ಕೋವಿಡ್ ಸೋಂಕಿತರ ಸಮಸ್ಯೆಗೆ ಔಷಧಿ ಸಂಶೋಧನೆ: ಭಾರತೀಯ ಮೂಲದ ವೈದ್ಯೆಯ ಸಾಧನೆ !

Team Udayavani, Nov 21, 2020, 9:30 PM IST

ವಾಷಿಂಗ್ಟನ್:ಕೋವಿಡ್ ಸೋಂಕಿತರು ಎದುರಿಸುವ ಶ್ವಾಸಕೋಶ ಸಂಬಂಧಿ ಹಾಗೂ ಬಹು ಅಂಗಾಗ ವೈಫಲ್ಯದಂತಹ ಸಮಸ್ಯೆಗಳನ್ನು ಪರಿಹರಿಸಲು ಭಾರತೀಯ ಮೂಲದ ಅಮೆರಿಕ ವೈದ್ಯರು ಔಷಧಿ ಸಂಶೋಧಿಸುವಲ್ಲಿ ಯಶಸ್ವಿಯಾಗಿದ್ದಾರೆ.

ಅಮೆರಿಕದಲ್ಲಿರುವ ಸೆಂಟ್ ಜೂಡ್ ಮಕ್ಕಳ ಸಂಶೋಧನಾ  ಆಸ್ಪತ್ರೆಯಲ್ಲಿ ಕಾರ್ಯನಿರ್ವಹಿಸುತ್ತಿರುವ ಡಾ.ತಿರುಮಲಾ ದೇವಿ ಕನ್ನೆಗಂಟಿ ಅವರೇ ಈ ಸಂಶೋಧನೆ ನಡೆಸಿದವರು.

ಕೋವಿಡ್ ಸೋಂಕಿಗೆ ತುತ್ತಾದ ವ್ಯಕ್ತಿಯ ಜೀವ ಕಣಗಳು ಯಾವ ರೀತಿ ಸಾವನ್ನಪ್ಪುತ್ತವೆ ಎಂಬುದರ ಕುರಿತಾಗಿ ಸಂಶೋಧನೆ ನಡೆಸಿದ  ಇವರು, ಆ ಮೂಲಕ ಸೋಂಕಿತರಲ್ಲಿ ಕಂಡುಬರುವ ಶ್ವಾಸಕೋಶದ ಸಮಸ್ಯೆ ಮತ್ತು ಬಹು ಅಂಗಾಗ ವೈಪಲ್ಯವನ್ನು ತಡೆಗಟ್ಟುವ  ಔಷಧಿಯನ್ನು ಪತ್ತೆಹಚ್ಚಿದ್ದಾರೆ. ಈ ಕುರಿತ ಹೆಚ್ಚಿನ ಮಾಹಿತಿ ಇನ್ನಷ್ಟೇ ಲಭ್ಯವಾಗಬೇಕಿದೆ.

ಪರಿಣಾಮಕಾರಿಯಾದ ಚಿಕಿತ್ಸೆಯನ್ನು ನೀಡುವ ಮುನ್ನ ಸಮಸ್ಯೆಯ ರೀತಿಯನ್ನು ಅರ್ಥೈಸಿಕೊಳ್ಳುವುದು ಅತ್ಯಂತ ಪ್ರಮುಖವಾದ  ಅಂಶವಾಗಿದೆ ಎಂದು ಸೆಂಟ್ ಜೂಡ್ ರೋಗ ನಿರೋಧಕ ಶಾಸ್ತ್ರ ವಿಭಾಗದ ಉಪಾಧ್ಯಕ್ಷೆ  ಡಾ ಕನ್ನೆಗಂಟಿ ಹೇಳಿದ್ದಾರೆ.

ಇದನ್ನೂ ಓದಿ: ಕನ್ನಡ ಪರ ಹೋರಾಟಗಾರರು ಡೋಂಗಿಗಳು ಎಂದ ಯತ್ನಾಳ ಹೇಳಿಕೆ ಖಂಡಿಸಿ ಕರವೇ ಕಾರ್ಯಕರ್ತರ ಪ್ರತಿಭಟನೆ

ಡಾ ಕನ್ನೆಗಂಟಿ ಮೂಲತಃ ತೆಲಂಗಾಣದವರು. ಇವರು ತಮ್ಮ ಪದವಿ ವ್ಯಾಸಂಗವನ್ನು ವಾರಂಗಲ್ ನ ಕಾಕತಿಯಾ ವಿಶ್ವವಿದ್ಯಾನಿಲಯದಲ್ಲಿ ಪುರ್ಣಗೊಳಿಸಿದರು. ನಂತರ ರಸಾಯನ ಶಾಸ್ತ್ರ, ಪ್ರಾಣಿ ಶಾಸ್ತ್ರ,ಹಾಗೂ ಸಸ್ಯ ಶಾಸ್ತ್ರದಲ್ಲಿ ಉನ್ನತ ವ್ಯಾಸಂಗವನ್ನು ಮಾಡಿದ  ಇವರು 2007 ರಿಂದ  ಅಮೆರಿಕದ ಸೆಂಟ್ ಜೂಡ್ ಮಕ್ಕಳ ಸಂಶೋಧನಾ   ಆಸ್ಪತ್ರೆಯಲ್ಲಿ ಕಾರ್ಯ ನಿರ್ವಹಿಸುತ್ತಿದ್ದಾರೆ.

ಈ ಸಂಶೋಧನೆಯ ಅಧ್ಯಯನವು ಕೋವಿಡ್ ಒಳಗೊಂಡಂತೆ  ‘ಸೆಪ್ಸಿಸ್’ನಂತಹ ಇತರ ಮಾರಣಾಂತಿಕ ಸಮಸ್ಯೆಗಳ ವಿರುದ್ಧ ಹೋರಾಡಲು  ಸಹಾಯ ಮಾಡಲಿದೆ ಎಂದು  ಅಭಿಪ್ರಾಯ ವ್ಯಕ್ತಪಡಿಸಿದ್ದಾರೆ.