ಸಿಎಫ್ಟಿಆರ್‌ಐನಿಂದ 2 ಹೊಸ ಉತ್ಪನ್ನ ಬಿಡುಗಡೆ

Team Udayavani, Feb 12, 2019, 7:26 AM IST

ಮೈಸೂರು: ಮೈಸೂರಿನ ಕೇಂದ್ರೀಯ ಆಹಾರ ತಾಂತ್ರಿಕ ಸಂಶೋಧನಾಲಯ (ಸಿಎಫ್ಟಿಆರ್‌ಐ) ದೀರ್ಘ‌ ಕಾಲ ಬಾಳಿಕೆ ಬರುವ 2 ವಿನೂತನ ಉತ್ಪನ್ನಗಳನ್ನು ಮಾರುಕಟ್ಟೆಗೆ ಪರಿಚಯಿಸಿದೆ.

ಉತ್ತರ ಕರ್ನಾಟಕದಲ್ಲಿ ಸುಪ್ರಸಿದ್ಧವಾದ ಗೋಧಿ ಹುಗ್ಗಿ ಇದೀಗ ಒಂದು ವರ್ಷಗಳ ಕಾಲ ಬಾಳಿಕೆ ಬರುವಂತೆ ಕ್ಯಾನುಗಳಲ್ಲಿ ಪ್ಯಾಕ್‌ ಆಗಿ ದೊರೆಯಲಿದೆ. ಗೋಧಿಯಿಂದ ತಯಾರಿಸಲ್ಪಡುವ ಪಾಯಸದಂತಹ ಈ ತಿನಿಸನ್ನು ಧಾರವಾಡದ ಲತ್ತಿ/ ಲಟ್ಟಿ ಫ‌ುಡ್ಸ್‌ ಕಂಪನಿಯು ತಯಾರಿಸಿ ಮಾರಾಟ ಮಾಡುತ್ತಿದೆ.

ಮೈಸೂರಿನ ಅವಧೂತ ದತ್ತಪೀಠವು ಭಕ್ತರಿಗೆ ವಿತರಿಸುವ ಪ್ರಸಾದಂ, ಸಂಸ್ಥೆಯು ಅಭಿವೃದ್ಧಿಪಡಿಸಿರುವ ಮತ್ತೂಂದು ಉತ್ಪನ್ನ. ಗೋಧಿ ಹಿಟ್ಟು, ಬೆಲ್ಲ, ತುಪ್ಪ, ಗೋಡಂಬಿ-ಬಾದಾಮಿಯಂತಹ ಬೀಜಗಳನ್ನು ಸೇರಿಸಿ ತಯಾರಿಸುವ ಪ್ರಸಾದವು ಈಗ ಟಿನ್‌ ರಹಿತ ಸ್ಟೀಲ್‌ ಡಬ್ಬಿಯಲ್ಲಿ ಪ್ಯಾಕ್‌ ಆಗಿ ದೊರೆಯಲಿದೆ. ಕನಿಷ್ಠ ಮೂರು ತಿಂಗಳು ಈ ಪ್ರಸಾದ ಕೆಡದೆ ಉಳಿಯಲಿದೆ.

ಗಣಪತಿ ಸಚ್ಚಿದಾನಂದ ಆಶ್ರಮ ಎಂದು ಹೆಸರಿರುವ ಶ್ರೀ ದತ್ತಪೀಠ ದೀರ್ಘ‌ ಬಾಳಿಕೆಯ ಪ್ರಸಾದವನ್ನು ಅಭಿವೃದ್ಧಿಪಡಿಸಿಕೊಡುವಂತೆ ವಿನಂತಿಸಿತ್ತು. ಅದಕ್ಕಾಗಿ ಪ್ರಸಾದವನ್ನು ಹರ್ಡಲ್‌ ತಂತ್ರಜ್ಞಾನವನ್ನು ಬಳಸಿ ಸಂಸ್ಕರಿಸಿ ಪ್ಯಾಕ್‌ ಮಾಡಿದೆವು.

ಸಾಮಾನ್ಯ ಉಷ್ಣತೆಯಲ್ಲಿ ಈ ಪ್ರಸಾದ ಮೂರು ತಿಂಗಳು ಬಾಳಿಕೆ ಬರುತ್ತದೆ ಎನ್ನುತ್ತಾರೆ ಪ್ರಸಾದವನ್ನು ಅಭಿವೃದ್ಧಿಪಡಿಸಿದ ತಂಡದ ಸದಸ್ಯರಾದ ಸಿಎಫ್ಟಿಆರ್‌ಐ ಆಹಾರ ಪ್ಯಾಕೇಜಿಂಗ್‌ ತಂತ್ರಜ್ಞಾನ ವಿಭಾಗದ ಮುಖ್ಯಸ್ಥರೂ ಆಗಿರುವ ವಿಜ್ಞಾನಿ ಎಚ್.ಎಸ್‌.ಸತೀಶ್‌.

ದೀರ್ಘ‌ ಬಾಳಿಕೆ: ಪಾರಂಪರಿಕ ಸ್ವಾದದ ಜೊತೆಗೆ ದೀರ್ಘ‌ ಬಾಳಿಕೆಯ ತಂತ್ರಜ್ಞಾನವೂ ಮಿಳಿತವಾಗಿರುವ ಈ ಉತ್ಪನ್ನಗಳನ್ನು ದಾಸ್ತಾನಿಡಲು ರೆಫ್ರಿಜಿರೇಟರುಗಳ ಅಗತ್ಯವಿಲ್ಲ. ಆಹಾರ ಸುರಕ್ಷತೆಯ ಜೊತೆಗೇ ವಿಸ್ತೃತ ಮಾರುಕಟ್ಟೆಯ ಲಾಭವನ್ನು ಇವು ಒದಗಿಸಲಿವೆ ಎನ್ನುತ್ತಾರೆ ಸತೀಶ್‌.