ಕೋವಿಡ್‌ ಸೆಂಟರ್‌ನಲ್ಲಿ ಸೋಂಕಿತೆಯಿಂದ ಯೋಗ ಪಾಠ

Team Udayavani, Sep 14, 2020, 6:08 PM IST

ಬಳ್ಳಾರಿ: ನಗರದ ವಿಮ್ಸ್‌ನ ಡೆಂಟಲ್‌ ಕಾಲೇಜಿನಲ್ಲಿ ಕೋವಿಡ್‌ ಸೋಂಕಿಗೆ ಚಿಕಿತ್ಸೆ ಪಡೆಯಲು ದಾಖಲಾಗಿರುವ ಯೋಗ ಶಿಕ್ಷಕಿ ಸಾವಿತ್ರಿ ಅವರು ಆಸ್ಪತ್ರೆಯಲ್ಲಿನ ಇನ್ನಿತರೆ ಕೋವಿಡ್‌ ಸೋಂಕಿತ ಮಹಿಳೆಯರಿಗೂ ಯೋಗಾಭ್ಯಾಸಮಾಡಿಸುವ ಮೂಲಕ ಅವರಲ್ಲಿ ಆರೋಗ್ಯದ ಕುರಿತು ಕಾಳಜಿಯೊಂದಿಗೆಜಾಗೃತಿಯನ್ನೂ ಮೂಡಿಸುತ್ತಿದ್ದಾರೆ.

ಆಸ್ಪತ್ರೆಯಲ್ಲಿನ ಸೋಂಕಿತ ಮಹಿಳೆಯರಿಗೆ ಪ್ರಾಣಾಯಾಮ, ವಜ್ರಾಸನ ಸೇರಿ ಯೋಗಾಸನದ ಹಲವು ಆಸನಗಳ ಬಗ್ಗೆ ಪ್ರಾಯೋಗಿಕವಾಗಿ ಹೇಳಿಕೊಡುತ್ತಿರುವ ಯೋಗ ಶಿಕ್ಷಕಿ ಸಾವಿತ್ರಿಯವರು, ಔಷಧಗಳು, ಚಿಕಿತ್ಸೆಗಳ ಜೊತೆಗೆ ಯೋಗಾಸನದಿಂದಲೂ ನಮ್ಮ ದೇಹದಲ್ಲಿ ರೋಗ ನಿರೋಧಕ ಶಕ್ತಿ ಹೆಚ್ಚಿಸಿಕೊಳ್ಳಬಹುದು. ಎಲ್ಲರೂ ಯೋಗಾಭ್ಯಾಸವನ್ನು ಜೀವನದ ಅಂಗವಾಗಿ ರೂಢಿಸಿಕೊಳ್ಳಬೇಕು. ಆರೋಗ್ಯದ ಕುರಿತು ಯಾರೂ ನಿರ್ಲಕ್ಷ್ಯ ವಹಿಸಬಾರದು. ಪ್ರತಿಯೊಬ್ಬರು ಗಳಿಸುವುದು ಬದುಕಿಗಾಗಿಬದುಕಬೇಕೆಂದರೆ ಉತ್ತಮ ಆರೋಗ್ಯವೂ ಬಹಳ ಮುಖ್ಯ ಎಂದು ಅವರು ತಿಳಿಸಿದರು.

ಪ್ರತಿದಿನ ಯೋಗ ಮತ್ತು ಪ್ರಾಣಾಯಾಮವನ್ನು ರೂಢಿಸಿಕೊಳ್ಳುವುದ ರಿಂದ ಆರೋಗ್ಯದಲ್ಲಿ ಯಾವುದೇ ಸಮಸ್ಯೆಗಳು ಕಾಣಿಸಿಕೊಳ್ಳುವುದಿಲ್ಲ. ದೈಹಿಕ ಚಟುವಟಿಕೆಗಳು ಸರಾಗವಾಗಿ ಕಾರ್ಯನಿರ್ವಹಿಸುತ್ತವೆ. ಶರೀರವನ್ನು ದಣಿಸುವ ಮೂಲಕ ಆರೋಗ್ಯವಂತರಾಗಿ ರಬೇಕು ಎಂದರು. ಭಾರತೀಯ ಸಂಸ್ಕೃತಿ ಮತ್ತು ಪರಂಪರೆ ಹೆಚ್ಚಿಸುವ ಇಂತಹ ಅಭ್ಯಾಸಗಳು ಮಾನಸಿಕ ಮತ್ತು ದೈಹಿಕ ಶಕ್ತಿ ಹೆಚ್ಚಿಸುತ್ತದೆ. ಸೋಂಕಿತರು ಆತಂಕಕ್ಕೊಳಗಾಗದೇ ಧೈರ್ಯದಿಂದ ಯೋಗಾಭ್ಯಾಸ ಸೇರಿ ಇತರೆ ಚಟುವಟಿಕೆಗಳಲ್ಲಿ ತೊಡಗಿ ಸದಾ ಹಸನ್ಮುಖೀಯಾಗಿರಬೇಕು ಎಂದು ವಿಭಾಗದ ಕೋವಿಡ್‌ ನೋಡಲ್‌ ಅಧಿಕಾರಿ ಡಾ| ರಾಘವೇಂದ್ರ ಹೇಳಿದರು.