ಪತ್ನಿಯ ತಂಗಿ ಮೇಲೆ ಪತಿ ಕಣ್ಣು; ಹೆಂಡತಿ ಕೊಲೆಗೆ ಹಾವು ಖರೀದಿ!

Team Udayavani, Feb 17, 2017, 12:30 PM IST

ಬಾಗಲಕೋಟೆ:ಪತ್ನಿಯ ತಂಗಿಯ ಮೇಲಿನ ಆಸೆಯಿಂದ ಪತ್ನಿಯನ್ನೇ ಕೊಂದು, ಬಳಿಕ ಪತ್ನಿ ಹಾವು ಕಚ್ಚಿ ಸಾವನ್ನಪ್ಪಿರುವುದಾಗಿ ನಂಬಿಸಿದ್ದ. ಆದರೆ ಇದೀಗ ಪತಿಯ ಕಳ್ಳಾಟ ಬಯಲಾಗಿರುವ ಘಟನೆ ಬಾಗಲಕೋಟೆ ಲೋಕಾಪುರ ಪೊಲೀಸ್ ಠಾಣೆ ವ್ಯಾಪ್ತಿಯಲ್ಲಿ ನಡೆದಿದೆ.

1 ಸಾವಿರ ರೂ. ನೀಡಿ ಹಾವು ಖರೀದಿಸಿದ್ದ!
ಚಂದ್ರ ಕಿಲಬನೂರು(30) ಎಂಬಾತ ಪತ್ನಿ ರತ್ನವ್ವ(25ವರ್ಷ)ಳನ್ನು ಹತ್ಯೆಗೈದಿದ್ದ. ಆದರೆ ಪತ್ನಿ ಯನ್ನು ಕೊಲೆಗೈದಿರುವ ವಿಷಯ ತಿಳಿಯಬಾರದು ಎಂದು ಲೆಕ್ಕಚಾರ ಹಾಕಿದ್ದ ಚಂದ್ರ, ಮೊದಲೇ ಒಂದು ಸಾವಿರ ರೂಪಾಯಿ ನೀಡಿ ನಾಗರಹಾವನ್ನು ಖರೀದಿಸಿದ್ದನಂತೆ!

ಪತ್ನಿ ಹಾವು ಕಡಿದು ಸಾವನ್ನಪ್ಪಿರುವುದಾಗಿ ಎಲ್ಲರನ್ನೂ ನಂಬಿಸಲೆತ್ನಿಸಿದ್ದ. ಆದರೆ ಮರಣೋತ್ತರ ಪರೀಕ್ಷೆಯಲ್ಲಿ ಪತಿಯ ಅಸಲಿ ಮುಖ ಬಯಲಾಗಿತ್ತು. ಗಂಡನೇ ಪತ್ನಿಯ ಕತ್ತು ಹಿಸುಕಿ ಸಾಯಿಸಿರುವುದು ಬಟಾಬಯಲಾಗಿತ್ತು. ಈ ಘಟನೆ ಫೆ.14ರಂದು ನಡೆದಿದ್ದು, ಇದೀಗ ತಡವಾಗಿ ಬಹಿರಂಗವಾಗಿದೆ. 

ಲೋಕಾಪುರ ಪೊಲೀಸ್ ಠಾಣೆಯಲ್ಲಿ ಪ್ರಕರಣ ದಾಖಲಾಗಿದ್ದು, ಚಂದ್ರನನ್ನು ವಶಕ್ಕೆ ಪಡೆದು ವಿಚಾರಣೆ ನಡೆಸುತ್ತಿದ್ದಾರೆ ಎಂದು ಮಾಧ್ಯಮದ ವರದಿ ತಿಳಿಸಿದೆ. ಪತ್ನಿಯ ತಂಗಿಯ ಮೇಲಿನ ಆಸೆಯಿಂದ ಹೆಂಡತಿಯನ್ನು ಕೊಂದಿರುವುದಾಗಿ ಆರೋಪಿ ತಪ್ಪೊಪ್ಪಿಕೊಂಡಿದ್ದಾನೆ ಎಂದು ಪೊಲೀಸ್ ಮೂಲಗಳು ಹೇಳಿವೆ.