ಗೋಪಾಡಿ ಕಡಲ ತಡಿಯಲ್ಲಿ ಚೀನ, ಕೊರಿಯಾದ ವಸ್ತುಗಳು ಪತ್ತೆ

Team Udayavani, Sep 8, 2020, 7:23 PM IST

ಕೋಟೇಶ್ವರ: ಕ್ಲೀನ್‌ ಕುಂದಾಪುರ ತಂಡದ 62ನೇ ಬೀಚ್‌ ಕ್ಲೀನ್‌ ಕಾರ್ಯಕ್ರಮದಲ್ಲಿ ಚೀನದ ನೀರು ಬಾಟಲಿ ಹಾಗೂ ಕೊರಿಯಾದ ಆಹಾರ ಪ್ಯಾಕೆಟ್‌ ಗೋಪಾಡಿಯ ಕಡಲ ತಡಿಯಲ್ಲಿ ಕಂಡುಬಂದಿರುವುದು ಬಹಳಷ್ಟು ಕುತೂಹಲ ಹಾಗೂ ಚರ್ಚೆಗೆ ಗ್ರಾಸವಾಗಿದೆ.

ಕಡಲತಡಿಯಲ್ಲಿ ದಿನೇ ದಿನೇ ಹೆಚ್ಚುತ್ತಿರುವ ರಾಶಿ ರಾಶಿ ತ್ಯಾಜ್ಯವನ್ನು ನಿರಂತರವಾಗಿ ವಿಲೇವಾರಿಗೊಳಿಸು ತ್ತಿರುವ ತಂಡದ ಸರಸ್ವತಿ ಪುತ್ರನ್‌, ಕಲ್ಪನಾ ಭಾಸ್ಕರ್‌, ಅಭಿನಂದನ್‌ ಶೆಟ್ಟಿ , ರಾಜೇಂದ್ರ ಖಾರ್ವಿ, ರಾಘವೇಂದ್ರ, ಅರುಣ್‌ ಕುಮಾರ್‌, ಸತ್ಯನಾರಾಯಣ ಮಂಜ, ಭರತ್‌ ಬಂಗೇರ, ಮಾಲತಿ ಬಂಗೇರ, ಅಭಿನೇತ್ರಿ ಬಂಗೇರ ಅವರು ಸೆ.7 ರಂದು ತ್ಯಾಜ್ಯ ವಿಲೇವಾರಿಗೊಳಿಸುತ್ತಿದ್ದಂತೆ ಚೀನದ ನೀರು ಬಾಟಲಿ ಹಾಗೂ ಕೊರಿಯಾದ ಆಹಾರ ಪ್ಯಾಕೆಟ್‌ಗಳು ಕಂಡುಬಂದಿರುವುದು ನಾನಾ ಶಂಕೆಗೆ ಎಡೆಮಾಡಿದ್ದು ಸಮುದ್ರದ ಅಲೆಯೊಡನೆ ನೀರಿನಲ್ಲಿ ತೇಲಿ ಬಂತೇ? ಮುಂತಾದ ವಿಚಾರಗಳ ಬಗ್ಗೆ ಚರ್ಚೆ ನಡೆಯುತ್ತಿದ್ದು ಪೊಲೀಸ್‌ ಇಲಾಖೆ ಈ ಬಗ್ಗೆ ತನಿಖೆ ನಡೆಸಬೇಕಾದ ಅನಿವಾರ್ಯತೆಯಿದೆ.