ಲಾ ಆಟಗಾರರನ್ನು ಫಿಟ್ ಮಾಡಿಸಿದ್ದ ವಿರಾಟ್, ಅದರಿಂದಲೇ ಉತ್ತಮ ಪ್ರದರ್ಶನ ತೋರುವಂತೆ ಮಾಡಿದ್ದರು. ತಾನು ಸದಾ ಫಿಟ್ ಇದ್ದು, ಕ್ರೀಡಾಪಟುಗಳಿಗೆ ಮಾದರಿಯಾಗಿದ್ದಾರೆ.
ಭಾರತೀಯ ಕ್ರಿಕೆಟಿಗರ ಫಿಟ್ನೆಸ್ ಪರೀಕ್ಷೆಗೆ ಬಿಸಿಸಿಐ ಯೋ-ಯೋ ಟೆಸ್ಟ್ ಅಳವಡಿಸಿದೆ. ತಂಡದಲ್ಲಿ ಸ್ಥಾನ ಪಡೆಯಬೇಕಾದರೆ ಆಟಗಾರರು ಯೋ-ಯೋ ಪರೀಕ್ಷೆಯಲ್ಲಿ ಉತ್ತೀರ್ಣರಾಗಲೇಬೇಕು. ಗುರುವಾರ (ಆ.24) ವಿರಾಟ್ ಕೊಹ್ಲಿ ಅವರು ಯೋ-ಯೋ ಟೆಸ್ಟ್ ನೀಡಿದ್ದು, 17.2 ಅಂಕ ಪಡೆದಿದ್ದಾರೆ. ಈ ಬಗ್ಗೆ ಸ್ವತಃ ಅವರೇ ಇನ್ಸ್ಟಾಗ್ರಾಮ್ ಸ್ಟೋರಿಯಲ್ಲಿ ಹೇಳಿಕೊಂಡಿದ್ದಾರೆ.
ಇದನ್ನೂ ಓದಿ:California: ಬಾರ್ ನಲ್ಲಿ ದುಷ್ಕರ್ಮಿಯಿಂದ ಗುಂಡಿನ ದಾಳಿ… 5 ಮೃತ್ಯು, 6 ಮಂದಿ ಆಸ್ಪತ್ರೆಗೆ
ವೆಸ್ಟ್ ಇಂಡೀಸ್ ವಿರುದ್ಧದ ಟಿ20 ಸರಣಿ ಮತ್ತು ಐರ್ಲೆಂಡ್ ವಿರುದ್ಧದ ಸರಣಿಯಲ್ಲಿ ವಿಶ್ರಾಂತಿ ಪಡೆದಿರುವ ವಿರಾಟ್ ಕೊಹ್ಲಿ ಮುಂಬರುವ ಏಷ್ಯಾಕಪ್ ನಲ್ಲಿ ತಂಡಕ್ಕೆ ಕಮ್ ಬ್ಯಾಕ್ ಮಾಡಲಿದ್ದಾರೆ. ಇದಕ್ಕೂ ಮೊದಲು ಯೋ-ಯೋ ಟೆಸ್ಟ್ ನೀಡಿರುವ ವಿರಾಟ್ ಮತ್ತೆ ತಾನೇಕೆ ಫಿಟ್ ಪ್ಲೇಯರ್ ಎಂದು ನಿರೂಪಿಸಿದ್ದಾರೆ.
ಏನಿದು ಯೋ-ಯೋ ಟೆಸ್ಟ್
ಯೋ-ಯೋ ಪರೀಕ್ಷೆಯು ಏರೋಬಿಕ್ ಎಂಡ್ಯುರೆನ್ಸ್ ಫಿಟ್ನೆಸ್ ಪರೀಕ್ಷೆಯಾಗಿದ್ದು, ಇದು ವೇಗದಲ್ಲಿ 20 ಮೀಟರ್ ಗಳ ಅಂತರದಲ್ಲಿರುವ ಮಾರ್ಕರ್ ಗಳ ನಡುವೆ ಓಡುವುದನ್ನು ಒಳಗೊಂಡಿರುತ್ತದೆ. ವಿರಾಟ್ ಕೊಹ್ಲಿ ಅವರು ಭಾರತದ ನಾಯಕರಾಗಿದ್ದ ಅವಧಿಯಲ್ಲಿ ಈ ಪರೀಕ್ಷೆಯನ್ನು ಪರಿಚಯಿಸಲಾಯಿತು. ಆರಂಭದಲ್ಲಿ ಇದರ ಉತ್ತೀರ್ಣ ಸ್ಕೋರ್ 16.1 ರಷ್ಟಿದ್ದು, ಇದೀಗ ಇದನ್ನು 16.5 ಕ್ಕೆ ಹೆಚ್ಚಿಸಲಾಗಿದೆ.
ಅತೀ ಹೆಚ್ಚು ಅಂಕ ಪಡೆದವರು ಯಾರು?
ಯೋ-ಯೋ ಟೆಸ್ಟ್ ನಲ್ಲಿ ಅತಿ ಹೆಚ್ಚು ಅಂಕ ಪಡೆದ ದಾಖಲೆ ಜಮ್ಮು ಕಾಶ್ಮೀರದ ಬ್ಯಾಟರ್ ಅಹಮದ್ ಬಂಡೇ ಹೆಸರಿನಲ್ಲಿದೆ. 2018ರ ದೇಶಿಯ ಋತುವಿನ ವೇಳೆ ಅವರು 19.4 ಸ್ಕೋರ್ ಮಾಡಿದ್ದರು.
ಎರಡನೇ ಸ್ಥಾನದಲ್ಲಿ ಮತ್ತೋರ್ವ ದೇಶಿಯ ಆಟಗಾರ ಮಯಾಂಕ್ ಡಗಾರ್ ಇದ್ದಾರೆ. 2018ರ ಐಪಿಎಲ್ ವೇಳೆ ಮಯಾಂಕ್ 19.3 ಅಂಕ ಪಡೆದಿದ್ದರು. ಕನ್ನಡಿಗ ಮನೀಶ್ ಪಾಂಡೆ 2017ರಲ್ಲಿ 19.2 ಅಂಕ ಪಡೆದು ಈ ಪಟ್ಟಿಯಲ್ಲಿ ಮೂರನೇ ಸ್ಥಾನದಲ್ಲಿದ್ದಾರೆ. ನಾಲ್ಕನೇ ಸ್ಥಾನದಲ್ಲಿ ವಿರಾಟ್ ಕೊಹ್ಲಿ ಮತ್ತು ಹಾರ್ದಿಕ್ ಪಾಂಡ್ಯ 19 ಅಂಕಗಳೊಂದಿಗೆ ಇದ್ದಾರೆ.