ವಿಶ್ವದ ಅತಿದೊಡ್ಡ ಎಲೆಕ್ಟ್ರಾನಿಕ್ಸ್‌ ಸಗಟು ಮಾರುಕಟ್ಟೆ ಬಂದ್‌

Team Udayavani, Aug 30, 2022, 7:55 AM IST

ಬೀಜಿಂಗ್‌: ಕೊರೊನಾ ಪ್ರಕರಣಗಳ ಸಂಖ್ಯೆಯಲ್ಲಿ ಏರಿಕೆ ಹಿನ್ನೆಲೆಯಲ್ಲಿ ಚೀನದ ತಂತ್ರಜ್ಞಾನ ನಗರ ಎಂದೇ ಖ್ಯಾತವಾಗಿರುವ ಶೆನ್ಜೆನ್ ನಗರದಲ್ಲಿರುವ ವಿಶ್ವದ ಅತಿದೊಡ್ಡ ಎಲೆಕ್ಟ್ರಾನಿಕ್ಸ್‌ ಸಗಟು ಮಾರುಕಟ್ಟೆಯನ್ನು ಬಂದ್‌ ಮಾಡಲು ಚೀನ ಸರ್ಕಾರ ಸೋಮವಾರ ಆದೇಶಿಸಿದೆ.

ಚೀನದ “ಶೂನ್ಯ ಕೋವಿಡ್‌’ ನೀತಿಯು ವ್ಯಾಪಾರ, ವ್ಯವಹಾರಕ್ಕೆ ಅತಿ ದೊಡ್ಡ ತೊಡಕಾಗಿದೆ ಎಂದು ಅಲ್ಲಿನ ಚಿಂತಕರ ಚಾವಡಿಯ ಕಳವಳದ ಹೊರತಾಗಿಯೂ ಸರ್ಕಾರ ಮಾರುಕಟ್ಟೆ ಬಂದ್‌ ಮಾಡಿದೆ.

ಕೋವಿಡ್‌ ವೈರಸ್‌ ವ್ಯಾಪಕವಾಗಿ ಹರಡುತ್ತಿರುವ ಹಿನ್ನೆಲೆಯಲ್ಲಿ ಗುರುವಾರದವೆರೆಗೆ ಎಲೆಕ್ಟ್ರಾನಿಕ್ಸ್‌ ಸಗಟು ಮಾರುಕಟ್ಟೆ ಬಂದ್‌ ಮಾಡಲಾಗುತ್ತಿದೆ ಎಂದು ಹುವಾಯಿಬಿ ಜಿಲ್ಲೆಯ ವ್ಯಾಪಾರಿಗಳಿಗೆ ಸ್ಥಳೀಯ ಆಡಳಿತ ಅಧಿಕೃತವಾಗಿ ನೋಟಿಸ್‌ ನೀಡಿದೆ.

ಈ ಸಮಯದಲ್ಲಿ ಎಲ್ಲ ಉದ್ಯೋಗಿಗಳು ಮನೆಯಿಂದಲೇ ಕೆಲಸ ಮಾಡಬೇಕು. ಅಲ್ಲದೇ ಪ್ರತಿದಿನ ಕೊರೊನಾ ಪರೀಕ್ಷೆಗೆ ಒಳಗಾಗಬೇಕು ಎಂದು ಸೂಚಿಸಲಾಗಿದೆ. ಈ ಪ್ರದೇಶವು ಚೀನದ ದೊಡ್ಡ ದೊಡ್ಡ ಎಲೆಕ್ಟ್ರಾನಿಕ್ಸ್‌ ಕಂಪನಿಗಳ ಪ್ರಮುಖ ವ್ಯಾಪಾರ ತಾಣವಾಗಿದೆ.