2026ರ ಯೂತ್ ಒಲಿಂಪಿಕ್ಸ್ ಭಾರತದಲ್ಲಿ ?
Team Udayavani, Apr 19, 2018, 6:00 AM IST
ಹೊಸದಿಲ್ಲಿ: ವಿಶ್ವದ ಅತ್ಯಂತ ಬೃಹತ್ ಕ್ರೀಡಾಕೂಟವಾದ ಒಲಿಂಪಿಕ್ಸ್ ಅನ್ನು ಭಾರತದಲ್ಲೇ ನಡೆಸಬೇಕೆನ್ನುವುದು ಬಹುಜನರ ಒತ್ತಾಯ. ಪ್ರಧಾನಿ ಮೋದಿ ನೇತೃತ್ವದ ಸರಕಾರ ಅಸ್ತಿತ್ವಕ್ಕೆ ಬಂದಾಗ ಈ ಕನಸು ಸಾಕಾರವಾಗುತ್ತದೆ ಎಂಬ ಊಹೆಗಳು ಹುಟ್ಟಿಕೊಂಡಿದ್ದವು. ಈಗ ಮತ್ತೂಮ್ಮೆ ಅಂತಹದ್ದೇ ಲೆಕ್ಕಾಚಾರಗಳು ಗರಿಗೆದರಿವೆ. ಆದರೆ ಈ ಬಾರಿಯದ್ದು ಯೂತ್ ಒಲಿಂಪಿಕ್ಸ್ ಕನಸು!
ಮೋದಿ ಪ್ರಧಾನಿಯಾದ ಆರಂಭದಲ್ಲೇ ಅಂತಾರಾಷ್ಟ್ರೀಯ ಒಲಿಂಪಿಕ್ಸ್ ಸಂಸ್ಥೆ ಅಧ್ಯಕ್ಷ ಥಾಮಸ್ ಬಾಕ್ ಭಾರತಕ್ಕೆ ಬಂದಿದ್ದರು. ಆ ಸಂದರ್ಭದಲ್ಲಿ ಒಲಿಂಪಿಕ್ಸ್ ಆಯೋಜನೆ ಕನಸು ಹುಟ್ಟಿಕೊಂಡಿದ್ದವು. ಮುಂದಿನ ಹಂತದಲ್ಲಿ ಇಂತಹ ಯಾವುದೇ ಮಾತುಕತೆಗಳು ನಡೆದ ಬಗ್ಗೆ ವರದಿಗಳು ಬರಲಿಲ್ಲ. ಇದೀಗ ಮತ್ತೆ ಬಾಕ್ ಭಾರತಕ್ಕೆ ಬರುವ ಸುಳಿವು ಸಿಕ್ಕಿದೆ. ಈ ಬಾರಿ ಅವರು 2026ರ ಯೂತ್ ಒಲಿಂಪಿಕ್ಸನ್ನು ಭಾರತದಲ್ಲೇ ನಡೆಸುವ ಕುರಿತು ಪ್ರಧಾನಿ ಮೋದಿಯೊಂದಿಗೆ ಮಾತುಕತೆ ನಡೆಸಲಿದ್ದಾರೆಂದು ವರದಿಗಳಾಗಿವೆ.
ಬುಧವಾರ ಮಧ್ಯರಾತ್ರಿ ಥಾಮಸ್ ಬಾಕ್ ಭಾರತಕ್ಕೆ ಬರಲಿದ್ದಾರೆ. ಸದ್ಯ ಒಲಿಂಪಿಕ್ಸ್ ಸಂಸ್ಥೆಗೆ ಭಾರತದಲ್ಲೇ ಯೂತ್ ಒಲಿಂಪಿಕ್ಸ್ ನಡೆಸುವ ನಂಬಿಕೆಯಿದೆ. ಪೂರ್ಣ ಪ್ರಮಾಣದ ಒಲಿಂಪಿಕ್ಸ್ಗೆ ಹೋಲಿಸಿದರೆ ಯೂತ್ ಒಲಿಂಪಿಕ್ಸ್ ಆಯೋಜನೆ ಖರ್ಚು ಬಹಳ ಕಡಿಮೆಯಿರುತ್ತದೆ. ಜೊತೆಗೆ ಖರ್ಚಿನಲ್ಲಿ ಒಲಿಂಪಿಕ್ಸ್ ಸಂಸ್ಥೆಯೂ ಒಂದಷ್ಟನ್ನು ಭರಿಸಲಿದೆ. ಆದ್ದರಿಂದ ಅದನ್ನು ಸರಕಾರ ಒಪ್ಪ ಬಹುದು ಎನ್ನುವುದು ಲೆಕ್ಕಾಚಾರ. ಯುವ ಒಲಿಂಪಿಕ್ಸ್
ನಲ್ಲಿ ಒಟ್ಟಾರೆ ಪಾಲ್ಗೊಳ್ಳುವ ಆ್ಯತ್ಲೀಟ್ಗಳ ಸಂಖ್ಯೆ 3500. 2010ರಲ್ಲಿ ಸಿಂಗಾಪುರದಲ್ಲಿ ಮೊದಲ ಬಾರಿ ಈ ಕೂಟ ನಡೆದಿತ್ತು.