ಅಫ್ಘಾನ್ ತಂಡವನ್ನು ಹಗುರವಾಗಿ ಕಾಣಬೇಡಿ: ಆಸೀಸ್ ಆಟಗಾರರಿಗೆ ಫಿಂಚ್ ಎಚ್ಚರಿಕೆ
Team Udayavani, Jun 1, 2019, 4:20 PM IST
ಲಂಡನ್: ವಿಶ್ವ ಕ್ರಿಕೆಟ್ ನಲ್ಲಿ ಅಚ್ಚರಿಯ ಫಲಿತಾಂಶ ನೀಡುತ್ತಿರುವ ಅಫ್ಘಾನಿಸ್ಥಾನ ತಂಡ ಈ ಸಲದ ವಿಶ್ವಕಪ್ ಕೂಟದಲ್ಲಿ ಹಾಲಿ ಚಾಂಪಿಯನ್ ಆಸ್ಟ್ರೇಲಿಯಾವನ್ನು ಎದುರಿಸಲಿದೆ. ಪಂದ್ಯಕ್ಕೂ ಮೊದಲು ಮಾತನಾಡಿದ ಆಸೀಸ್ ನಾಯಕ ಆರೋನ್ ಫಿಂಚ್, ಯಾವುದೇ ಕಾರಣಕ್ಕೂ ಅಫ್ಘಾನ್ ತಂಡವನ್ನು ಹಗುರವಾಗಿ ಕಾಣಬೇಡಿ ಎಂದು ಎಚ್ಚರಿಕೆ ನೀಡಿದ್ದಾರೆ.
‘ ಅಫ್ಘಾನ್ ತಂಡ ಇತ್ತೀಚಿನ ವರ್ಷಗಳಲ್ಲಿ ಅತ್ಯುತ್ತಮವಾಗಿ ಆಡುತ್ತಿದೆ. ವಿಶ್ವ ದರ್ಜೆಯ ಆಟಗಾರರನ್ನು ಆ ತಂಡ ಹೊಂದಿದೆ. ನಾವು 2015ರಲ್ಲಿ ಪರ್ತ್ ನಲ್ಲಿ ಅಫ್ಘಾನ್ ವಿರುದ್ಧ ಆಡಿ ಗೆದ್ದಿದ್ದೆವು. ಆದರೆ ಈಗ ಆ ತಂಡ ತುಂಬಾ ಬದಲಾಗಿದೆ. ವಿಶ್ವ ದರ್ಜೆಯ ಬೌಲರ್ ಗಳು ಮತ್ತು ಸತತವಾಗಿ ಸುಧಾರಣೆಯಾಗುತ್ತಿರುವ ಬ್ಯಾಟಿಂಗ್ ಹೊಂದಿದೆ ಎಂದು ಆಸೀಸ್ ನಾಯಕ ಅಭಿಪ್ರಾಯಪಟ್ಟರು.
“ ನಾವು ಯಾವ ಕ್ಷಣದಲ್ಲೂ ಅಫ್ಘಾನ್ ತಂಡವನ್ನು ಹಗುರವಾಗಿ ಕಾಣುವಂತಿಲ್ಲ. ನಾವು ಅತ್ಯುತ್ತಮ ಪ್ರದರ್ಶನ ನೀಡಬೇಕಿದೆ. ಇಲ್ಲದಿದ್ದರೆ ಅವರು ನಮ್ಮ ಮೇಲೆ ಹಿಡಿತ ಸಾಧಿಸುವಲ್ಲಿ ಅನುಮಾನವಿಲ್ಲ’ ಎಂದಿದ್ದಾರೆ.
ಆಸ್ಟ್ರೇಲಿಯಾ ಮತ್ತು ಅಫ್ಘಾನಿಸ್ಥಾನ ನಡುವಿನ ಪಂದ್ಯ ಭಾರತೀಯ ಕಾಲಮಾನ ಪ್ರಕಾರ ಶನಿವಾರ ಆರು ಗಂಟೆಗೆ ಬ್ರಿಸ್ಟೊಲ್ ನ ಕೌಂಟಿ ಗ್ರೌಂಡ್ ನಲ್ಲಿ ನಡೆಯಲಿದೆ.