Nuclear ದಾಳಿ ವೇಳೆ ಪಾರಾಗೋದು ಹೇಗೆ? ರಷ್ಯಾ ಮಕ್ಕಳಿಗೆ ಪಾಠ

Team Udayavani, Feb 8, 2024, 5:58 AM IST

ಮಾಸ್ಕೋ: ಅಣುಬಾಂಬ್‌ ದಾಳಿ ವೇಳೆ ತಮ್ಮನ್ನು ತಾವು ಹೇಗೆ ರಕ್ಷಿಸಿಕೊಳ್ಳಬೇಕು ಎಂಬ ಬಗ್ಗೆ ಇನ್ನು ಮುಂದೆ ರಷ್ಯಾದ ಪ್ರೌಢಶಾಲೆ ವಿದ್ಯಾರ್ಥಿಗಳು ತರಬೇತಿ ಪಡೆಯಲಿದ್ದಾರೆ. ವಿಶೇಷವೆಂದರೆ, ಪ್ರೌಢಶಾಲಾ ಪಠ್ಯದಲ್ಲೇ “ಮಾತೃಭೂಮಿಯ ಭದ್ರತೆ ಮತ್ತು ರಕ್ಷಣೆಯ ಮೂಲಭೂತ ಅಂಶಗಳು’ ಎಂಬ ವಿಷಯವನ್ನು ವಿದ್ಯಾರ್ಥಿಗಳು ಕಲಿಯಲಿದ್ದಾರೆ. ಇದರ ಭಾಗವಾಗಿ ಅವರಿಗೆ ರಕ್ಷಣ ತರಬೇತಿ ನೀಡಲಾಗುತ್ತದೆ. ಉಕ್ರೇನ್‌-ರಷ್ಯಾ ಯುದ್ಧದ ಸಂದರ್ಭದಲ್ಲಿ ಈ ಬೆಳವಣಿಗೆ ಮಹತ್ವ ಪಡೆದಿದೆ.

ತರಬೇತಿಯಲ್ಲಿ ವಿದ್ಯಾರ್ಥಿಗಳು ಕಲಾಶ್ನಿಕೋವ್‌ ರೈಫ‌ಲ್‌, ಹ್ಯಾಂಡ್‌ ಗ್ರೆನೇಡ್‌ ಬಳಸುವುದು ಹೇಗೆ ಸೇರಿದಂತೆ
ಪ್ರಾಥಮಿಕ ಮಿಲಿಟರಿ ತರಬೇತಿ ಪಡೆಯಲಿದ್ದಾರೆ. ಅಲ್ಲದೇ ಪ್ರಥಮ ಚಿಕಿತ್ಸೆ ಮತ್ತು ಸ್ವಯಂ ರಕ್ಷಣೆ ತರಬೇತಿ ಪಡೆಯಲಿದ್ದಾರೆ. ಪ್ರಾಕೃತಿಕ ವಿಕೋಪ, ಯುದ್ಧ ಹಾಗೂ ಅಣಬಾಂಬ್‌ ದಾಳಿ ಸಂದರ್ಭದಲ್ಲಿ ಸ್ವಯಂ ರಕ್ಷಣೆ ಕುರಿತು ತರಬೇತಿ ನೀಡಲಾಗುತ್ತದೆ. ಈ ವರ್ಷದ ಸೆ.1ರಿಂದ ಪರಿಷ್ಕೃತ ಪಠ್ಯಕ್ರಮದಲ್ಲಿ ಇದನ್ನು ಸೇರಿಸಲಾಗಿದೆ.