ಚಾರ್ಮಾಡಿ ಗೇಟ್: ಹೆಚ್ಚುತ್ತಿದೆ ವಾಹನ ದಟ್ಟಣೆ
Team Udayavani, May 9, 2020, 5:11 AM IST
ಮುಂಡಾಜೆ: ಲಾಕ್ಡೌನ್ ಸಡಿಲಗೊಂಡ ಹಿನ್ನೆಲೆಯಲ್ಲಿ ಚಾರ್ಮಾಡಿ ಮೂಲಕ ಸಂಚರಿಸುವ ವಾಹನ ಮತ್ತು ಪ್ರಯಾಣಿಕರ ಸಂಖ್ಯೆ ದಿನೇ ದಿನೇ ಏರಿಕೆಯಾಗುತ್ತಲೇ ಇದೆ. ದ್ವಿತೀಯ ಶನಿವಾರವಾದ ಕಾರಣ ಮೇ 9ರಂದು ಇನ್ನಷ್ಟು ಹೆಚ್ಚಿನ ವಾಹನಗಳು ಚಾರ್ಮಾಡಿ ಮೂಲಕ ಸಂಚರಿಸುವ ನಿರೀಕ್ಷೆ ಇದೆ.
ಚಾರ್ಮಾಡಿ ಘಾಟಿ ಪರಿಸರದಲ್ಲಿ ಒಂಟಿ ಸಲಗ ಓಡಾಡುತ್ತಿರುವುದರಿಂದ ಅನೇಕ ವಾಹನ ಸವಾರರು ಘಾಟಿಯಲ್ಲಿ ಗಂಟೆಗಟ್ಟಲೆ ಕಾಯುವ ಪರಿಸ್ಥಿತಿಯೂ ನಿರ್ಮಾಣವಾಗಿದೆ. ಶುಕ್ರವಾರ ಮುಂಜಾನೆ ಉಜಿರೆ ಕಡೆಯಿಂದ ಬೈಕ್ಗಳ ಮೂಲಕ ರಾಜಸ್ಥಾನಕ್ಕೆ ತೆರಳುತ್ತಿದ್ದ 12 ಕಟ್ಟಡ ಕಾರ್ಮಿಕರ ಪಾಸ್ಗಳ ಕ್ಯೂ ಆರ್ ಕೋಡ್ ಸ್ಕ್ಯಾನ್ ಆಗದ ಕಾರಣ ಮುದ್ರಿತ ಪ್ರತಿ ತರುವಂತೆ ತಿಳಿಸಿ ವಾಪಸು ಕಳುಹಿಸಲಾಗಿದೆ ಎಂದು ಚೆಕ್ಪೋಸ್ಟ್ ನಿಂದ ಮಾಹಿತಿ ಲಭ್ಯವಾಗಿದೆ.